Mastérliq we Dokturluqta Oqush
 
1-Soal: Amérikigha bérip oqush üchün qandaq shertlerni hazirlash kérek?
 
(1) Puxta in'giliz tili asasi bolushi, TOEFL, GRE, GMAT qatarliq imtihanlarda yaxshi nomur élish kérek.
(2) Ottura mektep we ali mektepte, sinipida aldinqi 5, kamida aldinqi 10 ichide oqughan bolushi. Bu zörür shert emes. Lékin méning küzitishimche, pewqul'adde ehwalni hisapqa almighanda, bu shertni orundiyalmighanlar, amérikigha oqushqa bérishtiki zörür imtihanlardin yaxshi nomur alalmasliqi, kéyin derslerni kötürelmesliki mumkin.
(3) Baklawrliq unwani bolushi. Amérikida ottura mektep, baklawur oqushni oqushmu mumkin. Lékin buninggha heddidin ziyade köp pul kétidu. Yilida 300-200 ming yüen etrapida.  Aspirantliq oqushta, amérikidiki mekteplerning toluq oqush mukapat pulini élip oqughuli bolidu. Shunga awal weten ichide baklawurluqni oquwalghan köp ewzel.
 
2-Soal: Amérika ali mekteplirige bérip oqushning qedem-basquchliri qandaq bolidu?
 
(1) Awal özingiz bérip, oqushni arzu qilidighan mekteptin 30-20 ni tallap, ularning oqughuchi qobul qilishqa mes'ul xadimliri bilen deslepki qedemde alaqe qilisiz. Mektepning toridiki we Peterson's Guide digendek matiryallardin, u mekteplerni tetqiq qilisiz.
(2) TOEFL, GRE, GMAT qatarliq imtihanlargha qatniship netije alisiz.
(3) özingizning diplom, baklawurluq unwan kénishkishi, ali mektepte oquwatqandiki barliq netijiliringizni, xenzuche, in'gilizche qilip yéterlik nusqa (belkim, her biridin kamida 10 nusqa) teyyarlaysiz.
(4) mektep terepning oqushqa kirish iltimas jedwilini toldurup (bu jedwelni torda tépish mumkin, hetta torda toldurupla ewetish mumkin), 3-bölümdiki matiryallardin her biridin bir nusqa, 3 neper piroféssoringizning sizni tonushturup yézip bergen xét, iltimas qilish puli qatarliqlarni mektepke pochtidin salisiz. (buning bezilirini tor bilen ewetish mumkin.)
(5) 2-bölümdiki imtihanlarni bergende, ularning netijisi siz tallan'ghan mekteplerge yollanmighan bolsa, bu imtihanlarni alidighan orun Educational Testing Service bilen alaqe qilip, imtihan netijiliringizni mektepke ewetisiz.
(6) ularning qobul qilish netijisini saqlaysiz.
(7) qobul qilin'ghan chaqiriq bilen pasport ishlitisiz.
(8) pasport we qobul qilish chaqiriqi bilen, amérikining junggoda turushluq elchixana, konsulxanilirida amérikining oqughuchiliq wizisigha iltimas qilisiz.
(9) yuqurqi hemme ishlar ongushluq bolsa, andin amérikigha seper qilip, oqushingizni bashliyalaysiz.
 
3-Soal: bu jeryanda qanchilik chiqim kétidu?
 
TOEFL, GRE< GMAT qaraliq imtihanlarning (adette) kamini 2 ni bérish kérek. Buning üchün 2,000 yüendin köprek pul kétidu. Bu imtihan heqqi bu imtihan netijilirini 4-3 mektepke ewetishni öz ichige alidu. Yene her bir iltimas qilghan mekteplerge imtihan netijilirini ewetish üchün texminen 300 yüen etrapida pul kétidu. Mekteplerge iltimas qilish üchün, her birige texminen 800-200 yüen etrapida pul kétidu. Shundaqta, texminen 10 etrapida mektepke iltimas qilish üchün 10,000 yüen etrapida pul kétidu.
 
4-Soal: Nime üchün 10 etrapida mektepke iltimas qilimiz? 1 mektepke iltimas qilsaq bolmamdu?
 
