Erkin Sidiq

2016-yili 2-ayning 24-küni

Kona yéziq nusxisi:

http://bbs.bagdax.cn/thread-45281-1-1.html

http://bbs.bozqir.com.cn/forum.php?mod=viewthread&tid=8857

Köpligen qérindashlarning xewiride bolghinidek, hazir bir qanche Uyghurche tor munberliride Abduweli Ayup ukimizning «Türkiyide yaki Misirda» qatarliq bir qanche parche maqaliliri üstide bes-munaziriler élip bériliwatidu.  Özümning közitishiche bu bes-munaziriler asasiy jehettin saghlam méngiwatqan bolup, uning öz-özimizni terbiyilep, munasiwetlik mesililer üstidiki chüshenchilirimizni toghrilash we chongqurlashturushtiki ehmiyiti nahayitimu chong.  Méningche imkaniyet yar bergende mushuninggha oxshash «paranglishish» yaki pikir-almashturush ishlirining dawamliq bolup turghini millet éngidiki yüksilishni ilgiri sürüshke nahayitimu paydiliq bolup, men aldi bilen bir qanche parche nadir témilarni yézip, bu qétimqi pikirlishish jeryanining wujutqa kélishige sewebchi bolghan Abduweli ukimizgha chin könglümdin rehmet éytimen.

 

Töwende men bu qétimqi munazire üstide oylighanlirimni qisqiche bayan qilip ötimen.

 

(1)Méning mölcherlishimche, yéqinqi 25 yilning mabeynide chet elge chiqip, melum seweblerdin oqumighan, oquyalmighan, yaki oqushni xalimighan qérindashlarning sani bilen, wetende anche tirishmay, we oqushqa azraqmu intilmey yashawatqan kishilirimizning sani hazir Misir we Erebistan qatarliq Musulman döletliride din öginiwatqan ukilarning sanidin nahayitimu köp.  Milletke bolghan paydisi nuqtisidin élip éytqanda, din öginiwatqan ukilar chet elge chiqip zadila oqumighan qérindashlar bilen wetende öginishke intilmey yashawatqan qérindashlardin yaxshiraq orunda turidu.  Shunglashqa mushundaq bir nuqtidin élip éytqanda, biz dinda oquwatqan ukilarning öginish iradisini qollishimiz, ularning rohini asrishimiz we qedirlishimiz, we ular hasil qilghan ilgirileshlerni medhiylishimiz kérek.

 

(2) On nechche milyon nopusqa ige bir Musulman xelq kishiliri ichidiki 3000 – 4000 kishi dinda oqusa, u hergizmu artuqchiliq qilmaydu.  Xuddi bezi tordashlar otturigha qoyghinidek, bu yerde oqughan bilimni özi üchün xizmet qilduramdu, yaki öz xelqi we Allahning dini üchün xizmet qilduramdu, dégen mesile mewjut.  Hazir chet elde din öginiwatqan ukilarning bir qismi choqum 1-yolni tallap, yene bir qismi bolsa choqum 2-yolni tallaydu.  Uningdin bashqa 3-yolmu bar.  U bolsimu heqiqi Islamgha mas kelmeydighan, siyasiy meqset üchün berpa qilin’ghan, we dunya qobul qilalmaydighan yene bir yoldin ibaret.  Bezi tordashlar chet elde dinda oquwatqan ukilardin bezilirining ashundaq 3-yolgha kirip kétishidin endishe qiliwétiptu.  Méningche ashundaq endishiningmu melum asasi bar.  Emma, endishige asaslinip turup chet elde din öginiwatqan ukilar üstidin yekün chiqirish méningche muwapiq emes, ilmiyliqqa we Islamning teleplirige mas kélidighan ishmu emes.  Insanlarning mutleq köp qismi yaritilghanda yaxshi adem qilip yaritilghan.  Yeni, insanlarning tebi’iy haliti (default status) «yaxshi insan» liqtin ibaret.  Shunglashqa biz hazir chet elde din öginiwatqan ukilarning köpünchisige ishineyli.  Shuning bilen bille, eger ularning bir qismi 3-yolni tallaydiken, u milletke nahayiti éghir ziyanlarni élip kélidighanliqinimu dawamliq tekitlep turayli. 

