Erkin Sidiq: Bizning Idaridiki Aptomobil Körgezmisi

Bizning Idaridiki Aptomobil Körgezmisi

Erkin Sidiq

2014-yili 12-ayning 20-küni

Kona yéziq nusxisi: http://bbs.misranim.com/thread-132762-1-1.html

Men özemning bu yil 7-Noyabir küni torlargha chiqarghan «Mikro-bashqurush we uning ziyanliri» dégen maqaliside bizning idarimiz JPL ning bashqurghuchiliri jiddiy waqitlarda bizdin köprek we qattiqraq ishleshni telep qilish bilen bille, bizning turmushimizghimu intayin köngül bölidighanliqini bayan qilip ötken idim [1]. Bizning idarining bashqurghuchiliri yalghuz idare xadimlirining turmushila emes, ularning qiziqishlirigha we ular üchün muhim bolghan bashqa hemme ishlarghimu intayin köngül bölidu. Idare xadimlirining qandaq telepliri barliqini bilip turush üchün, idarimizning bashqurghuchiliri her 2-3 yilda bir qétim sirttin bir kespiy shirketni yallap, pütün idare dairiside namsiz pikir toplash élip bérip, andin ularni türlerge ayrip analiz qilip, shu asasta idare xadimlirini razi qilishni meqset qilghan yéngi chare-tüzümlerni békitip chiqidu.

Bizning idarining 1-qol bashliqining Amérikidiki orni xéli üstün bolup, Amérika prézidénti we bashqa dölet emeldarliri bilen pat-pat küriship turidu. U biz bilen bolghan ariliqi 30 kilométirdek kélidighan Los Anzhélis shehirige xizmet bilen baridighanda tik uchar ayropilan bilen bérip kélidu. Ashundaq bir ademmu bizning idarining xadimliri bilen intayin yéqin ötidu. U her pesilde bir qétim NASA ning iqtisadi ehwali we kelgüsi pilanliri heqqide idaridikilerge yighin achidighan bolup, biz u yighin’gha öz ixtiyarliqimiz bilen qatnishimiz. U her qétimliq yighindin kéyin kem dégende 15 minut waqitni soal-jawab élip bérishqa ajritip qoyidu. Shu waqitta xalighan adem uningdin xalighan soalni soriyalaydu. Yighin axirlashqandin kéyin yene uning bilen ayrim sözlisheleydu. Her qétimliq yighinning axirida u «Eger birer teklibliringlar bar bolsa méni biwaste izdenglar. Ishxanamgha kélelmisenglar manga élxet yazsanglarmu bolidu», dep turidu.

Qisqisi, bizning idarining bashliqliri idare xadimlirining hemme ishlirigha köngül bölidu. Xuddi bashlan’ghuch we ottura mekteplerdikige oxshash, bizning idarimu «taghda uzun’gha méngish guruppisi», «wélispt guruppisi», «yéngidin perzentlik bolghan anilar guruppisi», «muzika guruppisi» qatarliq idare xadimliri özligidin teshkilliwalghan guruppilar bar.

Bügün, yeni 2014-yili 19-Dikabir küni (Ürümchining waqti Kaliforniyening waqtidin 14 saet baldur bolup, hazir ÜrÜmchide Shenbe küni chüshtin burun Ürümchi waqti 9 boldi, bizning waqtimiz bolsa Jüme küni kech saet 7 boldi. Men öyge ishtin qaytip kélip, andin bu yazmini teyyarlawatimen) bizning idaride ashundaq guruppilarning ichidiki «Klassik we asar-etiqe aptomobil guruppisi» ning «aptomobil körgezmisi» boldi. Bu paaliyet her yili Dikabir éyida ötküzülidighan bolup, uningda bizning idaridiki klassik we kona aptomobillargha qiziqidighan, hemde öyide ashundaq mashidin birersi bar kishiler shu küni mashinisini idarige heydep kélip, uni belgilep bergen yerde körgezmige qoyidu. Körgezmini körüsh waqti chüshtin burun saet 11 din chüshtin kéyin saet birgiche jem’i 2 saet dawam qilidighan bolup, bügün chüshlük tamaqtin kéyin chéniqish üchün yol mangghach u yerge menmu bérip, körgezmige qoyulghan mashinilarni resimge tartiwaldim. Körgezmige qoyulghan mashinilarning ichide 1913-yili, 1914-yili, 1933-yili, we 1934-yili yasalghan mashinilarmu bar bolup, qalghanliri bulardin sel yéngiraq iken.

Körgezme ornida téxi bir guruppa muzikatlar néq meydanda muzika orunlawétiptu.

Bizning idaride ishleydighan xadimlarning ichide bir kona mashinini élip, uning matorini pütünley qaytidin yasap, hazirqi «partlap ittirish» (Bizning idarining ismidiki In’glizche «Jet Propulsion» dégen sözning menisi mana mushu «partlap ittirish» tur) téxnikisi bilen mashinini saetige 300 kilométirdin tézraq mangidighan qiliwétidighan kishilermu bar bolup, burun men bilen idarining mashinisida ishqa-bérip kélidighan ademlerning ichide ashundaq xadimdin birsi bar idi. Uning mashinisini men bir qanche qétim körgen bolup, u xuddi Amérikining kinoliridiki mashinilargha oxshaydiken.

Töwendiki men bügünki körgezmide tartiwalghan bir qisim körünüshler.

Paydilinish matériyalliri:

[1] Bilimxumar: «Mikro-bashqurush we uning ziyanliri»

http://bbs.izdinix.com/thread-60579-1-1.html