Amérikining ali maaripida, oqughuchi qobul qilish imtihanliri we qobul qilish jeryanlirini her bir mektep, ayrim-ayrim öz aldigha kontrol qilidu. Bizning wetinimizdikidek merkezlik, bir tutash imtihan élish, qobul qilish ishliri yoq. Yeni her bir mektep öz ishlirigha özi ige. Shundaq bolghan iken, her bir mektepke ayrim-ayrim iltimas qilish kérek. Bezide hemmisi qobul qilmaydighan, bezide hemmisi qobul qilmaydighan, yene bezide, beziliri qobul qilip, yene beziliri ret qilidighan ehwal mewjut. Siz bilen teng yene dunyaning hemme jayliridin iltimas qilidighanlar bar. Bolupmu junggo we hindistandin eng köp. Mekteplermu eng yaxshi oqughuchini qobul qilishni, sizmu eng yaxshi mekteplerge bérishni arzu qilisiz. Bu ikki terepning teng, ortaq, bir-birini tallishidur. Nawada birla mektepke iltimas qilsingiz, ret qilinip kétish ehwali bolsa, shu yilliq iltimasingiz meghlubiyet bilen axirlishidu. Köprek mekteplerge iltimas qilsingiz, birsidin bolmisa yene birsidin qobul qilinish éhtimalliqi köp yuquri bolidu. Shunga adette köprek mektepke iltimas qilsa yaxshi. Lékin, her bir mektepke iltimas qilsingiz, 1000 yüen etrapida cheqim bolidu. Netijisi nime bolushtin qet'i nezer, bu pul qayturulmaydu. Shunga özingizning ehwaligha qarap, muwapiq sandiki mekteplerge iltimas qilsingiz bolidu. Adette 15-5 ichide bolsa, muwapiq bolushi mumkin. Bek az bolup qalsa, oqushqa bérish éhtimalliqingiz köp töwen bolup qalidu. Beö köp bolup ketse, sizge köp iqtisadi bésim bolup qélishi mumkin.
 
5-Soual: Oqushning yash cheklimisi barmu?
 
Yoq. Lékin yéshi kichikler kamida baklawur unwanini hazirlighan bolushi, yéshi chonglarmu muwapiq yashta oqughini yaxshi. Qérighanda oqughan oqush yash waqtida oqughandek bolmaydu.
 
6-Soual: Qaysi waqitta oqushni bashlighan eng ewzel? Buninggha qandaq teyyarliq qilish kérek?
 
Baklawurluq oqushni tügitipla, amérikidiki aspirantliq oqushni bashlighan eng ewzel. Buning üchün, toluqsizda ana tilini, toluqta xenzu tilini, ali mektepte in'giliz tilini pishshiq ögünüsh, ali mektepni tügetkiche, oqushqa kirishning zörür imtihanlirigha qatniship, netije élip, amérika terepning oqush chaqiriqini qolgha keltürüsh kérek. Bu asan ish emes. Lékin pewqul'adde tes ishmu emes. Bizge tonushluq, yulghun tehrirligüchning ijadchisi muhemmed abdulla ependim mushundaq qilalighan we qilghan.
 
7-Soal: Bu heqte tepsili yézilghan birer kitap-matiryal barmu?
 
Uyghurche matiryallar téxi yoq, lékin xenzuche matiryallar tordimu, kitapxanilardimu qum-képektek tola! Xenzuche matiryaldin paydilinalaydighanlar, töwendiki éléktironluq kitaptin paydilinip turunglar: (bu kitap shangxey qatnash unwéristéti teripidin bash bolup tüzülgen kitap bolup, buni tüzüshke hetta amérikidiki dangliq ali mekteplerning mudirlirimu qatnishiptiken. Mezmuni bek tepsili, mukemmel, yéngi iken.)
http://salam2001.googlepages.com/applyingguide2007.pdf
"Ish ömlükte, küch birlikte"! "Her birimiz bir küch, nawada hemmimiz birleshsek, derijidin tashqiri küch bolimiz."
 
8-Soal: Amérika ali mektepliride aspirantliqta oqush üchün bir yilda qanchilik chiqim kétidu?
 
