Amérikigha Bérip Oqushning Qedem Basquchliri

Amérikigha bérip oqushning 1-sherti In’gliz tilini bilish.  Eger siz Amérikigha yaki Yawropadiki bashqa bir memliketke bérip oqushni arzu qilsingiz, imkaniyet yar bersila, kichikingizdin bashlap In’gliz tilini öginishni bashlang. Hazir Uyghur Rayonining her qaysi sheherliride In’glizche ögitidighan mektep-kurslar köp iken. In’glizchini shularning biride ögensingizmu bolidu. Yaki siz oquwatqan mektepte In’gliz tili dersi ötülse, shu ders arqiliq ögensingizmu bolidu. Adette, mektepning ötken derslirige tayinip chet elge chiqip oqughidek sewiyege yetmek asan emes. Köpinche ehwalda In’gliz tilini özlükingizdinmu ögenmisingiz bolmaydu. Shunga bu ishqa qanche burun tutush qilsingiz shunche yaxshi bolidu.

Amérika we Yawropadiki nurghun mektepler TOEFL--"Test of English as a Foreign Language" (托福考试) dégen imtihan netijisini telep qilidiu. Bu imtihan burun Lenjo we Shienlerde élinatti. Hazir Shinjang uniwérsitétida TOEFL imtihani merkizi bar ken. Uni kompyutér arqiliq özingiz turuwatqan yerdila bersingizmu bolidu. Sizning nishaningiz mushu imtihanda qeghez imtihani boyiche 550 tin yuqiri, kompyutérliq imtihan boyiche 213 tin yuqiri nomur élish bolushi kérek.

Beziler "Men In’gliz tilini Amérikigha bérip ögensemmu bolamdu?" dep sorishiwatidu. Undaq qilsingizmu bolidu. Emma, u yolda mangsingiz mundaq bir qanche mesile bar:

1. Amérikida til öginish Junggoda til öginishke qarighanda köp qimmetke toxtaydu. Köpinche mekteplerning bir ayliq oqush pulining özila 1000 dollar etrapida bolup, uningdin bashqa yataq we tamaq qatarliq turmush chiqimi üchünmu nurghun pul kétidu.
2. Chet eldiki mekteplerning In’glizche ötüsh sewiyesi Junggoningkidin köp töwen bolup, grammatika jehette oxshash sewiyige yétish üchün chet elde uzunraq waqit kétidu.  Anglash we sözlesh jehette chet elde oqughanning köp paydisi bar, elwette. Emma, anglash-sözleshlerni chet elge chiqqandin kéyin beribir öginiwalalaysiz.
3. Amérikigha In’gliz tili öginish bahanisi bilen wiza élish imkaniyiti asasen yoq. Amérikida In’gliz tili ögitidighan mektepler intayin köp bolghini bilen, burun Junggodin til öginish bahanisi bilen kelgenler asasen qaytip ketmigen bolghachqa, hazir Junggoluqlarning til öginish bahanisi bilen wiza alalishi asasen mumkin emes bolup qaldi. Siz Junggoda emes, bashqa bir dölette turup, In’gliz tili öginish meqsitide bir Amérika konsulxanisigha  kélip, wizigha iltimas qilsingiz, siz Junggo girajdanila bolsingiz, sizge asasen wiza bérilmeydu.

Shunglashqa, eng yaxshisi bu yolgha mangmighan tüzük.  Uningdin bashqa, GRE we GMAT qatarliq imtihanilarnimu Junggo yaki özingiz turuwatqan Amérikidin bashqa chet eldila bérip tügitip, andin Amérikigha kelginingiz yaxshiraq. Buning sewebi yuqirida éytilghan 1- we 2-sewebler bilen oxshash.

Amérikigha kélip oqushta, mundaq bir qanche qiyin ötkel bar:

1. Amérikidiki bir mektepke qobul qilinish.
2. Oqush chiqimini hel qilish.
3. Amérika Konsulxanisidin Amérikigha kirish wizisi élish.

Bu 3 ötkelning hemmisidin muweppeqiyetlik ötüsh üchün, 1) Siz aliy mektepte yaxshi oqup, choqum ela derijilik oqush netijisige érishing. 2) TOEFL, GRE yaki GMAT qatarliq imtihanlarda yaxshi netijige érishing. Junggodiki xéli baylarning baliliri üchünmu, Amérikidiki oqush pulini öz yénidin tölesh asasen mumkin emes.  Shunga, oqush pulini hel qilishning birdin-bir amali Amérikidiki bir aliy mektepning oqush mukapat puligha érishishtin ibaret. Eger yuqiriqi 2 shertni hazirlisingiz, oqush mukapat pulighimu choqum érisheleysiz.  Shunglashqa, siz chet elge chiqip oqush ghayisini turghuzghan kündin bashlap, yuqiriqi 2 shertni hazirlash üchün qattiq tirishing. TOEFL, GRE yaki GMAT dégen imtihanlargha teyyarliq körüshni qanche burun bashlisingiz shunche yaxshi.  Eger yuqiriqi 2 shertni hazirlap, Amérikidiki birer mektepke qobul qilinip, hemde ashu mektepning oqush mukapat pulighimu érishelisingiz, sizning Amérika Konsulxanisidin wiza élishingizmu asan’gha chüshidu.


Til ötkilidin ötkendin kéyin, Amérikidiki bir mektepke kirish üchün töwendiki qedemlerni bésish kérek:

1. Bir qanche mektepke xet yézip, Iltimas Jedwili we bashqa oqushqa ait matériyallarni telep qilish.
2. TOEFL bilen GRE imtihanida layaqetlik bolush.
3. Bir qanche mektepke iltimas qilish. Yeni, Iltimas Jedwilini toldurup, uni we "Iltimas Puli"ni siz kirmekchi bolghan bir qanche mektepning adrésigha mangdurush.

Men mushu maqalining In’glizche qismida, yuqiriqi 3 qedemni bir qeder tepsiliyrek chüshendürdüm. Shunga bu 3 qedemni téximu yaxshiraq chüshinish  üchün, bu maqalining In’glizche nusxisini körüshingizni ümid qilimen.

Eger yene bashqa sual-telepliringiz bolsa, manga tartinmay e-mail yézing. Men choqum waqit chiqirip sizge jawab yazimen.