Erkin Sidiq She'irliri

Yighlighim Kélur

Erkin Sidiq

2022-yili 1-ayning 25-küni

Ilawe: Ötüp ketken yilning 31-küni biz birer pa’aliyet qilmiduq. Men öyümde Yutyubtiki Uyghurche sen’et nomurlirini körgech, nahayiti perishanliq ichide burunqi nurghun ishlarni eslidim. Töwendikisi shu chaghdiki héssiyatlirimning qismen namayandisi. Yéngi Yil Bayrimidin kéyinla dostlarning könglini yérim qilmasliq üchün, uni emdi torgha chiqardim.

Azabta yürikim qiynilip tinur,

Hesretler dawalghup dilimgha tulur.

Oylaymen Uyghurgha yene nim bolur,

Oylisam bügünni yighlighim kélur.

Uyghurlar tarixta tohpikar, ésil,

Qurghanti émpirye, dölet we sépil,

Bergenti erkinlik, hörlükke képil,

Oylisam bügünni yighlighim kélur.

Yashighan yurtumda Türk, Qitanlar,

Siyanpiy hem Yawchi, Saklar, Jurjanlar,

Mongghullar, Tübütler, Honlar we Changlar,

Oylisam bügünni yighlighim kélur.

Bezisi ularning küch-qudret tépip,

Sorighan jahanni kelkündek éqip,

Yurtumni tengdashsiz güllerde yépip,

Oylisam bügünni yighlighim kélur.

Kéyinche bezisi soqulup ketti,

Kichiklep, ajizlap, oqlinip ketti.

Bezisi tarixtin yoqilip ketti,

Oylisam bügünni yighlighim kélur.

Uyghurlar bashlidi bashqiche seper,

Tawlandi qoyunda quchup shan-zeper.

Zoruyup, qaldurup, möjize-eser,

Oylisam bügünni yighlighim kélur.

Öz qip köp xildiki til we yéziqni,

Qayil qip jahanda xoshna xelqni.

Qaldurup hang-tangda her xil dinliqni,

Oylisam bügünni yighlighim kélur.

Bolalmas bir qewm kulturluq millet,

Bolmisa tonulghan erbabi, xislet.

Yaratqan Xas Hajip, Mehmud medinyet,

Oylisam bügünni yighlighim kélur.

Kéyinche perwa qilmay teqdir-yurtigha,

Kirwaldi beziler dinchi turqigha.

Bir qismi sheyda bop meslek pirqigha,

Oylisam bügünni yighlighim kélur.

Yoq idi teqdirge héch bir kapalet,

Xitaydin kéletti peqet jahalet.

Qozghalmay shundimu özge sadaqet,

Oylisam bügünni yighlighim kélur.

Hés qilip yüzlen’gen qara menzilni,

Qelemde yaydimmen erzu-halimni.

Tirishtim öteshke millet qerzimni,

Oylisam bügünni yighlighim kélur.

Yaqmiduq yawlargha bolghachqa bashqa,

Bésilduq jadugha, urulduq tashqa.

Liq toldi makanim pighan we yashqa,

Oylisam bügünni yighlighim kélur.

Sözlisimu bu dunya, tedbir almidi,

Xitaygha “Toxta!” dep yügen salmidi.

Sanaqsiz Uyghurda hayat qalmidi,

Yawlarni darlargha mixlighim kélur.

Qutquzar biraw dep turar telmürüp,

Yurt, xelqim köktiki qushqa yalwurup.

Qurbiti yetken’ge sözler qaldurup,

Oylisam bügünni yighlighim kélur.

Oylaydu beziler özche serke yoq,

We lékin düshmendin anche perqi yoq.

Milletke mas kéler roh we terqi yoq,

Oylisam ularni tillighim kélur.

Turayli gheplettin, yéter uyqumiz,

Ümid we iradige tolsun tuyghumiz,

Maslashsun ghaliplargha mijez-xulqimiz,

Téxiche uxlighanni nixtighim kélur.

Uyghurlar yashiduq köpligen esir,

Qaldurup dunyagha kultur we tesir.

Qurimiz qaytidin dölet we qesir,

Uruqi bop hörlükning bixlighim kélur.

= =============================================== =

يىغلىغىم كېلۇر

ئەركىن سىدىق

2022-يىلى 1-ئاينىڭ 25-كۈنى

ئىلاۋە: ئۆتۈپ كەتكەن يىلنىڭ 31-كۈنى بىز بىرەر پائالىيەت قىلمىدۇق. مەن ئۆيۈمدە يۇتيۇبتىكى ئۇيغۇرچە سەنئەت نومۇرلىرىنى كۆرگەچ، ناھايىتى پەرىشانلىق ئىچىدە بۇرۇنقى نۇرغۇن ئىشلارنى ئەسلىدىم. تۆۋەندىكىسى شۇ چاغدىكى ھېسسىياتلىرىمنىڭ قىسمەن ناماياندىسى. يېڭى يىل بايرىمىدىن كېيىنلا دوستلارنىڭ كۆڭلىنى يېرىم قىلماسلىق ئۈچۈن، ئۇنى ئەمدى تورغا چىقاردىم.

ئازابتا يۈرىكىم قىينىلىپ تىنۇر،

ھەسرەتلەر داۋالغۇپ دىلىمغا تۇلۇر.

