Erkin Sidiq: Chet Elde Oqughan Netijilik Uyghurlar (2)

Chet Elde Oqughan Netijilik Uyghurlar (2)

Erkin Sidiq

2015-yili 2-ayning 27-küni

Kona yéziq nusxisi:

http://bbs.izdinix.com/thread-62589-1-1.html
http://bbs.bagdax.cn/thread-28626-1-1.html
http://bbs.alkuyi.com/thread-49566-1-1.html

http://bbs.bozqir.top/forum.php?mod=viewthread&tid=6458
http://www.ejdad.com/bbs/forum.php?mod=viewthread&tid=3068#lastpost

PDF Nusxisi: http://www.meripet.com/2015/20150227_chetel_uyghur2.pdf

Men aldinqi qétim mezkur maqalining 1-qismini torgha chiqarghandin kéyin [1], köpligen qérindashlar manga chet ellerdiki bir qisim netijilik qérindashlarning isimlirini inkas sheklide éytip berdi. Men mushu pursettin paydilinip ashu qérindashlargha chin könglümdin rehmet éytimen. Buningdin kéyin mumkin bolsa manga ashundaq qérindashlarning alaqilishish uchurlirini shexsiy uchur yaki élxet arqiliq dep bersenglar. Men ular bilen özüm alaqileshsem. Men silerning ashundaq yardiminglar üchün aldin rehmet éytimen.

Men mezkur yazmamda yene üch neper yéngi qérindishimizni tonushturimen. Men hazirghiche 11 neper qérindishimizni tonushturup bolghan bolup, bu qétim tonushturidighinim 12-, 13- we 14-qérindishimiz bolup hésablinidu.

Ebeydulla Abduweli

Inimiz Ebeydulla Abduweli 1969-yili 9-ayda Ürümchide bir addiy ziyaliy a’iliside tughulghan. U 1987-yili Ürümchi sheherlik 3-ottura mektepni ela netije bilen püttürüp, Shinjang Uniwérsitétining xenzuche teyyarliq sinipigha qobul qilindi. Ikki yilliq teyyarliq kursini ela netijiler bilen püttürüp, Junggo Néfit Uniwérsitétining Yer Shari Fizikisi kespige qobul qilindi. Néfit Uniwérsitétida oqush jeryanida, u kespiy derslerni yaxshi élip bérish bilen bir waqitta, In’gliz tilini ching tutup ögendi. Shundaqla mekteptiki ijtima’iy pa’aliyetlergimu aktip qatniship, oqutquchi we sawaqdashlirining yaxshi bahasigha érishti.

1-resim: Inimiz Ebeydulla Abduweli

Ebeydulla 1993-yili néfit uniwérsitétini yaxshi netijiler bilen püttürgendin kéyin, ichkiridiki néfitlikte qélip qélish pursitidin waz kéchip, ana yurtigha qaytip keldi. Shu yili 7-ayda Shinjang néfit shirkiti qidirip tekshürüsh bashqarmisi teripidin xizmetke qobul qilindi. Shu yildin bashlap taki 1997-yilighiche Tarim we Jungghar oymanliqlirida néfit qidirip tekshürüsh xizmiti bilen shughullandi. Her xil qiyinchiliqlarni yéngip, etrette gé’o-fizik (geophysicist), gé’ofizika bölüm bashliqi, we etretning téxnika bashliqi qatarliq xizmet wezipilirini ötidi.

1997-yili bahar aylirida, Ebeydulla néfit qidirip tekshürüsh bashqarmisining Ürümchide turushluq Tetqiqat merkizige yötkilip kélip, gé’ofizika tetqiqatchisi bolup, néfit qatlimini tépish, néfit miqdarini mölcherlesh, quduq ornini békitish qatarliq xizmetler bilen shughullandi. Muhim néfitliklerning bayqilishigha közge körünerlik töhpilerni qoshti. 2000-yilliri, Junggo néfit shirkitining dunyagha qarap kéngiyiwatqan mezgilliri idi. 2001-yili Ebeydulla kespiy we In’glizche imtihanlarda ela netijiler bilen layaqetlik bolup, Junggo néfit shirkitining Béyjingdiki gé’ofizika tetqiqat bashqarmisigha qobul qilindi. Ebeydulla bu tetqiqat merkizide Sudan, Ezerbeyjan, Wénézu’éla qatarliq döletlerdiki néfitliklerning gé’ofizika tetqiqat xizmetlirige mes’ul bolup ishlidi. 2002–yili Ezerbeyjandiki Gülbostan néfitlikining bash gé’ofizik xizmitige teyinlinip, Baku shehirige ewetildi. Ebeydulla Ezerbeyjandiki Gülbostan néfitlikining échilishida közge körünerlik töhpilerni yaratti.