Bu san mekteplerge, mektep jaylashqan sheher, rayonlargha, kespke qarap oxshash bolmaydu. Bu san texminen 20 ming dollardin 50 ming dollarghiche bolidu. Bu sandiki bunchilik zor perqni chüshinish üchün, béyjing unwéristéti bilen xoten uyghur tibabet ali téxnikomida oqughanni sélishtürüp tehlil qilsaqla kupaye. Mesilen, kaliforniye unwéristétining bérkéléy tarmiqida bir yilliq oqush puli 30 ming dollar, yataq, tamaq we bashqa xirajetler oqughuchi sewiyiside texminen 20 ming dollar etrapida. Lékin, intayin xoshallinarliq bir pakit shuki, nawada siz toluq oqush mukapat puli élip qalsingiz, sizning yilliq 30 ming dollar oqush pulingiz kechürüm qilinip, qolingizgha yene jéningizni béqip oqush üchün yilida 20 ming dollar "muash" béridu! Dimek bu digenlik, siz bir-ikki imtihan bérip, amérikida oqup bersingiz, dersxanida olturup berginingizge yilida 50 ming dollar, yeni 400 ming yüen etrapida "kirim" qilalaysiz digen gep. Bu netijige érishish asan emes. Lékin sizde "bashqilar qilalighanni men nimishqa qilalmighidekmen!?" deydighan idiye bolsa, buni sizmu qilalaysiz.
 
Yoquriqi jawabni yazghuchi «Bürküt» ependidin alahide eskertish: «Bu yerdiki jawaplarda, méning bezi sobiktip köz qarishimmu mewjut bolup, bu jawaplar peqet méning shexsi köz qarishimghila wekillik qilalaydu. Men uni barliq ehwallargha mas kélidighan hemmige-bap jawap dep qarimaymen. Shunga shakilini chiqiriwétip, méghizini qobul qilsingiz bolidu. Bu jehettin téximu köp uchur, bilimlerge éhtiyajliq bolsingiz, bashqa kishiler, kitapxana, kütüpxana we torgha murajet qilghaysiz. Men shuni alahide eskertimenki, bu jawaplar sewebidin siz uchrighan her qandaq rohi, iqtisadi we bashqa ziyanlargha men her qandaq iqtisad, qanun we exlaq nuqtisidin menggü mes'ul bolmaymen we bolalmaymen!»
 
9-Soal: Amérikigha bérip oqushtiki eng muhim, qiyin ötkel, dawanlar qaysilar?
 
Méningche töwendiki 3 qiyin dawanlar bar: (1) in'giliz tilini puxta igellep, TOEFL, GRE, GMAT imtihanlarda yaxshi nomur élish.  (2) mekteplerge oqushqa kirishke iltimas sunup, uchrighan mesililerni chiwerlik bilen waqtida, toghra hel qilish. (3) amérika elchixanisida wizigha iltimas qilish.  Qalghanliri bulargha qarighanda kichik mesililer. Bularning her biri qiyinliq derijisi yuquri bolghan dawanlar bolup, nawada muwapiq usul bilen élip bérilmisa, köp waqitlarda meghlubiyet bilen axirlishidu. Lékin bu dawanlardin ötüp kétishningmu ilmi, muwapiq usulliri bar. Bir nuqta ésingizde bolsunki, insanning barliq teqdir-qismetlirining hemmisi uning öz qolida emes. Bezi teqdir-qismetlerni özingiz tiriship hel qilalisingizmu, bezilirini hel qilalishingiz natayin yaki mumkin emes. Shunga ishni bashlashtin burun, awal toghra dunya qarash, étiqad, idiye tughuziwélishmu intayin muhim.
 
10-Soal: TOEFL, GRE, GMAT qatarliq imtihanlar 1000 yüendinmu qimmet iken. Men bir namrat oqughuchi, bu mesilini qandaq hel qilimen?
 
U imtihanlar, bashqilar yilida 50,000 dollar, 5 yilda jemi 250,000 dollar (2 milyon yüen) pul serp qilip érisheleydighan sharaitqa, sizning heqsiz érishelishingizni kapaletke ige qilidighan imtihanlar. Hichkim sizni imtihan béring, amérikigha bérip oqung dep mejburlimaydu. Deslepki 2000-1000 yüenning méhridin kéchelmisingiz, bu sual-jawaplarni oqushni mushu yerde toxtatsingiz bolidu. Bolmisa waqtingizmu israp bolup kétidu. Téjeshlik, iqsatchanliq bilen yashash, kurs échish, aile oqutquchisi bolush, bosh waqitlarda bashqa orunlarda ishlep anche-munche kirim qilish yoli bilen bunchilik pulning yolini qilghili bolidu. Lékin, u imtihanlarni bérishtin burun, puxta teyyarliq qilip, özini yaxshi mölcherlep bérish kérek. Özini yaxshi molcherliyelmise, awal 100-20 yüen bilen bergili bolidighan, CET-4, CET-6, EPT qatarliq imtihanlarni bérip, özining sewiyisini dengsep körüsh, yéterlik sewiye hazirlighanda, u imtihanlarni birla qétim bérip, yaxshi nomur élish arqiliq bezi pul téjesh meqsetlirige yétish mumkin.
 
