Chüsh we Chüsh Örüsh Heqqide


Erkin Sidiq

2014-yili 10-ayning 17-küni

Kona yéziq nusxisi:

http://bbs.izdinix.com/thread-60247-1-1.html

PDF Nusxisi : http://www.meripet.com/PDF/20141017_islam_dreams.pdf

 

Nurghun kishiler chüsh we uning yéshimige nahayiti qizidu.  Men yéqinda Yasir Qazining léksiyilirini izdesh jeryanida, uning 2014-yili 3-April küni torgha chiqarghan, chüsh we uning yéshimi heqqidiki bir léksiyisini uchurtup qaldim [1].  Hemde uning mezmunini intayin yaxshi kördüm.  Bashqa qérindashlarningmu paydilinishi üchün, men mezkur maqalida ashu léksiyining mezmunini tonushturimen.  Yasir Qazi bu léksiyini özi proféssorluq qiliwatqan Amérikidiki aliy mektep «Elmeghrip Instituti» [2] da ders qilip sözligen iken.  Men bu qétim paydilan’ghan sin höjjiti jem’i 25 minutluq bolup, u bir qétimliq dersning bashlinish qismi iken.

 

Méning töwende tonushturidighinim Yasir Qazining léksiyisining mezmuni bolup, eger uninggha özemning  köz-qarishini qoshmaqchi bolsam, uni bir «Ilawe» sheklide qoshup qoyimen. Maqale mezmunining sistémiliq bolushini qolgha keltürüsh üchün, men bezi jaylarda Yasir Qazi léksiyisi mezmunining tertipini azraq özgerttim. 

 

Chüsh intayin muhim.  Biz Qur’an we sünnettiki mezmunlardin chüshning töwendikidek 3 menbedin kélidighanliqini biliwalalaymiz: Allah, sheytan, we özimizning tesewwuri.  Shunga chüshning 3 xil katégoriyisi bar. 

 

 

  1. Allahdin Kélidighan Chüsh

 

Uning biri Allahdin kélidighan chüsh bolup, peyghemberler köridighan chüshlerning hemmisi Allahdin kelgen bolidu.  Yaki bashqiche qilip éytsaq, peyghemberler köridighan chüshler peqet Allahdin kelgen chüshlerdinla ibaret bolup, ular qalghan ikki xildiki chüshlerni körmeydu.  Yeni Allah peyghemberlerni qalghan ikki xil chüshlerdin saqlaydu.  Shunglashqa peyghemberler körgen her bir chüsh Allahdin kelgen wehiy bolup hésablinidu.  Mesilen, Ibrahim eleyhissalam özining bir qétimliq chüshide özining oghli Isma’ilni qurban qilghanliqini köridu. Bundaq chüshler peqet peyghemberlergila tewe emes bolup, bu xildiki chüshlerni peyghember emes kishilermu köridu. 

 

Allah ata qilghan chüsh her waqit choqum ijabiy chüsh bolidu.  Undaq chüshler choqum bir xil yaxshi xewerni mezmun qilghan bolidu.   Shunglashqa siz undaq chüshlerni körgende, chüshingizdin qorqup oyghinip ketmeysiz.  Bundaq chüshler xosh-xewer, kishini ümidlendüridighan uchur, yaki emeliyetke uyghun kélidighan ishlardin terkip tapqan bolidu. 

 

Bundaq chüshlerning bir alamiti shuki, siz ashundaq chüshtin birni körüp bolup oyghan’ghanda, u chüsh sizge xuddi hazirla yüz bergen ehwaldek tuyulidu.  Siz bundaq chüshtin qorqup ketmeysiz.  Eger siz körgen bir chüsh qorqunuchluq bolidiken, u Allahdin kelgen chüsh bolmastin, sheytandin kelgen chüsh bolidu. 

 

Allahdin kélidighan chüshlerning ikki xili bar.  Uning biri mundaq:  U chüshning ichide siz özingiz bar bolisiz, hemde u chüshte bolghan ishlar ré’alliqqa uyghun ishlar bolup, uningda héch qandaq simwolizm bar bolmaydu.  Siz undaq chüshlerde kelgüside yüz béridighan bir ishni körisiz.  Mesilen, Muhemmed salla Allah alayhi wa sallam hijiriye kaléndarining 6-yili Medinide turup, kebining etirapida tawab qilghan chüshtin birini köridu.  Bu chüsh simwolluq chüsh emes bolup, Allah Qur’anda peyghembirimizge «Sen körgen bu chüsh rast chüsh  bolup, sen choqum Mekkige barisen», deydu.  Bundaq chüsh adettiki kishilerge nahayiti az uchraydighan bolup, peyghemberlerge bolsa köp uchraydu.

 

Aishe animizning riwayet qilishiche, Allah Qur’anni wehiy qilip chüshürüshke saq 6 ay qalghan kündin bashlap, peyghember eleyhissalam her küni axshimi mushu xildiki chüshlerni köridu.  Bundaq chüshni körüsh birer künmu toxtap qalmaydu.  Her küni axshimi etisi yüz béridighan ishlarni chüshide köridu.  Chüshide bir adem bilen körüshken bolsa, etisi heqiqetenmu ashu adem peyghember eleyhissalam bilen körüshkili kélidu.  Bu Allahning bir muhim ishning yüz béridighanliqidin peyghember eleyhissalamgha aldin bisharet berginidur.  Allahning bir ulugh ishning yüz béridighanliqidin, sürilerning wehiy qilinidighanliqidin aldin xewer berginidur. 