2-resim: Inimiz Ebeydulla dalada jughrapiyilik tekshürüsh we öginish élip bériwatqan waqittiki bir körünüsh

Ebeydulla aliy mektepte oqush jeryanida bolsun, xizmet qilish jeryanida bolsun, In’gliz tilini ching tutup ögendi. 2002-yili Amérikida oquydighan chet ellik oqughuchilardin telep qilinidighan TOEFL we GRE imtihanlirida yaxshi netijiler bilen layaqetlik bolup, Amérika Téksas Uniwérsitétining yer-shari fizikisi fakultéti teripidin toluq oqush mukapati bilen qobul qilindi. 2005-yili mektep püttürüp, Gé’ofizika Magistirliq unwanigha érishti. Shu yilining 9-aylirida Téksas shtatining Hyuston shehiridiki Bakérxyus (BakerHughes) néfit mulazimet shirkiti teripidin xizmetke qobul qilindi. U Bakérxyusta quduq gé’ofizika tetqiqati bilen shughullandi. 2006–yili Anadarko Néfit Shirkitining Hyustondiki Tetqiqat merkizige qobul qilindi. Ebeydulla bu merkezde gé’ofizika téxnikisi arqiliq, shirketning dunyaning her qaysi jayliridiki néfit charlash xizmitini ishlidi. Gana (Ghana) we Mozambik (Mozambique) tiki chong néfitliklerning bayqilishida muhim rol oynidi. Ebeydulla 2010-yilidin hazirghiche öz shirkitining Méksika Boghuzi bashqarmisida chongqur déngizda néfit charlash, néfit qatlimini tépish, quduq ornini békitish, we néfit miqdarini mölcherlesh qatarliq nahayiti yuqiri derijilik kespiy we téxnikiliq xizmetler bilen shughullinip, közge körünerlik netijilerni qolgha keltürüp kéliwatidu.

Doktor Ghappar Pettar (Apar Pataer, MD, PhD) we Muqeddes Qurban

Inimiz Ghappar (In’glizche «Apar Pataer» dep yézilidu) Ürümchige yéqin yerdiki bir yézida tughulghan bolup, ösmürlük dewrini ikki akisi, ikki hedisi we bir ukisi bilen ashu yézida ötküzdi. 1981-yili u a’ile boyiche Turpan’gha köchüp barghan bolup, toluq otturini 1983-yili Turpanda püttürdi. U 1983-yili Shinjang Tébbiy Uniwérsitétining dawalash kespige qobul qilinip, u mektepni 1988-yili tamamlidi. Ghappar aliy mektepte oquwatqan waqtidin bashlap chet elge chiqip oqushni özige ghaye qilip tiklep, In’gliz tilini qattiq tiriship ögendi. U her waqit könglige chong-chong ishlarni nishan qilip turghuzup, paydilan’ghili bolidighan hemme pursetlerdin toluq paydilinip, öz nishanlirini ishqa ashurush yolida qattiq tirishti. U yatiqining témigha bir dunya xeritisini chaplap qoyup, sawaqdashlirigha kelgüside barmaqchi bolghan döletlirini dep bérip yürdi. Shundaqla u mektipidiki derstin sirtqi pa’aliyetlergimu aktip qatnashti. Mesilen, u mektipining «Resim Kulubi» gha eza bolup kirip, kéyin ashu kulubning bashliqi boldi. Uning ghayiliri we ashu ghayilerni emelge ashurush yolida körsetken tirishchanliqliri uningda intayin küchlük irade we öz-özige bolghan ishenchni wujudqa keltürdi.

3-resim: Doktor Ghappar Pettar

Ghappar 1988-yili aliy mektepni püttürüp, Shinjang Xelq Doxturxanisigha doxtur bolup xizmetke kirip, u yerde ikki yil ishlidi.