 

(3) Men hazirghiche torlarda élan qilghan yazmilirimning bir qismida din oqush bilen pen oqushni birleshtürüshning, we sherqte oqush bilen gherbte oqushni birleshtürüshning zörürlükini, uning hazirqi zamanda dindin toghra we toluq paydilinishning bir kem bolsa bolmaydighan sherti ikenlikini köp tekitlidim.  Men ashu nuqtining toghriliqini barghanséri chongqur hés qiliwatimen.  Shunglashqa men yuqiridiki 2-yolni tallimaqchi bolghan ukilardin bu tewsiyige intayin estayidil mu’amile qilishni ümid qilimen. Emeliyette bezi ukilar bu tewsiyige estayidil mu’amile qilip, burun oquwatqan dölettin yéngi döletke yötkeldi.  Yene bezi ukilar bolsa doktor Yasir Qazi we «Oyghan» achqan mekteplerde oqush iradisige kélip, mendin ashu mekteplerning teleplirini oqup bérishni iltimas qildi.  Tekshürüsh netijiside, men ularning mektipi derslerni peqet Shenbe we Yekshenbe künlirila ötidighanliqini (yeni, ularning dersliri Amérikidiki pütün künlük xizmiti bar kishiler üchün lahiyilen’genlikini), yaki bolmisa bir yil ichide 9 ayliq kurus achidighanliqini, hemde hazirche resmiy baklawér yaki magistirliq unwanlirini bérelmeydighanliqini éniqlap chiqtim.  Yeni, bu ikki ependining mektepliri hazirche pütün kün oquydighan chet ellik oqughuchilarni qobul qilalmaydiken.  Bashqiche qilip éytqanda, ular chet ellik oqughuchilargha wiza chiqirip bérelmeydiken.  Emma, Amérikidiki bashqa 10 dek dangliq aliy mektepler «Islam tetqiqati» kespide magistirliq we doktorluq unwani béridiken.  Yeni siz baklawérliqni bashqa yerde tamamlap, Islam tetqiqati kespidiki magistirliq we doktorluqni ashu mekteplerde oquyalaydikensiz.  Méningche Uyghur millitining ashundaq mekteplerde oqughan 5 – 10 dek ziyaliylargha küchlük éhtiyaji bar.  Men bir qisim ukilarning ashundaq bir ghaye üchün tirishishini ümid qilimen.

 

Méning öz izdinishim arqiliq hazirghiche hés qilghinim, yuqiridiki 2-yolni tallaydighan ukilar gherb elliridin birerside Islam dinini oqumighan teqdirdimu, pelsepe, xelq’ara diniy tarix, insanshunasliq, xelq’ara siyaset, pisxologiye, xelq’ara qanun qatarliqlardin kem dégende birsini, hemde tebi’iy-pendin birsini oqusa, özi tallighan yoldiki xizmetlerni hazirqi zaman’gha maslashturup téximu yaxshi ishliyeleydu.

 

Men özümning yéqinqi bir yazmisida, doktor Yasir Qazining mundaq bir oxshitishini tilgha aldim:  Jinlar nur tézlikide mangidu, hemde insanlargha bezide körünüp, bezide körünmeydu.  Jinlarning mushundaq xususiyiti nurning xususiyiti bilen oxshash bolup, ular ottin yaritilghanliqi, hemde otmu nurgha tewe bolghanliqi üchün, jinlar bezide körünidighan nurgha, yene bezide bolsa körünmeydighan nurgha özgireleydu. 