11-Soal: Amérikigha bérip oqush heqqide tepsili yézilghan birer resmi kitapni tewsiye qilghan bolsingiz?
 
Jawap (Bürküt): Men junggudin ayrilip ketkili uzun yil bolghachqa, yéqindin yéngidin chiqiwatqan kitaplardin xewersizmen. Shundaqtimu, men burun oqughan, özem eng yaxshi dep qarighan, bir kitapni tewsiye qilay. Men u kitapning 1-neshrini oqughan, hazir 2-neshri ba iken. U kitapning muqawisi:
U kitap heqqide bu bette bezi uchurlar bar iken:
http://www.pianyiba.com/product/371719/
Biz belkim bu kitapni tépip, bilik kulubida hemkarliship, uyghurchigha terjime qilip chiqishimizmu mumkin.
1a
 
12-Soal: men hazir xizmette, ali mektepte in'gliz tilini xéle yaxshi ögen'gen (6-derije imtihanidin ötken). Amérikigha bérip oqush arzuyum bar. Imtihanlardinmu, iltimas puli, imtihan puli, yol kirasi qatarliqlardinmu anche endishe qilmaymen. Lékin béshimni qaturiwatqan bir mesile, qiz dostum. Men kéyin qiz dostumnimu amérikigha birge élip baralaymenmu?
 
Jawap: Qanun nuqtisidin éytqanda, "oghul dost", "qiz dost" digen gepni qanun étrap qilmaydu. Bundaq ehwalda, nawada siz amérikigha bérip, qiz dostungizgha teklipname ewetish yoli bilen, qiz dostingizgha pasport ishlitip, uni amérikigha élip baralmaysiz. Shunga toy qilishtin burun, qiz dostingiz bilen birge yaki ilgiri kéyin amérikigha barmaqchi bolsingiz, peqet birdin-bir yol qiz dostingizmu sizge oxshash imtihan bérip, amérikigha özi "musteqil" bérishi zörür. Toy qilip bolghan ehwal astida, siz amérika ali mekteplirige iltimas qilip, qobul qilinip qalsingiz, qobul qilish chaqiriq qeghizige ayalingiz (hetta perzentliringiz) ning ismini yazdursingiz bolidu. Bundaq chaqiriq qeghez bilen hemmeylen'ge pasport alghili bolidu we elchixanida wiza iltimasi ongushluq bolsa, pütün aile ezaliri birlikte seper qilishqa bolidu (elwette ilgiri-kéyin seper qilishqimu bolidu.)  Yaki özingiz awal yalghuz amérikigha seper qilip, andin ayalingiz we perzetliringizge teklipname ewetip, bu teklipname bilen pasport, wiza élip, ularni öz yéningizgha ekilip alalaysiz.
 
13-Soal: men TOEFL imtihan bérip layaqetlik bolghan, nöwette xizmette. Hazir boytaq, lékin qiz dostum bar hem toy qilish arzuyimizmu bar. Men awal toy qilaymu yaki awal amérikigha baraymu?
 
Jawap: Bu bir murekkep mesile iken. Lékin her ikki ehwalda, siz tunji qétim amérikigha seper qilghanda, sizning awal yalghuz seper qilishingizni tewsiye qilimen (shexsi tewsiye). Nawada toy qilmay kétip qalghan bolsingiz, tetillerde qaytip kélip toy qiliwalsingizmu bolidu. Kéyin toy xéti bilen ayalingizgha teklipname ewetip, shu arqiliq ayalingizni ekilip alalaysiz. Yaki burun toy qilip bolghan bolsingiz, siz awal méngip tursingiz, ayalingiz keynidin kelsimu bolidu. Tunji qétimdila her ikkinglerning birge seper qilishini tewsiye qilmasliqtiki sewep, deslepki qétimda silerge kélidighan bezi bésimlarni azaytishni közde tutqan. Chünki ezeldin körüp baqmighan, bérip baqmighan bir yerge ayalingizni birge élip kelsingiz, deslipide qeyerde yétip-qopush, nime yep, nime ichis mesilisini oylashmay bolmaydu. Nawada sizning amérikida birer yéqin uruq-tuqqiningiz yaki dost, tonush-bilishingiz bolsa bu belkim bashqiche bolushimu mumkin. Men yenila özingizning awal yalghuz kélip, özingiz körüp, ehwalinglarni dengsep körüp, andin aile ezalirini ekilishni tewsiye qilimen. Peqet ayalingiz we perzentliringizning, hemmeylenning tunji qétimda uchraydighan bezi artuq awarichiliq, japalarning aldini élish üchün mushuni tewsiye qildim.
 
