Rohiy Jehette Küchlük Bolush Usulliri



Elyüksel

2016-yili 5-ayning 6-küni

Kona yéziq nusxisi:

http://bbs.izdinix.com/forum.php?mod=viewthread&tid=67866

http://bbs.bagdax.cn/thread-50534-1-1.html
http://bbs.misranim.com/thread-148049-1-1.html

Aldi bilen barliq qérindashlarning Doppa Bayrimigha mubarek bolsun!

 

Men aldinqi yazmamda dunyagha dangliq karxanichilar zhurnili «Forbis» (Forbes) ning maqale aptori, pisxologiye doxturi, Amérika Meyin Shtati Linkoln (Lincoln, Maine) shehiridiki bir uniwérsitétining pisxologiye oqutquchisi, we «About.com» tor bétining on-nechche yashliq ösmürler terbiyisi mutexessisi Eymi Morin (Amy Morin) xanimning 2014-yili neshr qildurghan «Rohiy jehette küchlük kishiler saqlinidighan 13 ish» dégen kitabining mezmunini qisqiche tonushturghan idim. Eymi xanim 2013-yili Dékabirda «Rohiy jehettiki küchlüklükingizni östürüshning 5 xil ünümlük meshiqi» dégen témida bir parche maqale élan qilghan bolup, men mezkur yazmida ashu maqalining asasiy mezmunini tonushturimen.

 

ub1

1-resim: Eymi Morin xanim

 

 

Rohiy Küchlüklükning Éniqlimisi

 

Pisxologiye ilmi köpinche waqitlarda rohiy saghlamliq mesilisi üstidila toxtilip, rohiy jehettiki küchlüklük yaki rohiy küchlüklükning roshen éniqlimisini anche tilgha élip ketmeydu. Rohiy küchlüklük déginimiz, siz kirip qalghan ehwalning qandaq bolushidin qet’iynezer, keypiyatingizni bashqurup we tengshep, tepekkuringizni kontrol qilip, ijabiy yosunda ish élip bérishingizni körsitidu. Rohiy küchlüklükni yétildürüsh déginimiz öz qimmet qarishingiz boyiche yashash iradisini wujudqa keltürüsh, we muweppeqiyet heqqide özingiz bir éniqlima oylap chiqishqa jür’et qilidighan bolushni körsitidu.

 

Rohiy küchlüklük iradidin köprek nersini öz ichige alidu. U yene özining barliqini atash we qattiq tirishishni telep qilidu. U saghlam adetlerni yétildürüsh, we özingizning waqti bilen énérgiyisini öz- özingizni yaxshilashqa atashnimu öz ichige alidu.

 

Turmush asan bilin’gende kishiler özlirini rohiy jehettin küchlük hés qilidu. Emma kishilerning heqiqiy rohiy küchlüklüki tragédiyiler (yaki paji’eler) yüz bergende andin öz qiyapitini toluq ashkarilaydu. Sizning rohiy küchlüklükingizni östüridighan maharetlerni yétildürüsh yolini tallash özingizni hayattiki saqlan’ghili bolmaydighan tosqunlargha teyyarlashning eng yaxshi usuli.

 

ohiy küchlüklükni yétildürüshke paydiliq bolghan meshiqler xéli köp bolup, töwendikisi shularning ichidiki 5 xil meshiqtin ibaret.

 

 

1. özingizning Yadroluq Étiqadini Bahalap Chiqish

 

Biz hemmimiz özimiz, öz hayatimiz we dunya heqqide oxshimighan yadroluq étiqadlarni yétildürduq. Yadroluq étiqad waqitning ötüshi bilen tedrijiy yétilidu, hemde u özimizning burunqi sergüzeshtliri teripidin belgilinidu. Sizning uningdin xewiringiz bar yaki yoq bolushidin qet’iynezer, sizning yadroluq étiqadingiz sizning oy-pikirliringizge, sizning ish-herikitingizge, we sizning keypiyatingizgha tesir körsitidu.

 

Bezide yadroluq étiqadlar xata we ünümsiz bolidu. Mesilen, eger siz «Men öz hayatimda menggü muweppeqiyetlik bolalmaymen» dégen tonushqa ige bolidikensiz, siz özingizge eng muwapiq kélidighan bir xizmetni tépishqa intilmeslikingiz, hemde yéngi xizmetke kirish körüshüshide özingizni toluq teswirlep bérelmeslikingiz mumkin. Shunglashqa, sizning yadroluq étiqadingiz bir öz- özingizdin qana’et hés qilduridighan hökümge aylinip qélishi mumkin.

 

Shuning üchün özingizning yadroluq étiqadini tépip chiqip, uni obdan bahalap béqing. Aldi bilen chüshinish asan étiqadlarni tépip chiqing. Andin adettiki qa’idilerge uyghun kelmeydighan étiqadlargha yüzlining. Hayatta «dawamliq bolidighan» we «menggü bolmaydighan» ishlar intayin az. Yadroluq étiqadni özgertish meqsetlik niyet we qattiq tirishchanliqni telep qilidighan bolup, eger siz özingizning yadroluq étiqadini toghrilaydikensiz u sizning hayatingizni özgertidu.