 

Yéqinda men «tartish küchi dolquni» heqqide bir parche qisqa yazma teyyarlap munberlerge yollidim.  Tartish küchi dolqunining bir xususiyiti, u nur ötelmeydighan bir qisim nersilerdin buzulmay öteleydu.  Umu nur tézliki bilen mangidu.  Méning yazmamni oqughan bir tordishimiz «Undaqta jinlar tartish küchi dolqunigha oxshaydiken», dep inkas qayturuptu.  Peqet dindila oqughan, tebi’iy-pende azraqmu oqup baqmighan kishilerning yuqiriqidek tepekkur qilalishi, Qur’andiki mezmunlarni yuqiriqidek chüshinelishi mumkin emes.

 

(4) Men bu yerde hazir Misir yaki bashqa bir Musulman dölitide din öginiwatqan we ishlewatqan qérindash-ukilarning ülgilik roli we Musulmanliq orni heqqide qisqiche toxtilimen.  Eng aldi bilen hemmeylenning ésige sélip qoyidighinim, hazir Uyghurlar arisida birer «omumiy xelq bahalishi» yaki «omumiy xelq qarar maqullishi» élip bériliwatqan ish yoq.  Abduweli ukimiz peqet özining «dinni Misirda oqughan’gha qarighanda Türkiyide oqughan yaxshiraq» dégen’ge yéqin kélidighan bir köz-qarishini ispatliri bilen otturigha qoyghan bolup, uni xalighan ukilar bir tewsiye süpitide qobul qilidu.  Qalghanlar bolsa uninggha perwa qilmay, öz yolida méngiwéridu.  Bu hergizmu bir mejburlinidighan yaki qanuniy jawabkarliqi emelge ashurilidighan ish emes.  Aldi bilen hemmimiz birsining idiyisi yaki teshebbusigha «bashqilarning oxshimighan pikirige ilmiy mu’amile qilish» puzitsiyide mu’amile qilishqa kapaletlik qilayli.  Bashqilarning shexsiyitini chishlep tartish we bashqilarning niyitige baha bérishtin saqlinayli.  Uninggha bir chong qarar élish jeryanigha mu’amile qilghandek puzitsiye tutushtin téximu saqlinayli.

 

Qur’anda Musulmanlar bir-birige qandaq mu’amilide bolushi kérekliki, we gheyri-Musulmanlargha qandaq mu’amile qilishi kérekliki heqqide éniq mezmunlar bar bolup, men ashu mesile üstide özümning kéyinki yazmilirida azraq toxtilimen.  Bu yerde Oyghanning bir léksiyisidiki munasiwetlik mezmunlarni qisqiche tonushturup ötimen.  U léksiyining témisi «Yaxshi emellerning qimmitini töwen mölcherlimeng» bolup, uning Yutyub sin höjjiti 2015-yili 5-Mayda intérnétke qoyulghan iken.  Oyghan mezkur léksiyide Süre Beqer (2-süre) diki ikki ayetni chüshendüridighan bolup, u ayetler mundaq:

 

«Ular (yeni Yehudiylar) ilgiri musadin soal sorighandek, silermu peyghembiringlardin soal sorimaqchi bolamsiler? Kimki imanini kufrigha tégishse, u heqiqeten toghra yoldin azghan bolidu [108]. Ehli kitab ichidiki nurghun kishiler özlirige heqiqet (yeni dininglarning heqliqi) ashkara bolghandin kéyin, heset qilish yüzisidin silerni imaninglardin qayturup kapir qilishni arzu qilidu. Allahning emri kelgen'ge qeder (yeni Allh silerge ular bilen urush qilishqa ruxset qilghuche) ularni epu qilinglar we kechürünglar. Allah heqiqeten her nersige qadirdur [109]. »

 

Töwendikisi Oyghanning yuqiridiki ayet heqqide dégenliri:

 

