Erkin Sidiq She'irliri

Kelmeydiken Chin Bext Sensiz Wetinim

Erkin Sidiq

2017-yili 10-Noyabir

Ésimde baliliqim, umach etkinim,

Kaligha méniwélip xaman tepkinim.

Qish üchün yerni kolap geme yapqinim,

Kelmeydiken chin bexit sensiz wetinim.

Barituq köp jaylargha yaryar harwida,

Uxlaytuq bagh, ögzide yultuz qoynida.

Mungdashqan tughqanlirim baghliq hoylida,

Kelmeydiken chin bexit sensiz wetinim.

Yurtumda hemme kishi méhriban idi,

Ayallar bek köyümchan hem ishchan idi.

Erlermu héch yéngilmes qehriman idi,

Kelmeydiken chin bexit sensiz wetinim.

Ésimde köp chömülgen yéza östingi,

Kéchilerde harwiliq ézishlar téxi.

Bilimge ésiwalghan pichiqim qéni?

Kelmeydiken chin bexit sensiz wetinim.

Mektepte qiz-oghullar inaq, shox idi,

Ana tilda ders anglap dillar toq idi.

Kimlikte yatlishish qet’iy yoq idi,

Kelmeydiken chin bexit sensiz wetinim.

Shu zémin bizge idi ana we ata,

Yoqsizliqmu tuyulmaytti bizge héch japa.

Yürmes iduq hazirqidek rohsiz we xapa,

Kelmeydiken chin bexit sensiz wetinim.

Chet elde oqush üchün qattiq tirishtim,

Besh yilda üch til bilip, shertke yétishtim.

Magistir we doktorluq ton’gha érishtim,

Kelmeydiken chin bexit sensiz wetinim.

Körüner illiqqina Uyghurum chéhri,

Özgiche temler bérer barliq ash-néni.

Bir makanda tughulghach chirmishar jéni,

Kelmeydiken chin bexit sensiz wetinim.

Idarige qilghanlirim yéqip ketsimu,

Netijem teleptin köp éship ketsimu.

Jurnallar jiq maqalemni bésip ketsimu,

Kelmeydiken chin bexit sensiz wetinim.

Yashaymen bir yérim kem öyüm bolsimu,

Hemrayim, qiz-oghlumdin köyüm bolsimu.

Elge yaqqan emilim, sözüm bolsimu,

Kelmeydiken chin bexit sensiz wetinim.

Yurt-weten muhebbiti iken bir okyan,

Teng kélelmes qedrige bashqa héch makan.

Tuyghular séghinishtin yasar bir wolqan,

Kelmeydiken chin bexit sensiz wetinim.

Pighansiz ötmes hazir bir sa’et, bir kün,

Hesrette qétip qaldi barliq awaz-ün.

Ey Allah! Qil bu künni tang aldidiki tün,

Kelmeydiken chin bexit sensiz wetinim.

= =============================================== =

كەلمەيدىكەن چىن بەخت سەنسىز ۋەتىنىم

ئەركىن سىدىق

2017-يىلى 10-نويابىر

ئېسىمدە بالا چاغدا ئۇماچ ئەتكىنىم،

كالىغا مېنىۋېلىپ خامان تەپكىنىم.

قىش ئۈچۈن يەرنى كولاپ گەمە ياپقىنىم،

كەلمەيدىكەن چىن بەخىت سەنسىز ۋەتىنىم.

بارىتۇق كۆپ جايلارغا ياريار ھارۋىدا،

ئۇخلايتۇق باغ، ئۆگزىدە يۇلتۇز قوينىدا.

مۇڭداشقان تۇغقانلىرىم باغلىق ھويلىدا،

كەلمەيدىكەن چىن بەخىت سەنسىز ۋەتىنىم.

يۇرتۇمدا ھەممە كىشى مېھرىبان ئىدى،

ئاياللار بەك كۆيۈمچان ھەم ئىشچان ئىدى.

ئەرلەرمۇ ھېچ يېڭىلمەس قەھرىمان ئىدى،

كەلمەيدىكەن چىن بەخىت سەنسىز ۋەتىنىم.

ئېسىمدە كۆپ چۆمۈلگەن يېزا ئۆستىڭى،

كېچىلەردە ھارۋىلىق ئېزىشلار تېخى.

بىلىمگە ئېسىۋالغان پىچىقىم قېنى؟

كەلمەيدىكەن چىن بەخىت سەنسىز ۋەتىنىم.

مەكتەپتە قىز-ئوغۇللار ئىناق، شوخ ئىدى،

ئانا تىلدا دەرس ئاڭلاپ دىللار توق ئىدى.

كىملىكتە ياتلىشىش قەتئىي يوق ئىدى،

كەلمەيدىكەن چىن بەخىت سەنسىز ۋەتىنىم.

چەت ئەلدە ئوقۇش ئۈچۈن قاتتىق تىرىشتىم،

بەش يىلدا ئۈچ تىل بىلىپ، شەرتكە يېتىشتىم.

ماگىستىر ۋە دوكتورلۇق تونغا ئېرىشتىم،

كەلمەيدىكەن چىن بەخىت سەنسىز ۋەتىنىم.

كۆرۈنەر ئىللىققىنا ئۇيغۇرۇم چېھرى،

ئۆزگىچە تەملەر بېرەر بارلىق ئاش-نېنى.

بىر ماكاندا تۇغۇلغاچ چىرمىشار جېنى،

كەلمەيدىكەن چىن بەخىت سەنسىز ۋەتىنىم.

ئىدارىگە قىلغانلىرىم يېقىپ كەتسىمۇ،

نەتىجەم تەلەپتىن كۆپ ئېشىپ كەتسىمۇ.

جۇرناللار جىق ماقالەمنى بېسىپ كەتسىمۇ،

كەلمەيدىكەن چىن بەخىت سەنسىز ۋەتىنىم.

ياشايمەن بىر يېرىم كەم ئۆيۈم بولسىمۇ،

ھەمرايىم، قىز-ئوغلۇمدىن كۆيۈم بولسىمۇ.

ئەلگە ياققان ئەمىلىم، سۆزۈم بولسىمۇ،

كەلمەيدىكەن چىن بەخىت سەنسىز ۋەتىنىم.

يۇرت-ۋەتەن مۇھەببىتى ئىكەن بىر ئوكيان،

تەڭ كېلەلمەس قەدرىگە باشقا ھېچ ماكان.

تۇيغۇلار سېغىنىشتىن ياسار بىر ۋولقان،

كەلمەيدىكەن چىن بەخىت سەنسىز ۋەتىنىم.

پىغانسىز ئۆتمەس ھازىر بىر سائەت، بىر كۈن،

ھەسرەتتە قېتىپ قالدى بارلىق ئاۋاز-ئۈن.

ئەي ئاللاھ! قىل بۇ كۈننى تاڭ ئالدىدىكى تۈن،

كەلمەيدىكەن چىن بەخىت سەنسىز ۋەتىنىم.

Visits Number