ئويلايمەن ئۇيغۇرغا يەنە نىم بولۇر،

ئويلىسام بۈگۈننى يىغلىغىم كېلۇر.

ئۇيغۇرلار تارىختا توھپىكار، ئېسىل،

قۇرغانتى ئېمپىريە، دۆلەت ۋە سېپىل،

بەرگەنتى ئەركىنلىك، ھۆرلۈككە كېپىل،

ئويلىسام بۈگۈننى يىغلىغىم كېلۇر.

ياشىغان يۇرتۇمدا تۈرك، قىتانلار،

سىيانپىي ھەم ياۋچى، ساكلار، جۇرجانلار،

موڭغۇللار، تۈبۈتلەر، ھونلار ۋە چاڭلار،

ئويلىسام بۈگۈننى يىغلىغىم كېلۇر.

بەزىسى ئۇلارنىڭ كۈچ-قۇدرەت تېپىپ،

سورىغان جاھاننى كەلكۈندەك ئېقىپ،

يۇرتۇمنى تەڭداشسىز گۈللەردە يېپىپ،

ئويلىسام بۈگۈننى يىغلىغىم كېلۇر.

كېيىنچە بەزىسى سوقۇلۇپ كەتتى،

كىچىكلەپ، ئاجىزلاپ، ئوقلىنىپ كەتتى.

بەزىسى تارىختىن يوقىلىپ كەتتى،

ئويلىسام بۈگۈننى يىغلىغىم كېلۇر.

ئۇيغۇرلار باشلىدى باشقىچە سەپەر،

تاۋلاندى قويۇندا قۇچۇپ شان-زەپەر.

زورۇيۇپ، قالدۇرۇپ، مۆجىزە-ئەسەر،

ئويلىسام بۈگۈننى يىغلىغىم كېلۇر.

ئۆز قىپ كۆپ خىلدىكى تىل ۋە يېزىقنى،

قايىل قىپ جاھاندا خوشنا خەلقنى.

قالدۇرۇپ ھاڭ-تاڭدا ھەر خىل دىنلىقنى،

ئويلىسام بۈگۈننى يىغلىغىم كېلۇر.

بولالماس بىر قەۋم كۇلتۇرلۇق مىللەت،

بولمىسا تونۇلغان ئەربابى، خىسلەت.

ياراتقان خاس ھاجىپ، مەھمۇد مەدىنيەت،

ئويلىسام بۈگۈننى يىغلىغىم كېلۇر.

كېيىنچە پەرۋا قىلماي تەقدىر-يۇرتىغا،

كىرۋالدى بەزىلەر دىنچى تۇرقىغا.

بىر قىسمى شەيدا بوپ مەسلەك پىرقىغا،

ئويلىسام بۈگۈننى يىغلىغىم كېلۇر.

يوق ئىدى تەقدىرگە ھېچ بىر كاپالەت،

خىتايدىن كېلەتتى پەقەت جاھالەت.

قوزغالماي شۇندىمۇ ئۆزگە ساداقەت،

ئويلىسام بۈگۈننى يىغلىغىم كېلۇر.

ھېس قىلىپ يۈزلەنگەن قارا مەنزىلنى،

قەلەمدە يايدىممەن ئەرزۇ-ھالىمنى.

تىرىشتىم ئۆتەشكە مىللەت قەرزىمنى،

ئويلىسام بۈگۈننى يىغلىغىم كېلۇر.

ياقمىدۇق ياۋلارغا بولغاچقا باشقا،

بېسىلدۇق جادۇغا، ئۇرۇلدۇق تاشقا.

لىق تولدى ماكانىم پىغان ۋە ياشقا،

ئويلىسام بۈگۈننى يىغلىغىم كېلۇر.

سۆزلىسىمۇ بۇ دۇنيا، تەدبىر ئالمىدى،

خىتايغا "توختا!" دەپ يۈگەن سالمىدى.

ساناقسىز ئۇيغۇردا ھايات قالمىدى،

ياۋلارنى دارلارغا مىخلىغىم كېلۇر.

قۇتقۇزار بىراۋ دەپ تۇرار تەلمۈرۈپ،

يۇرت، خەلقىم كۆكتىكى قۇشقا يالۋۇرۇپ.

قۇربىتى يەتكەنگە سۆزلەر قالدۇرۇپ،

ئويلىسام بۈگۈننى يىغلىغىم كېلۇر.

ئويلايدۇ بەزىلەر ئۆزچە سەركە يوق،

ۋە لېكىن دۈشمەندىن ئانچە پەرقى يوق.

مىللەتكە ماس كېلەر روھ ۋە تەرقى يوق،

ئويلىسام ئۇلارنى تىللىغىم كېلۇر.

تۇرايلى غەپلەتتىن، يېتەر ئۇيقۇمىز،

ئۈمىد ۋە ئىرادىگە تولسۇن تۇيغۇمىز،

ماسلاشسۇن غالىپلارغا مىجەز-خۇلقىمىز،

تېخىچە ئۇخلىغاننى نىختىغىم كېلۇر.

ئۇيغۇرلار ياشىدۇق كۆپلىگەن ئەسىر،

قالدۇرۇپ دۇنياغا كۇلتۇر ۋە تەسىر.

قۇرىمىز قايتىدىن دۆلەت ۋە قەسىر،

ئۇرۇقى بوپ ھۆرلۈكنىڭ بىخلىغىم كېلۇر.

Visits Number