Bu ayetler Medinide nazil bolghan.  Qur’andiki her bir ayetni chüshinishte, u ayetning Qur’andiki orni intayin muhim rol oynaydu.  Bu 2 ayetni toghra chüshinish üchün, uning aldida némiler dep bolun’ghanliqigha alahide diqqet qilish kérek.  Eyni waqitta Medinidiki nurghun kishiler peyghember eleyhissalamgha egiship, Musulman bolushqa bashlaydu.  Shuning bilen Medinediki Yehudilarning diniy ölimaliri qattiq alaqzade bolup, peyghember eleyhissalamgha heset qilip, u kishilerni öz yénigha qayturup kelmekchi bolidu.  Allah bu ehwalgha qarita «Musulmanlarning imani muqim bolup, uni héch kim yanduralmaydu», deydu.  Bu sözning menisi «eger sizning imaningiz pütün bolsa, uni héch kim tewritelmeydu;  eger bir ademning imani tewrigen bolsa, uning imani eslide pütün emeslikidin bolghan; imani pütün ademning imanini héch kim tewritelmeydu», dégendin ibaret.  Démek, mesile hergizmu sirttin kelmeydu – Eger imaningiz toluq bolidiken, sizning étiqadingizni bir adem sirttin tewritelmeydu.  Eger imaningiz tewrigen bolsa, u peqet ichkiy sewebtin shundaq bolidu. 

 

Emdi hazirqi zaman’gha qarap baqayli.  Hazir dunyada Islamgha qarshi teshwiqatlar nahayiti köp we nahayiti küchlük halda élip bériliwatidu.  Islamgha qarshi teshwiqat élip bériwatqanlarning nurghunliri Islamni chüshenmey emes, belki uninggha heset qilip shundaq qiliwatidu.  Shunglashqa ulargha Islamni chüshendürüshning héch bir hajiti yoq.  Ulargha Islamni chüshendürüshning héch bir qimmiti yoq.  Buninggha qarita köpligen Musulmanlar yashlar bir xil endishe ichige kirip qélip, uninggha qarita bir ish élip bérishqa uruniwatidu.  Hemde ular bezide xata ishlar bilen shughulliniwatidu.  Allah Qur’anda közde tutqan din düshmenliri peyghember eleyhissalamgha biwaste qarshi chiqiwatqan kishiler.  Bizning hazirqi dewrimizde mewjut bolup turuwatqanlarning bir qismi bolsa Islamning heq din ikenlikini bilidighan, shundaqtimu dinimizgha heset qilip, uninggha qarshi ish-heriketler bilen shughulliniwatqanlar. 

 

Undaqta biz ulargha qarita qandaq mu’amilide bolishimiz kérek?  Bu heqtimu yuqiridiki ayette éniq telim bérilgen.  Yeni, Allah mundaq deydu: «Ularni untulup kétinglar, ularni epu qilinglar, depterni bir waraq örünglar, bu ishta birer mesile yoq, uninggha pisent qilmanglar, u ishlar étibar bérishke erzimeydu, ular néme dise dewersun, Allah özi qarar bergiche ashundaq yol tutunglar.»  Bu gepler méning gépim emes, u Allahning gépi. 

 

Bezi yashlar «Ularning puli intayin köp, ular intayin küchlük, shulargha tayinip dinimizgha shiddetlik hujum qiliwatidu», deydu.  Bundaq ehwalgha qarita Allah mundaq deydu:  «Ularning küchidin ensirep ketmenglar, Allah hemmige qadir, Allah hemmini kontrol qilip turidu.»  Bu yerde Allah din düshmenlirining küchini we pilanini töwen mölcherlewatqini yoq.  Allahning undaq ehwallardin toluq xewiri bar.  Emma Allah bu yerde bizge ashundaq ehwallargha qarita qandaq inkas qayturushimiz kéreklikini dep bériwatidu.  Siz chidamliq bolushingiz kérek.  Siz zéhningizni téximu muhim ishlargha qaritishingiz kérek. 

 

Oyghanning léksiyisidiki men bu qétim tonushturmaqchi bolghan mezmun mushu yerde axirlashti.