U 1990-yili Yaponning Osaka shehiridiki Osaka Til Mektipige kélip, özining chet eldiki hayatini bashlidi. U her küni kündüzi mektepte oqup, axshimi taki yérim kéchigiche bir réstoranda kütküchi bolup ishlidi. Shenbe-yekshenbe künlirimu dem almay, oqush bilen ishleshni dawamlashturdi. Özining qattiq tirishchanliqi bilen, bir yil ichidila Yaponchini mukemmel sözliyeleydighan boldi. Yapon tilidin bashqa, u özlükidin In’gliz tili we hüjeyre bi’ologiyisige a’it kespiy bilimlernimu bille öginip mangdi.

Ghappar bir yil ichide özi pul tölep oqushqimu yéterlik pul yighip, Yapon’gha kélip bir yil toshqan waqitta Kyoto Uniwérsitétigha iltimas qildi. Ghappar üchün bu bir eng halqiliq qiyin ötkeldin ötüsh bolup, hazir mushundaq usul bilen Yaponiye we bashqa ellerde özliri üchün yol échiwatqan Uyghur oqughuchilar xéli köp. Ghapparning körsetken tirishchanliqning netijisi körülüp, 1991-yili Kyoto Uniwérsitétigha qobul qilindi. Besh yil tiriship oqup, u 1996-yili Kyoto Uniwérsitéti Tébabetchilik Fakultétining Hüjeyre Bi’ologiyisi, Rak késel Bi’ologiyisi we Patologiye kespi boyiche doktorluq unwanigha érishti. Oqush püttürgen yili u yene «Eng Yaxshi Aspirant Oqughuchi Mukapati» gha érishti. Uning oqush we tetqiqat jehettiki netijiliri alahide yaxshi bolghanliqi üchün, u oqush püttürgendin kéyin öz fakultétida «Yardemchi Proféssor» (Assistant Professor) xizmitige qobul qilindi. Shuning bilen u mushu fakultétqa xizmetke kirgen birinchi chet ellik proféssor boldi.

4-resim: Ghapparning apisi Reyimxan Memet hedimiz. 1997-yili Ghapparning apisi «Shinjang Ayalliri» zhurnilida tonushturulghan bolup, uni tonushturghan maqalige «Mektep körmigen ana ikki doktor perzentni qandaq terbiyilep östürgen?» dep mawzu qoyulghan. Ghapparning hedisi Reyhan Pettarmu 1993-yili Yaponda doktorluq unwani alghan bolup, hazir u Yaponda xizmet qilidu.

1992-yilidin 1998-yilighiche Ghappar yene Yaponiyening Otsu Qizil Krést Doxturxanisi (Otsu Red Cross Hospital) da qoshumche doxtur we oqutquchi bolup ishlidi.

Özining méditsina sahesidiki kespiy xizmitidin bashqa, Ghappar yene her xil ijtima’iy pa’aliyetlergimu aktip qatniship, Yaponiyening Kyoto rayonidiki bir qanche chet ellik oqughuchilar teshkilatlirida lidérliq wezipisini ötidi. U Uyghurlargha bolghan küchlük muhebbitining türtkiside, 1998-yili bir qisim Uyghur we Yaponluq dostliri bilen birlikte Kyoto, Nara, Kobé we Osaka rayonlirida «Tengritagh Medeniyet Almashturush Uyushmisi» ni qurup chiqti. Uyghur we Yaponlarni özige eza qilghan bu uyushma hazirmu mewjut bolup, u üzlüksiz halda kéngiyip méngiwatidu, hemde Yaponlargha Uyghur medeniyitini tonushturush, we Yapon’gha yéngi kelgen Uyghur oqughuchilargha yardem qilish jehetlerde muhim rollarni oynawatidu.

Ghappar öz yurtidiki Uyghur yashlirigha yardem qilish ishinimu izchil türde dawamlashturup kéliwatidu (http://tengritagh.turukusa.com/).

1998-yili Ghappar Yaponiye hökümitining iqtisadiy yardimi bilen Amérikining Téksas Uniwérsitéti Andérson Rak Késili Merkizige doktor-ashti bolup kirdi. Bu orun rak késili tetqiqatida dunyaning eng aldida turidighan bolup, Ghappar ashu merkezning Kökrek we Yürek Qan-Tomur Opératsiyisi (Thoracic & Cardiovascular Surgery) bölümide öpke-rak késilini dawalash saheside tetqiqat élip bardi. Bu bölümmu insanlarning öpke-rak késili tetqiqatida dunyagha dangliq bolup, dunyadiki tunji qétimliq insanlarning öpke-rak késilini dawalash siniqi mushu orunda élip bérilghan. Ghappar mushu orundiki doktor-ashtiliq tetqiqatini tamamlighandin kéyin, öz bölümige oqutquchi qilip élip qélindi. U dawamliq tiriship, Yardemchi Proféssor (Assistant Professor) pellisidinmu atlap, 2011-yili Mu’awin Proféssor (Associate Professor) salahiyitigimu ériship boldi.

