Erkin Sidiq: Saturnning 2 Hemrahining Yéngi Resimi

Erkin Sidiq

2015-yili 12-ayning 17-küni

Kona yéziq nusxisi:

http://bbs.izdinix.com/thread-65926-1-1.html

http://bbs.bagdax.cn/thread-40804-1-1.html

http://bbs.misranim.com/thread-145722-1-1.html

http://bbs.bozqir.com.cn/forum.php?mod=viewthread&tid=8433

NASAning «Cassini» namliq alem uchquri quyash sistémisidiki 6-planéta Saturnni tekshüriwatqili 10 yildin ashti. U bu yil 24-Sintebirde tartqan bir parche resimge Saturnning ikki hemrahi birsining aldigha yene birsi tizilghan halette chüshken bolup, NASA u resimni ikki künning aldida dunyagha tarqatti [1]. Töwendiki 1-resim NASA tarqatqan yéngi resim shu. Saturnning u 2 hemrahi In’glizche «Enceladus» we «Tethys» dep atilidighan bolup, men ularning Uyghurche atilishini bilmigechke, hazirche ularni «Énsiladus» we «Tésis» dep atap turimen.

zb1

1-resim: Quyash sistémisidiki 6-planéta Saturnning In’glizche «Enceladus» we «Tethys» dep atilidighan 2 hemrahining bu yil 24-Sintebirde tartilghan bir körünishi. Men bu Saturn hemrahlirining Uyghurche atilishini bilmigechke, hazirche «Énsiladus» we «Tésis» dep atap turimen.

Yuqiridiki resim alem uchquri Énsiladustin 2.1 milyon kilométir, Tésistin bolsa 2.6 milyon kilométir yiraqliqta waqtida tartilghan. Yeni, mezkur resimge tartilghan waqitta u 2 hemrahning ariliqi 500000 kilométir iken.

Énsiladusning di’amétiri 500 kilométir bolup [2], Tésisning di’amétiri bolsa 1069 kilométir [3] kélidu (Ay sharining di’amétiri 3474 kilométir).

zb2

2-resim: Saturnning hemrahi Énsiladus.

zb3

3-Resim: Saturnning hemrahi Tésis.

«Cassini» alem uchquri 1997-yili alem boshluqigha chiqirilghan bolup, u Saturnning orbitisige 2004-yili 1-Iyulda kirgen [4]. Uning xirajetlirini Italiye alem idarisi, Yawropa alem idarisi we NASA birlikte chiqarghan bolup, uni NASA merkizi J P L (JPL, Jet Propulsion Laboratory) bashquridu.

zb4

4-resim: «Cassini» alem uchqurining sizilghan resimi (bizning idaride uning bir modéli bar bolup, u modélning chong-kichikliki eslidiki alem uchquri bilen opmu-oxshash. Men uning resimini kéyinche yollap qoyimen).

zb5

5-resim: Quyash sistémisidiki 8 planéta.

Paydilinish Matériyalliri:

[1] Saturn Moons Enceladus And Tethys Pose In Near-Perfect Alignment

http://www.techtimes.com/articles/116391/20151215/saturn-moons-enceladus-and-tethys-pose-in-near-perfect-alignment.htm

[2] https://en.wikipedia.org/wiki/Enceladus

[3] https://en.wikipedia.org/wiki/Tethys_(moon)

[4] https://en.wikipedia.org/wiki/Cassini-Huygens

Bu maqalini héchkimdin sorimay, menbesini bergen asasta bashqa her qandaq torgha chiqarsingiz, yaki élkitabqa oxshash bashqa her qandaq shekilde ishletsingiz boluwéridu. Bu maqale barliq Uyghurlargha mensup.