 

Men dinimizni öginish jeryanida muqeddes kitabta güzel nersilerning intayin köp ikenlikini körüwatimen.  Yuqiridikisi ene shundaq mezmunlarning biri.  Emma, öz emeliyitimizde undaq güzel nersilerni unchiwala köp uchratqili bolmaydiken.  Bezide öz-özümdin «Bizning kishilirimiz qaysi kitabni oquwatqandu?  Uni némishqa oquwatqandu?» dep sorap qoyimen.

 

Yuqiridiki din düshmenlirige qandaq mu’amile qilish kérekliki toghrisidiki mezmun hazir dawamlishiwatqan munazirige eynen mas kelmeydu.  Emma méning oylighinim, Allah Musulmanlardin din düshmenlirige yuqiriqidek keng-qorsaqliq qilishni telep qiliwatsa, bizning bir-birimizge hazirqidek qilip kétishimiz toghrimu?  Biz zadi némini talishiwatimiz?  Bundaq talishish kimge paydiliq?  Kimge ziyanliq?

 

(5) Men öz yazmilirimda chet eldiki oqughan qérindashlardin bilimning zakitini bérishni köp qétim iltimas qildim.  Ularni «Netijilik Uyghurlar» dégen téma astida tonushturup, ularning ish-izliri arqiliq wetendiki yashlarni righbetlendürüsh we ulargha toghra yol körsitip bérishning ehmiyiti we qimmiti heqqide özüm oyliyalighan geplerning hemmisini qilip boldum.  Emma, méning u chaqiriq we tekliplirim özüm ümid qilghandek netije bermidi.  «Netijilik Uyghurlar» bolushqa sherti toshidighan nechche ming kishi ichidin hazirghiche aran 51 nepirini tonushturush imkaniyitige érishtim.  Ularning ichidiki hazir wetendiki Uyghurche torlargha maqale yollawatqan kishilerdin qanchisi bar, bu hemmeylen’ge nahayitimu ayding. 

 

Abduweli ukimiz hazir chet elde turiwatidu.  Uning turmushi anche xatirjemmu emes—Uning téxi birer muqim xizmitimu yoq.  Ashundaq turupmu, u özining barliqini atap, Uyghurlar üchün xizmet qilishqa tirishiwatidu.  Uningdek yashash intayin küchlük wijdan we milliy ang, intayin küchlük insap, we intayin küchlük milliy mejburiyet héssiyati qatarliqlarni telep qilidighan bolup, arimizda ulargha teng ige bolghan kishiler anche köp emes.  U qiliwatqan ishlarning beziliri yüzde-yüz toghra bolmasliqi mumkin, emma u din düshmenliridin sélishturghili bolmaydighan derijide üstün turidu.  U biz üchün tolimu eziz.  Melum menidin élip éytqanda, Abduweli ukimiz millet üchün bir qimmetlik bayliq. Shunglashqa uninggha köyineyli.  Uni asirayli. Uni qedirleyli.  Eger u bezi ishlarni toghra qilalmighan bolsa, uni öz sepimiz ichidiki bir eza qatarida körüp, uninggha yardem qilayli.  Uni nabut qilip qoyushtin qet’iy saqlinayli.

 

Oyghanning yene bir léksiyide déyishiche, kibirlik kishiler üchün jennetning éshiki yépiq iken.  Siz zadi némini talishiwatisiz?  Men hazir Abduweli Ayop maqalisi heqqidiki munazirige qatniship, pakitsiz we ilmiysiz pikirlerni otturigha qoyuwatqan qérindashlardin «Men zadi némini talishiwatimen?  Men qaysi meqsetke yetmekchi?» dep öz-özidin sorap, estayidil oylinip béqishini ümid qilimen.

 

 

Paydilinish Matériyalliri:

 

[1] Never underestimate any good deeds

https://www.youtube.com/watch?v=WdCFsDiaXHE

 

= ============================================================= =

 

Mezkur Maqalige Chushken Inkaslardin Tallanmilar:

 

Bilimxumar aka,rexmet  sizge!abduweli muellim üchün yazghan bu yazmingizning bashqilarghimu tesir qilishini ümüt qilimen.