14-Soal: Men ichkiride kompyutér kespide oqughan, hazir amérikining ichkiridiki bir kompyutér (yumshaq détal) shirkitide ishleymen. Xizmet ornum we teminatimdin razi. Amérikigha bérip oqush arzuyummu bar. Bu xizmettin burunraq qol üzüp, amérikigha oqushqa barsam yaxshimu yaki bir mezgil ishlep, andin barsammu?
 
Jawap: Sizning hazirqi ehwalingiz bek yaxshiken. Hazir xizmitingizni dawamliq ishlep turung. Amérikigha bérishta, imtihan bérish, mektepler bilen alaqe qilish, pasport, wiza élish üchünmu eng kamida birer yilche waqit kétidu, bolmisa uningdinmu köp waqit kétishi mumkin. Shunga xizmitingizni dawamliq ishlep turghach, bulargha teyyarliq qilip, hemme teyyarliq pütkende, andin bu hepte xizmitingizdin istipa bérip, kéler hepte amérikigha qarap uchsingizmu bolidu. Belgilik emili xizmet tejirbisi we xizmet tarixigha ige bolushmu sizning amérika ali mekteplirige, oqush mukapatigha iltimas qilishingizgha köp paydisi bar. Ikki iltimas qilghuchining bashqa ehwalliri oxshash bolghan ehwalda, xizmet tejirbisi barlarning awal qobul qilinish we mukapat élish éhtimalliqi yuquriraq bolushi mumkin. Bolupmu oqush püttürgende, amérika shirketliride xizmet tépishingizgha köp asanchiliq bar. Mesilen siz burun Microsoft yaki Google ning junggudiki shirkitide ishligen bolsingiz, kéyin amérikigha bérip oqup, oqush püttürgende, bu shirketlerning amérikidiki bash shirketliride xizmetke qobul qilinip qélish éhtimalliqingiz yuquriraq bolidu.
 
15-Soal: Beziler bakalawr oqushini Junggoda oqup andin chet elge chiqmisa, u yerning oqushigha yetishkili bolmaydu deydu. Bu rastmu?
 
Jawap: Köpünche ehwalda, bakalawr oqushini Junggoda oqumisimu, chet elning oqushigha yetiship mangghili bolidu. Yaki bolmisa ozi yetisheleydighan sewiyidiki ali mekteptin birni tapqili bolidu. Emma, bakalawr oqushini Junggoda oquwelishning yoqurqidin bashqa chong ehmiyiti bar. U bolsimu, chet elge magestirliq yaki dokturluq oqushi uchun chiqsa, oqush mukapat puligha erishish pursitige ige bolghili bolidu. Amerikida bakalawr unwani uchun oqumaqchi bolghan chet ellik oqughuchilargha hech qandaq oqush mukapat puli yaki iqtisadiy yardem puli berilmeydu (hech bolmighanda men undaq ishni anglap baqmidim).  Bashqa doletler qandaq, men uni bilmeydikenmen.

Amerikida magesterliq oqushigha qarighanda dokturluq oqushigha kelgen chet ellik oqughuchilar uchun oqush mukapat puli yaki iqtisadiy yardem puligha ige bolush pursiti jiq yaxshi.  Shunga, eger imkaniyet yar berse, magesterliq oqushinimu Junggoda oquwelish jiq ewzellikke ige.  Yeni bu oqushqa yetiship mengish-mangalmasliq mesilisi bolmastin, chet elde oqushtiki iqtisad mesilisini hel qilalash-qilalmasliq mesilisidur.  Elwette, dokturluq oqushi adette magesterliq oqushigha qarighanda jiq tes bolidu.  Emma u hergiz kop sanliq Uyghur yashliri uchun yetishelmeydighan derijide emes.


16-Soal: Nime üchün 10 etrapida mektepke iltimas qilimiz? Bir mektepke iltimas qilsaq bolmamdu?
 