5-resim: Doktor Ghappar Pettar doktor Jéymiz Déwéy Watson (James Dewey Watson) bilen bille. Doktor Watson DNA ning molékuliliq tüzülüshini bayqighan bolup, ashu netijisi üchün u 1962-yilidiki Nobél Méditsina mukapatigha érishken.

Ilawe: Amérikidiki magistir we doktor aspirant oqughuchiliri terbiyilesh salahiyitige ige aliy mekteplerde proféssorluqning jem’iy 3 derijisi bar: Yardemchi Proféssor, Mu’awin Proféssor we Toluq yaki Ömürlük Proféssor (Full Professor). Bu 3 baldaqning bir töwen baldiqidin uningdin yuqiri yene bir baldaqqa ösüsh üchün ders ötüsh we tetqiqat netijiliri jehette, shundaqla waqit mudditi jehette belgilik shertlerni qana’etlendürüsh kérek. Adette bir baldaqtin yene bir baldaqqa ösüsh üchün 5 yildek waqit kétidu. «Ömürlük Proféssor» dégen salahiyet eng üstün orunda turidighan bolup, bir adem bir aliy mektepte ashu salahiyetke érishkendin kéyin, uning mektipi u ademni xizmitidin éliwételmeydu. Aspirant oqughuchisi yoq aliy mektepler we iqtisadiy kirimni tüp meqset qilghan kichik aliy mekteplerde undaq tüzüm yoq bolup, oqutquchiliqqa qobul qilghan kishilerge ashu mektepler öz meyli boyiche salahiyet béreleydu. Shunglashqa undaq mekteplerde «Ömürlük Proféssor» dégen salahiyetmu mewjut bolmaydu.

Inimiz Ghappar özining kespiy sahesidiki dangliq xelq’araliq zhurnallarda köpligen ilmiy maqalilerni élan qilip boldi. U hazir öpke-rak késili saheside dunyadiki eng aldinqi qatardin orun alghan molékuliliq patolog we alimlar (molecular pathologist and scientists) ning biri.

Inimiz Ghappar tordashlargha nahayitimu tonushluq bolghan dangliq naxshichi singlimiz Muqeddes Qurban bilen turmushluq bolghan bolup, hazir ularning toy qilghinigha 18 yil boldi. Ularning bir jüp omaq qoshkézek qizli bar bolup, ularning ismi Dilfire bilen Dilmire. Singlimiz Muqeddes Amérikigha kelgendin kéyin qattiq tiriship, öz aldigha bir xususiy bina sodisi shirkitini qurup chiqti. Bu shirketning In’glizche ismi «Premier International Realty» (http://www.premierinternationalrealty.com/) bolup, Muqeddes hazir mezkur shirketning lidéri we asasliq igisi. Bu shirket karxana binaliri we turalghu binalardin ibaret ikki xil binalarni bashquridighan, bina salidighan we binalargha meblegh sélish ishlirini élip baridighan shirket bolup, Hyuston shehiri we uning etrapida igilik ishlirini élip baridu. Hazir bu shirket 250 karxana binalirini bashquridu. Singlimiz Muqeddes tejribilik we muweppeqiyetlik karxana lidérliridin biri bolup tereqqiy qilghan bolup, u köp qétim Hyuston sheherlik bina sodisi uyushmisining mukapatlishigha érishti.