= = =

alim digen haman alim

toghra yolni körer daim

azghanlargha mesh'el yéqip

qarngghuda yanar daim

 

Rehmet erkinka qimmetlik yazmingiz uchun teshekkur

doslar  biz mu obiyktip pikir qilishni  ügineyli

= = =

yaxshi téma ,'erkinkamgha rexmet , qéridashlérim pakit bilen sözleyli , mushu anglighanni sözleydighan , bergen tesir bilen höküm qilishtin yiraq tursaq. Ishenchilik asasqa ige emes sözler bilen hisyatchan yashlarni qaymuqturmayli . Téma yazghuchilar erkinkamdin ögensek ,'addi sörlerni ishiltip chongqur mezmunni ipadilesh . Pakitléri toluq ,qayil qilarliq !

= = =

essalamu eleykum ,'erkinka , bu timingiz ajayip qayil qilarliq boluptu ,'alla sizge xatirjemlik ata qilsun .

Kokboraa

= = =

 erkin ependining maqalisidiki salmaq pikirlerni qobul qilishmu ademdin melum sapa telep qilsa kérek. Maqalining axiridiki éytilghan söz bek toghra éytilghan biz talishiwatqan ashu mesililer zadi biz üchün bir payda élip kélemdu yoq?!

Tenha_roh

= = =

menmu nechche waqittin biri dey dep likin uz qarashlirimini qandaq ipadileshini bilelmey yürgentim mana emdi erkinkamning bu yazmisini oqup hardughum chiqqandek boldi .

Ali508

= = =

öz xelqini yad etken we xelqi üchün yaxshi ish qilghanlar elning duasi bilen kökleydu .   Qolingizgha derit kelmisun erkinka !

= = =

hélimu   sizde  aqil   kishlirmiz  bop  qaptiken  erkinka .,

bolmisa  qachan'ghuche  bashsiz  yilandek  tipirlap   yüre  bolghiytuq  .,.

= = =

méningche - allahni tonush üchün bir yil ketmeydu, biraq allahni tonutush üchün bir ömür yetmeydu.

 

Allahni tonush üchün ilim riyaziti chékiwatqan qérindashlirimizning oqushigha berket tiligülük.

 

Mesile- allahni tonutush üchün ilim riyazitini ixtiyar qilghan qérindashlirimiz üchün elwette eminlik tiligülük.biraq bizning ular heqqide bilish chüshinish righbet we rial hadisler heqqide pikirlishish, yéteklesh-yéteklinish mes'uliyetlirimiz bar (ulargha zor ümüd baghlan'ghachqila <<omaq xataliq>>lar körülidu)

bahane sewepni qoligha éliwalghan eskerning teqdiri teslim bolushtur.

Qanun-intizamliq halda kishiler éngidiki tarixi tusalghularni kishiler bileleydighan eng yénik til bilen ipade qilip rohiyettiki dashqallarni tazilash, shu arqiliq ilim -pen qizghinliqi dolquni yaritish qanun'gha xilap emes, ‹‹derya kechmigüche chongqurliqigha bir nime dep bolmas››,

 

Alim bilimxumar ependining xelq'aradiki, bir qisim islam  teshebbuschilirining ilghar sherhilirini we qarashlirini teklimakanning burjeklirige qeder yetküzüshke tirishchanliq körsitishi bahane sewepni qolgha éliwalghanlar üchün rushen sélishturma bolalishi mumkin....

 

Tenqidni qubul qilish -peqet aqillarghila xas nésiwe bolup shunga u-chinliqning jéni .

Biz nimini maxtisaq shuning heqiqet bolishi natayin, chünki-heqiqet maxtashqa hajet emes. Aqillar we özini aqil chaghlaydighanlar tenqid-we teklip immunitige muhebbet bilen qarimaydiken u choqum ghapiliq böshigide menggu uxlighuchi.