 

 

2. Rohiy Énérgiyingizni Aqilanilik Bilen Ishlitish

 

özingiz kontrol qilalmaydighan ishlarning endishisini qilish bilen özingizning ménge quwwitini israp qilidikensiz sizdiki rohiy énérgiye nahayiti tézla tügep kétidu. özingiz bir terep qilalmaydighan selbiy mesililer üstide qanche köp oylinidikensiz, ijabiy ishlar üchün ishliteleydighan énérgiyingizning miqdari shunche bek azlap kétidu. Mesilen, bir yerde olturuwélip hawa kilimati heqqide bérilgen aldin melumat üstide endishe qilishning héch bir paydisi yoq. Eger bir wehshiy boran-chapqun siz turuwatqan jaygha qarap kéliwatqan bolsa, sizning uning üstide endishe qilishingiz u boran-chapqunni tosup qalalmaydu. Bundaq ehwalda eng yaxshisi siz uninggha teyyarliq körüsh yolini tallang. Pütün küchingizni özingiz qilalaydighan ishlargha merkezleshtürüng.

 

Rohiy énérgiyingizni birer mesilini hel qilish yaki kelgüsi üchün nishan tüzüshke oxshash paydiliq ishlargha serp qiling. Melum bir ish üstide tepekkur qilip, uningdin bir netije chiqiralmaydikensiz, özingizning rohiy énérgiyisini angliq halda bashqa bir paydiliq témigha yötkeng. Rohiy énérgiyingizni aqilanilik bilen ishlitishni tekrar meshiq qilghanséri u bir adetke aylinidu.

 

 

3. Selbiy Tepekkurliringizning Ornini Paydiliq Tepekkurlargha Bérish

 

köpinchilirimiz öz tepekkurlirimiz üstide oylanmaymiz. Shundaqtimu özingizning tepekkur qilish aditini yaxshi chüshinish özingizde chidamchanliq qabiliyitini yétildürüshke paydiliq. «Men héch qandaq ishni toghra qilalmaymen» dégen’ge oxshash köptürüwétilgen we selbiy idiyiler sizning öz iqtidarliringizni toluq jari qildurushingizgha tosqunluq qilidu. Shunglashqa selbiy tepekkurliringizni eng deslipidila tizginlep, ularning sizning ish-heriketliringizge tesir körsitishining aldini éling.

 

Heddidin ziyade selbiy idiyiliringizni tépip chiqip, ularning ornigha paydiliq idiyilerni turghuzung. Ijabiy idiyiler heddidin ziyade ijabiy bolup ketmisimu bolidu, emma ular emeliyetke uyghun yaki ré’alistik bolushi kérek. Tengpunglashqan idiyiler «Méning bezi ajizliqlirim bar, emma mende artuqchiliqlarmu nahayiti köp» dégen’ge oxshash bolidu. özingizdiki idiyilerni özgertish sizdin dawamliq közitip turushni telep qilidu, emma ashundaq bir jeryan özingizdiki barliq yoshurun qabiliyetlerni toluq ishqa sélishta halqiliq rol oyniyalaydu.

 

 

4. Rahetsizlikke Chidashni Meshiq Qilish

 

Rohiy jehette küchlük bolush dégenlik keypiyati buzulushtin her waqit saqlinish dégenni körsetmeydu. Emeliyette rohiy küchlüklük sizdin öz keypiyatingizni her waqit nahayiti éniq bilip turushni, shu arqiliq yoluqqan ehwalgha inkas qayturushta eng yaxshi yolni tallash imkaniyitige ige bolushni telep qilidu. Rohiy küchlüklük öz héssiyatliringizning kontrolluqi astigha chüshüp qalmay turup ularni toluq qobul qilishni öz ichige alidu.

 

Rohiy küchlüklük qandaq waqitta öz héssiyatingizgha qarshi ish tutush kéreklikini chüshinishnimu öz ichige alidu. Rahetsiz héssiyatlargha chidash sizdin köplep meshiq qilishni telep qilidu, hemde sizning ishenchingizning küchiyishige egiship undaq qilishmu asanliship mangidu.

 

Siz qandaq adem bolushni istisingiz, shundaq ademge oxshash ish élip bérishni meshiq qiling. «Men ochuq-yoruq adem bolsam» dep olturushning ornigha, meyli siz yaxshi körüng yaki körmeng, ochuq-yoruq bolup yashashqa urunup béqing. Bezide chongraq payda üchün bir qisim rahetsizliklerni bashtin kechürüshke toghra kélidighan bolup, ashundaq rahetsizlikke chidash arqiliq, siz azraq-azraqtin öz arzuyingizgha yételeysiz.

 

 

5. Her Küni Hasil Qilghan Ilgirileshlerni Bahalap Turush

 

Hazirqi zamandiki jiddiy hayat ademge burunqi ishlarni eslep oylinish pursitini nahayiti az béridu. Siz choqum mexsus waqit ajritip, özingizde rohiy küchlüklükni yétildürüsh jehette qolgha keltürgen ilgirileshni bahalap we u heqte oylinip turung. Her küni kechte özingizning tepekkurliri, héssiyatliri we ish-heriketliri heqqide némilerni biliwalghanliqingizni bir qétim dengsep béqing. Shundaqla etisi emelge ashuridighan ishlarni pilanlap chiqing.

 

Rohiy küchlüklükni yétildürüsh bir xil uzun muddetlik wezipe. Bu wezipini orunlash jeryanida yaxshilashqa tégishlik ishlar her da’im chiqip turidu. Bu jeryan bezide asan, bezide qiyin tuyulidu. Qolgha keltürgen ilgirileshni dawamliq bahalap turush sizni öz qimmet-qarishingiz boyiche yashap turup közligen muweppeqiyetke érishish imkaniyitige ige qilidu.

 

 

Paydilinish menbesi:

 

Five Powerful Exercises To Increase Your Mental Strength

http://www.forbes.com/sites/groupthink/2013/12/03/5-powerful-exercises-to-increase-your-mental-strength/#1fbf02a4550e

 

 

Bu maqalini inimiz «Pidakar» tehrirlidi.



© Copyright 2014 Uyghur Meripet  Torbéti 

install tracking code
Visits Number