Singlimiz Muqeddes Uyghur diyarida tughulup ösüp, burun artisliqni özige kesip qilghan. U Amérikigha kelgendin kéyin özligidin qattiq tiriship, bir yéngi kesipni ögendi. Uningdin bashqa u yene ashu yéngi kesiptiki bir muweppeqiyet qazan’ghuchi boldi. Yéngi kesiptiki bir karxanichi boldi. U hazir Amérikidiki bashqa oxshash kesiptikiler bilen riqabetliship yashawatidu. Yashighandimu nahayiti yaxshi yashawatidu. Qeddini tik tutup yashawatidu. Hazir Uyghur diyarida chong bolup naxshichi boliwatqan, ussulchi boliwatqan, artis boliwatqan, we bashqa xildiki sen’etkarlardin boliwatqan ukilar intayin köp. Ularning ichidiki bir qisim yashlar ashundaq yolni öz arzusi bilen tallighan bolmastin, jan béqish üchün ashundaq yolni tallashqa mejburi bolup qalghan bolushi mumkin. Ularning ichidiki yene bir qisim yashlar bolsa «Me bu ishtin bashqisigha yarimaymen», dep oylawatqan bolishimu mumkin. Emma biz singlimiz Muqeddestin ibaret mushu bir misaldin mundaq bir ishni yekünlep chiqalaymiz: Eger Amérikidikidek hemme kishiler barawer riqabetlishidighan bir sharait mewjut bolidighan bolsa, Uyghur diyaridiki hazir artis bolush yoligha méngiwatqan ashu ukilarning ichidin muweppeqiyetlik karxanichi bolalaydighanlarmu köplep chiqidu. Démek, Uyghur diyaridiki yashlar üchün hemme kishiler barawer riqabetlishidighan bir sharaitni berpa qilish intayin muhim. Xizmet pursetliri aldida hemme kishiler barawer bolush, bazar iqtisadi tüzümide hemme adem barawer riqabetlishishke ait qanunlar bolsa ularni ijra qildurush, qanun bolmisa uni berpa qildurush Uyghurlar buningdin kéyin qilishqa tégishlik toghra ishlarning biri, shundaqla eng muhim ishlarning biri.

6-resim: Ghappar, Muqeddes we ularning ikki omaq qizi.

Chet elde oqush üchün kéreklik nersilerning biri özining «xizmet tarixi» ni teyyarlash bolup, u In’glizche «Curriculum Vitae, CV» dep atilidu. Telep qilinidighan yene bir nerse özining oqush pilani bolup, u In’glizche «Personal Statement» dep atilidu. Inimiz Ghappar wetendiki yashlarning ashundaq matériyallarni teyyarlishigha yardem qilishni xalaydu.

Inimiz Ghapparning bir aditi aliy mekteptiki her xil oqughuchilar kulublirigha aktip qatnishish. Uning qarishiche bundaq ishlar ademning tejribilirini köpeytidu, shundaqla ademde bashqilar bilen ünümlük munasiwet qilish iqtidarini yétildüridu. Adem öz hayatida dawamliq türde öz wujudini ijabiy, selbiy we néytral héssiyatlar qapliwalghan ehwallarni uchritip turidu. Derstin sirtqi yaki xizmettin sirtqi her xil pa’aliyetlerge qatnishish ademning selbiy héssiyatini azaytidu, yaki ademde selbiy héssiyatning peyda bolushining aldini alidu. Ademler bir-birige oxshimaydu. Siz özingiz üchün bir ülge tiklisingiz bolidu, emma sizning u ülgidin eynen dorishingizning hajiti yoq. Siz özingizning ghayisi we özingizning emeliyiti arqiliq öz tarixingizni yézip chiqishingiz, hergizmu öz ghayingizning ghayib bolup kétishige yol qoymasliqingiz kérek.

Axirqi Söz

Yuqirida tonushturghan ikki neper inimiz baklawurluq oqushini Junggoda oqup, uningdin kéyin Junggoda bir mezgil ishlep, andin hökümetning yardimi bilen emes, özi yol échip chet elge chiqqanlar. Hazir Uyghur diyarida toluqsizni püttürüp bolupla chet elge chiqishni nishanlawatqan ukilar bar. Toluq otturini püttürüp bolupla chet elge chiqishni pilanlawatqanlarmu bar. Shundaqla aliy mektepni tamamlighandin kéyinla chet elge chiqish üchün tirishwatqan ukilarmu bar. Manga ashundaq ukilardin meslihet soraydighan xetler dawamliq kélip turiwatidu. Biz yuqiridiki inimiz Ebeydulla bilen Ghapparning emeliyitidin mundaq bir yekünni chiqiralaymiz: Eger siz toluqsiz, toluq we aliy mektepni püttürüp bolup, shuninggha ulapla chet elge chiqalmay qalsingiz, hergiz ensirimeng. Hergiz ümidsizlenmeng. Sizge kéyinche yene yol bar. Shunglashqa belni qoyiwetmey, dawamliq tirishing. Méning ata-anilargha béridighan bir teklipim: Balingizni toluqsiz yaki toluqni püttürüp bolushighila chet elge chiqirip qoyushqa aldirimang. Balingiz chet elge chiqip, özi musteqil yashash iqtidarigha igimu-emesmu, siz balingizni ashundaq qilishqa toluq teyyarlap boldingizmu-yoq, bu jehette obdanraq oylining we izdining. Eger toluq teyyar bolmighan balini chet elge chiqiriwetsingiz, u siz bergen pulni xejlep tügitip, emma oqushni tügitelmey qaytip kétidu. Biz chet elde ashundaq ehwalni arilap-arilap uchrutup turimiz. Balining normal yashap chong bolushi, we ata-anilar bilen balining iqtisadiy jehette özlirini bek qiyniwetmesliki üchün, balilar eng yaxshisi baklawurliqni Junggoda oqup, andin kéyinki oqushni chet elge chiqip oqughini yaxshi.