Emiliyiti bolmighan ishlarning ademni charchitip qoymishi tebii.

 

<<öz kespidin halqip maqala yazdi.....dini mehiyetlik timilarni mupessel igiliri yazsun.......>> digendimu-<<kéche uzun bolsa chüshmu uzun bolidu, qelemni heq igisi mendin tapshurup alghuche addi izden'güchi süpitimde mes'uliyitimni ada qilishqa tirishchanliq körsitimen>> dep qimmetlik waxtini ilghar dini teshebbuslargha, insaniyetning yuquri ilm-pen sahesi üchün shexsiyetsiz teqdim étip kéliwatqan alimimizgha we alimlirimizning nuridin nur alghan izdinishchan, ot yuüreklirimizge uzun ömür tileymen.

Lawa0998

= = =

heqiqeten ésil maqale boptu. Erkin sidiq we abduweli ayupqa oxshash nezer dairisi keng, yiraqni körer kishilirimizning téximu köplep chiqishini arzu qilimen

= = =

tima ‍igsi harmighaysiz , changqighan yüreklerni daim pasahetlik ,chüshnüshlük yazmillirngiz ‍arqiliq sughurup turshingizni ümüd qilimen !

= = =

essalamu eleykom erkin sidiq aka  ,japa chektingiz .

"tekshürüp -tetqiq qilmighan kishning pikir bayan qilish hoquqi yoq " digendek  yqindin biri gülen ependinng maqalilirigha bezi bir selbi mezmundiki inkaslar boldi ,'ijabi inkaslarmu küp boldi ,yighip iytqanda xelqmizge bashtin axir  shexsiyetsiz ,semimi  pozitsiye bilen  keng oqurmenni menpeetlendurup keldi (buning ichide elwette sizmu bar),dimekichi  gülen ependining töhpsi  uning azghine yiterszlikidin herwaqit üstun orunda toridu ,shunga her waqit xelq qelbidiki layaqetlik  ziyali ,husulluq ziyali bolushqa mensup !!!..............

Sizning ushbu maqalngiz bu noxtini yurutup turuptu ,shexsen menmu mushundaq poztsiyede.

Keng oqurmenlerning  inkas yizishtin borun ,'estaydil pozitsye bilen  bizge ilip kelgen ijabi yaxshi terpini  küpirek küzde tutushini ümüd qilmen .

   

Axrida erkin sidiq aka we gülen ustazgha we aile tawabatlirigha allahdin asayshliq tileymen ,bonungdin kiynki shlirining oquqluq bolushni ,qimmetlik maqalilrining üzülüp qalmasliqni ümüd qilmen .

Panidunya

= = =

bilimxumar ustaz yuqarqi yézilghan yazmilar toghrisida bekla etrapliq chüshendürüsh bériptu. Menmu pikirini qollaymen. Kishiler shexsiyitige hujum qilmighan  mushundaq  ilmiy munazirilerning bolghini, bolmighinidin yaxshi. Bizmu munazire arqiliq xéli köp nersilerni biliwaldikenmiz-emesmu!

= = =

essalamu -eleykum erkinka,kemine bigandin sighinip salam!

Abduweli ayub akimizning yazmilirigha nisbeten köz-qarashliringizning mötidil shundaqla chet'ellerde oquwatqan qérindashlirimiz üstide insab bilen pikir qilghanliqingizdin söyündüm .

Harmighaysiz!

= = =

aldinqi qétimliq ötkür munazirilerning ayighi chiqmay ,  taza ikki tam boluwatqanda " bilimxumar " akimizning bir timisi bilen , alla burun talash - tartishqa aylinip ketken munazire  bésiqqan idi .

 

Bu qétimmu bu timingizni taza waxtida yollapsiz , sizge köp rehmet . Toghra yolni körsütüpsiz , sizning birer ishtiki pikiringiz ,  allaqachan pikirlirimizge yitekchilik qilidighan bolup qaldi .