Jawab (Bürküt): Amérikining ali maaripida, oqughuchi qobul qilish imtihanliri we qobul qilish jeryanlirini her bir mektep, ayrim-ayrim öz aldigha kontrol qilidu. Bizning wetinimizdikidek merkezlik, bir tutash imtihan élish, qobul qilish ishliri yoq. Yeni her bir mektep öz ishlirigha özi ige.  Shundaq bolghan iken, her bir mektepke ayrim-ayrim iltimas qilish kérek. Bezide hemmisi qobul qilmaydighan, bezide hemmisi qobul qilmaydighan, yene bezide, beziliri qobul qilip, yene beziliri ret qilidighan ehwal mewjut. Siz bilen teng yene dunyaning hemme jayliridin iltimas qilidighanlar bar. Bolupmu junggo we hindistandin eng köp. Mekteplermu eng yaxshi oqughuchini qobul qilishni, sizmu eng yaxshi mekteplerge bérishni arzu qilisiz. Bu ikki terepning teng, ortaq, bir-birini tallishidur. Nawada birla mektepke iltimas qilsingiz, ret qilinip kétish ehwali bolsa, shu yilliq iltimasingiz meghlubiyet bilen axirlishidu. Köprek mekteplerge iltimas qilsingiz, birsidin bolmisa yene birsidin qobul qilinish éhtimalliqi köp yuquri bolidu. Shunga adette köprek mektepke iltimas qilsa yaxshi. Lékin, her bir mektepke iltimas qilsingiz, 1000 yüen etrapida cheqim bolidu. Netijisi nime bolushtin qet'i nezer, bu pul qayturulmaydu. Shunga özingizning ehwaligha qarap, muwapiq sandiki mekteplerge iltimas qilsingiz bolidu. Adette 15-5 ichide bolsa, muwapiq bolushi mumkin. Bek az bolup qalsa, oqushqa bérish éhtimalliqingiz köp töwen bolup qalidu. Beö köp bolup ketse, sizge köp iqtisadi bésim bolup qélishi mumkin.
 

17-Soal: Chet yéraq qishlaqlirimizdiki ottura mekteptin aliy mektepke örlep oqush aldida turghan oqughuchilar üchün éytqanda hazirlinidighan shert bir aq qeghezge oxshishi mumkin, aliy mektepke barghandin kéyinla shert hazirlashning birinji bosoghisigha kirgen bolidu. Bu bosoghigha qedem alghandin bashlap shert hazirlisa belkim anche kichikipmu ketmes, biraq bu yol shert hazirlash üchün nahayiti qisqa bolishi, herbir doqmushlirini bekmu puxta bésishi lazim bolidu, sizning mushu heqte konkirt yol körsitishingizni ümit qilimen.

Jawab (Bürküt): Konkirt yol konkirt oqughuchigha qarap oxshash bolmaydu. Lékin uning melum qanuniyiti bolidu:

Bashlan'ghuch we toluqsizda öz ana tili - uyghur tiligha pishshiq bolush. Xenzu tiligha belgilik asas sélish. Toluqsizdiki matématika, fizika, ximiye, biologiye, xenzu tili qatarliqlarnimu puxta ögünüp méngish. Bolmisa toluqta sörilip qalidighan ish bolup qalidu.

Toluq otturida, xenzu tiligha puxta asas sélish. Bolsa sewiye imtiahanisigha qatniship, layaqetlik bolush.

Matématika, fizika, ximiye, biologiye qatarliq asasliq derslernimu puxta igellesh. Bolmisa ali mektepte sörilip qalidu. Uningdin bashqa, yuqurida tilgha élin'ghan tebii pen kitaplirining xenzuche nusqisini we bashqa xenzuche paydilinish kitaplirini (lughetning yardimi bilen) körüp chüshineleydighan bolush. Shundaq qilip ali mektepke chiqquche, xenzuche kespiy kitaplarni körelishke puxta asas sélish. Ali mektepke bérishta, mektep we kespni yaxshi tallash.

Ali mektepke chiqipla in'giliz tili ögünüshni bashlash. Teyyarliq mezgili bolsa, mumkin qeder, xenzuche sewiye imtihanisi we bashqa asaslarni körsitip, xenzuche derske qatnashmasliq yaki sinip atlap oqushni qolgha keltürüsh. Kéyin barliq kespiy derslerni yaxshi ögünüsh. Mektep püttürgiche in'gilizche xelqara imtihanlargha qatniship, yaxshi netije élishni qolgha keltürüsh.


 

© Copyright 2004 Uyghur Meripet Homepage: http://www.Meripet.com