Men özümning aldinqi « ‹Pisxologiyelik urush› heqqide omumiy chüshenche» dégen maqaliside [2] özümning néme üchün «Balingizgha toghra köyüng» dégen téma [3] astidiki maqalilirini waqitliq toxtitip turghanliqi heqqide azraq chüshenche Bergen idim. Shuningdin kéyin köpligen qérindashlar manga inkas, xususiy uchur we élxet yézip, mendin bala terbiyisi heqqidiki maqalilerni toxtitip qoymasliqni telep qildi. Men mushu pursettin paydilinip, bu ishqa köngül bölgen, we semimiy sözliri bilen manga medet bergen barliq qérindashlargha chin könglümdin rehmet éytimen. Méning bala terbiyisi heqqidiki témilargha nisbeten héliqidek xulasige kélip qélishimgha sewebchi bolghan nerse ulargha chüshken inkaslarning sanining azliqi emes — Men yurttikilerning bu jehettiki qiyinchiliqlirini xéli yaxshi chüshinimen. Méning héliqidek oylap qélishimgha seweb bolghan nerse u maqalilerning chékilish qétim sani idi. Shundaq bolsimu men pisxologiyelik urush heqqidiki témilarni tamamlighandin kéyin, bala terbiyisi heqqidiki témilarni yene dawamlashturimen. Shunglashqa qérindashlarning xatirjem bolushini ümid qilimen.

Paydilinish Matériyalliri:

[1] Bilimxumar: Chet elde oqughan netijilik Uyghurlar

http://bbs.izdinix.com/thread-62355-1-1.html

[2] Bilimxumar: «Pisxologiyelik urush» heqqide omumiy chüshenche

http://bbs.izdinix.com/thread-62459-1-1.html

[3] Bilimxumar: Balingizgha toghra köyüng

http://bbs.izdinix.com/thread-61626-1-1.html

[4] Abdulhemid Qaraxan

https://www.facebook.com/abdulhamitkarahan?fref=photo

Qoshumche (1): Türkiyediki 2015-Yilliq Oqushqa Iltimas Qilish Bashlandi

Töwendiki uchurni Türkiyediki inimiz Abdulhemid Qaraxan [4] teminligen. Abdulhemid ukimiz bilen men 2006-yilidin 2009-yilighiche Türkiyediki heqsiz oqushqa Uyghur oqughuchilarni tallash ishini bille qilghan iduq. Kéyin u özi teshebbus qilip, özi yétekchilik qilip, we özi bashqa barliq kishilerge qarighanda qattiqraq ishlep, Türkiyediki Uyghur Akadémiyisini qurup chiqti, hemde uninggha nechche yil re’is bolup ishlidi. Kéyin u Türkiyediki bir muhim idarige ishqa orunlashti. Bu inimiz Uyghur oqughuchilarning Türkiyege bérip heqsiz oqush ishigha izchil türde küch chiqirip kelgen bolup, bu yolda nurghun japaliq ishlarni qildi, hemde shundaq qilishni hazirmu dawamlashturuwatidu. Men kéyinche bu ukimiznimu buningdin tepsiliyrek tonushturimen.

Töwendikisi Abdulhemid ukimiz teminligen resmiy uchur.

Türkiyediki 2015-yilliq magistirliq we doktorluq oqush mukapat puligha iltimas qilish 2015-yili 2-ayning 25-küni resmiy bashlandi.