Sizning we ailingizdikilerning tinige salametlik , xizmitingizge alemche netije , xatirjemlik , téximu ötkür tengdashsiz eqil paraset tileymen .

Sawda571

= = =

del waqtida we intayin qayil qilarliq tewsiye boptu bilimxumar aka, buningghimu yene ezweyleydighanlarning meqsiti bashqiche bolushi mumkin.

= = =

hörmetlik ‍erkin sidiq ‍aka sizdiki mes'oliyetchanliq, ‍ilimsöyerlik, ‍estayidilliq, ‍epuchanliq, méhribanliq, ‍izchilliq, kemterlik qatarliq ‍isil peziletliringizge  tolimu qayilmen. Bizge sizdek kishilirimiz tolimu zörör , ‍abduweli muellimning yazmisigha yollan'ghan ‍inkaslardin shunchilik  ‍ichim achchiq bolghan ‍idi...bes- talash  qilghan tordashlarning qismen  achchiq  teniliri heqiqeten ‍artuqche ‍idi. Biz qachan'ghiche kesting qaychilidingdin qutulalmaymiz? Bügün sizning yazmingizni ‍oqup shundaq xosh boldum, xuddi men dey dep diyelmigen köngül sözlirimni körgendek boldum, sizge ‍uzun ‍ömür, salametlik, xatirjemlik, ‍ishliringizgha ‍utuq tileymen! Bayila hebibulla toxti ‍ependimning ‍abduweli muellimning yazmisigha qarita yazghan ‍eskertmiside ‍ipadilen'gen sözlerdiki kichik péilliqtin, ‍öz ‍ara hörmet tuyghusidin, mes'oliyettin söyündüm, bolsa ‍inkas yazghanda hemmeylen mushundaq ‍ilmi bolsaq, ‍öz ‍ara shexsiyitimizge tégidighan dil ‍azari ‍ibarilerdin ‍imkan bar saqlansaq bekmu yaxshi bolatti. Axirida barche ‍izdinish yolida toxtimay tirishiwatqan ‍eziz qérindashlirimgha gheyret jasaret yar bolsun.

Bighubarim

= = =

erkin akimiz mushu tima arqiliq muhakime qilip zidiyetliship qéliwatqan yeni ikki qutupqa bölünüp kitiwatqanlarning arisidiki de-talashlarni yoqutush üchün küch chiqarghanliqidin tolimu söyündüm. Erkin akimizning buningdin kiyinki barliq ishlirigha beriket, tinige salametlik tileymen.    Tima üstide oxshimighan pikirlerde bolup qéliwatqanlarningmu munazire qaidisi buyiche ilmiylik bilen munazire élip bérishini ümid qilimen. Bolupmu öz hisyatimizgha tayinip emes, emeliy pakit we delillirimiz bilen munazire élip bérishimizni ümid qilimen.

= = =

allah rehmet qilsun bilim xumar aka allah  ilmingizni téximu ziyade wemenpeetlik qilip bersun,  bu téma heqiqeten heq üstide adil yéziliptu .

= = =

kitab oqush yilidin bashlan'ghan bir nechche qétimliq keskin munazirilerge sélishturghanda bu munazirining her jehettin ehmiyiti zordek hés qildim

 

= = =

gulen akamgha yaxshi baha berginingizdin bek suyundum bilimxumar aka ...gulenkamgha qanchilik bisim kilwatqanlighini tesewur qilalidim

= = =

Charchap qalghan bolsanglar-köngül araminglarda alimimiz erkin sidiq akimizning 2010-yillardiki uyghur torbetliri bilen ötküzgen söhbetliri bolsun!!!

http://abdurahman38.blog.sohu.com/164854735.html

 

Bu maqalini héchkimdin sorimay, menbesini bergen asasta bashqa her qandaq torgha chiqarsingiz, yaki élkitabqa oxshash bashqa her qandaq shekilde ishletsingiz boluwéridu. Bu maqale barliq Uyghurlargha mensup.

© Copyright 2014 Uyghur Meripet  Torbéti