Türkiye bash ménistirlikige qarashliq tashqi Türkler we qérindash milletler bashqarmisi www.turkiyeburslari.gov.tr tor bétide bildürüshiche, 2015-yilliq magistirliq we doktorluq oqush mukapatigha iltimas qilish 25-Féwral bashlinip, 31-Mart küni Türkiye waqti kech sa’et 24:00 te axirlishidu.

Bu oqush mukapati töwendikilerni öz ichige alidu:

--Magistirliq oqush mukapati bir ayda 850 lira (texminen 343 dollar)

--Doktorluq oqush mukapati bir ayda 1200 lira (texminen 485 dollar)

--Bir yil Türkche til terbiyilesh kursida heqsiz oqush

--Heqsiz oqughuchilar yatiqi

--Türkiyege tunji qétimqi kélish we oqush püttürgendiki qaytish ayropilan béletliri

--Salametlik sughurtisi

Eskertish: Türkiye oqush mukapatigha érishken oqughuchilar tamaq we turmush xirajiti üchünla dölettin bergen ayliq oqush mukapatini xejleydu, bashqa oqush puli, yataq puli, dawalinish rasxoti dégendek chiqimlarning hemmisini Türkiye hökümiti kötüridu.

Türkiyediki bir ishchining bir ayliq eng töwen ma’ashi 949 lira bolup, yuqiriqi magistirliq we doktorluq oqush mukapati Türkiyening shara’itigha sélishturghanda xéli yaxshi pul bolup hésablinidu. Shunga bu oqush mukapatigha érishken oqughuchilarning ata-anisi xatirjem halda ballirini Türkiyege ewetse bolidu.

Türkiye oqush mukapati heqqidiki tepsiliy uchur töwendiki tor betliride bar:

www.turkiyeburslari.gov.tr

http://www.turkiyeburslari.gov.tr/index.php/tr/haberler/720-2015-turkiye-burslari-basvurulari-basliyor

Bu oqushqa qiziqidighan weten ichi we sirtidiki Uyghur oqughuchilarning waqitni ching tutup, kéreklik matériyallarni toluq teyyarlap, derhal iltimas qilishini ümid qilimiz, we Türkiye döletlik oqush mukapatigha ériship, Türkiyege kélip oqushigha tilekdashliq bildürimiz.

Oqughuchilarning Türkiye oqush mukapatigha iltimas qilishtin burun, töwendiki uchurni tepsiliy körüp chiqishini alahide tewsiye qilimiz.

2015-yilliq Türkiye magistirliq we doktorluq oqush mukapati heqqide:

http://www.mengutas.com/chetel/?p=2899

Qoshumche (2):

Italiye Camérino unwérsitéti 2015-yilliq fizika kespi magistirliq programmisigha oqughuchi qubul qilish uchuri:

http://bbs.izdinix.com/thread-62568-1-1.html

Qoshumche (3): Doktur Ghappar Pettar Élan Qilghan Ilmiy Maqalilerning Tizimliki

Doktor Ghappar Pettar hazirghiche köpligen ilmiy maqalilerni élan qilghan bolup, töwendikisi uning «bahalighuchi mutexessisler» ning testiqidin ötüp, xelq’ara ilmiy maqale zhurnallirigha bésilghan 15 parche ilmiy maqalisining tizimliki.

Selected 15 Peer-Reviewed Original Research Articles (* Corresponding author)

[1]Pataer A, Fang B, Yu R, Kagawa S, Hunt KK, McDonnell TJ, Roth JA, Swisher SG. Adenoviral Bak overexpression mediates caspase-dependent tumor killing. Cancer Res 60(4):788-792, 2000.

[2] Pataer A, Vorburger SA, Barber GN, Chada S, Mhashilkar AM, Zou-Yang H, Stewart AL, Balachandran S, Roth JA, Hunt KK, Swisher SG. Adenoviral transfer of the melanoma differentiation-associated gene 7 (mda7) induces apoptosis of lung cancer cells via up-regulation of the double-stranded RNA-dependent protein kinase (PKR). Cancer Res 62(8):2239-2243, 2002.

[3] Pataer A, Chada S, Hunt KK, Roth JA, Swisher SG. Adenoviral melanoma differentiation-associated gene 7 induces apoptosis in lung cancer cells through mitochondrial permeability transition-independent cytochrome c release. J Thorac Cardiovasc Surg 125(6):1328-1335, 2003.

[4] *Pataer A, Vorburger SA, Chada S, Balachandran S, Barber GN, Roth JA, Hunt KK, Swisher SG. Melanoma differentiation-associated gene-7 protein physically associates with the double-stranded RNA-activated protein kinase PKR. Mol Ther 11(5):717-723, 2005.

[5] Pataer A, Fanale MA, Roth JA, Swisher SG, Hunt KK. Induction of apoptosis in human lung cancer cells following treatment with amifostine and an adenoviral vector containing wild-type p53. Cancer Gene Ther 13(8):806-814, 2006.

[6] *Pataer A, Bocangel D, Chada S, Roth JA, Hunt KK, Swisher SG. Enhancement of adenoviral MDA-7-mediated cell killing in human lung cancer cells by geldanamycin and its 17-allyl- amino-17-demethoxy analogue. Cancer Gene Ther 14(1):12-18, 2007.

[7] *Pataer A, Hu W, Xiaolin L, Chada S, Roth JA, Hunt KK, Swisher SG. Adenoviral endoplasmic reticulum-targeted mda-7/interleukin-24 vector enhances human cancer cell killing. Mol Cancer Ther 7(8):2528-2535, 2008.

[8] *Pataer A, Swisher SG, Roth JA, Logothetis CJ, Corn PG. Inhibition of RNA-dependent protein kinase (PKR) leads to cancer cell death and increases chemosensitivity. Cancer Biol Ther 8(3):245-52, 2009.

[9] *Pataer A, Raso MG, Correa AM, Behrens C, Tsuta K, Solis L, Fang B, Roth JA, Wistuba II, Swisher SG. Prognostic significance of RNA-dependent protein kinase on non-small cell lung cancer patients. Clin Cancer Res 16(22):5522-8, 2010.

[10] *He Y, Correa AM, Raso MG, Hofstetter WL, Fang B, Behrens C, Roth JA, Zhou Y, Yu L, Wistuba II, Swisher SG, Pataer A. The Role of PKR/eIF2a Signaling Pathway in Prognosis of Non-Small Cell Lung Cancer. PLoS One 6(11):e24855, 2011.

[11] *Pataer A, Kalhor N, Correa AM, Raso MG, Erasmus JJ, Kim ES, Behrens C, Lee JJ, Roth JA, Stewart DJ, Vaporciyan AA, Wistuba II, Swisher SG, University of Texas M. D. Anderson Lung Cancer Collaborative Research Group. Histopathologic response criteria predict survival of patients with resected lung cancer after neoadjuvant chemotherapy. J Thorac Oncol 7(5):825-32, 2012.

[12] William WN, Pataer A, Kalhor N, Correa AM, Rice DC, Wistuba II, Heymach J, Lee JJ, Kim ES, Munden R, Gold KA, Papadimitrakopoulou V, Swisher SG, Erasmus JJ, University of Texas M.D. Anderson Lung Cancer Collaborative Research Group. Computed tomography RECIST assessment of histopathologic response and prediction of survival in patients with resectable non-small-cell lung cancer after neoadjuvant chemotherapy. J Thorac Oncol 8(2):222-8, 2013.

[13] *Guo C, Shao R, Correa AM, Behrens C, Johnson FM, Raso MG, Prudkin L, Solis LM, Nunez MI, Fang B, Roth JA, Wistuba II, Swisher SG, Lin T, Pataer A. Prognostic Significance of Combinations of RNA-Dependent Protein Kinase and EphA2 Biomarkers for NSCLC. J Thorac Oncol 8(3):301-308, 2013.

[14] Hellmann MD, Chaft JE, William WN, Rusch V, Pisters KM, Kalhor N, Pataer A, Travis WD, Swisher SG, Kris MG, University of Texas MD Anderson Lung Cancer Collaborative Group. Pathological response after neoadjuvant chemotherapy in resectable non-small-cell lung cancers: proposal for the use of major pathological response as a surrogate endpoint. Lancet Oncol 15(1):e42-50, 2014.

[15] *Guo C, Hao CC, Shao R, Correa AM, Behrens C, Fang B, Roth JA, Wistuba II, Swisher SG, Pataer A. RNA-dependent protein kinase (PKR) depletes nutrients, inducing phosphorylation of AMP-activated kinase in lung cancer. Oncotarget: In press, 2015.

Bu maqalini héchkimdin sorimay, menbesini bergen asasta bashqa her qandaq torgha chiqarsingiz, yaki élkitabqa oxshash bashqa her qandaq shekilde ishletsingiz boluwéridu. Bu maqale barliq uyghurlargha mensup.

Wheelchair