 

Allahdin kélidighan 2-xildiki chüshte simwolizm bar bolidu.  Bu xildiki chüshler köprek uchraydu.  Bundaq chüshlerni peyghemberler we adettiki ademlerning her ikkisi köridu.  Siz bundaq chüshte körgen her bir nerse bashqa bir nersige wekillik qilidu.  Mesilen, Yüsüp eleyhissalamning riwayitide, bir sémiz kala bir mol-husulluq yilgha wekillik qilip, bir uruq kala bolsa bir qurghaqchiliq yiligha wekillik qilidu.  Bu xil chüshte körgen bir nerse bashqa bir nersining simwolidur.  Bu xildiki chüshlerde körgen her bir nerse, her bir reng, her bir haywan, her bir körünüsh, her bir ösümlük, we her bir jansiz nersilerning hemmisi bashqa melum bir nersige wekillik qilidu. 

 

 

  1. Ozimizning Tesewwuridin Kélip Chiqidighan Chüsh

 

Ikkinchi xildiki chüsh özimizning tesewwuridin kélidu.  Mesilen, eger siz melum bir tiptiki ésil mashinidin birni élishni pilanlap, kündüzi ashu ishni nahayiti köp xiyal qilsingiz, uxlighanda ashu mashinidin birini heydep chüsh körüshingiz mumkin.  Chüshni tetqiq qilidighan alimlar bar.  Ularning déyishiche, özimizning tesewwuri keltürüp chiqiridighan mushu 2-xildiki chüsh her küni axshimi yüz béridiken.  Biz axshimi uxlighanda bir qanche basquchlarni bésip ötidighan bolup, uning biride hemme ademler chüsh köridu.  2-xildiki chüshning alahidiliki shuki, siz emdila oyghan’ghanda körgen chüshingiz sizge xuddi hazirla yüz bergen ishtek tuyulidu.  Emma, bundaq tuyghu 5 minuttin kéyinla pütünley yoqap kétidu. 

 

Ikkinchi xildiki chüshlerning yene bir alahidiliki, undaq chüshlerge tashqiy impulislar tesir körsiteleydu.  Mesilen, siz uxlawatqanda birsi sizning yüzingizge su quysa, siz chüshingizde bir derya yaki kölning süyide gherq bolup kétishingiz mumkin.  Siz uxlawatqanda birsi sizni oyghitish üchün ismingizni chaqirsa, umu sizning chüshingizge tesir körsitidu. 

 

Bundaq chüshlerning yaxshiliq yaki yamanliq bilen héch qandaq munasiwiti yoq bolup, ularni pütünley sizning öz tesewwuringiz keltürüp chiqiridu.  Bundaq chüshning alahidiliki, siz uni oyghunup 5 minut ötkendin kéyin pütünley untulup kétisiz. 

 

 

  1. Yaman Chüsh yaki Qara Bésish

 

Üchinchi xildiki chüsh yaman chüsh yaki qara bésish bolup, undaq chüshlerni sheytan keltürüp chiqiridu.  Undaq chüshlerning bir alamiti shuki, ular sizni qorqutidu.  Siz bundaq chüshte rezil ishlarni körisiz.  Ademni seskendüridighan ishlarni körisiz.  Birer yéqin qérindishingizning wehshiylerche öltürülginini körisiz.  Birer mashina weqesige uchraysiz.  Sizni birer yirtquch haywan qoghlaydu.  Bu xildiki chüshlerni sheytan sizning achchiqingizni keltürüsh yaki sizning chishingizgha tégish üchün wujutqa keltüridu.  Bu xildiki chüshlerde körülgen ishlar emeliyette zadila yüz bermeydu.  Shunga bundaq chüshlerge hergizmu ishenmeslik kérek.  Peyghember eleyhissalam yaman chüsh körgende yaki qara basqanda uni bashqilargha sözlep bermeslikni éytqan.  Buning sewebi, sheytanning bundaq chüshlerni keltürüp chiqirishidiki seweb sizni exmeq qilip oynashtinla ibarettur. 

 

Bir qétim bir sahabe peyghember eleyhissalamning aldigha kélip, «Men axsham mundaq bir chüsh kördum:  Bir adem méning kallamni késiwetküdek.  Yerge chüshken kallam méning aldimda domilap qachqudek, men bolsam özemning kallisini arqisidin qöghlighudekmen.»  Shuning bilen peyghember eleyhissalam uninggha: «Axsham sheytanning sen bilen qandaq oynighanliqini bashqilargha dep yürme.»  Bundaq chüshlerning bir alamiti, siz chüsh körüp bolghandin kéyin, nahayiti qorqup oyghunup kétisiz.  Terlep kétisiz. 

 

Sheytan buningdin kéyin yüz béridighan ishlarni bilmeydu.  Shunga sheytan sizni qara basturghanda siz chüshingizde körgen ishlar hergizmu etisi yaki uningdin kéyin emeliyette yüz bermeydu.  Eger siz chüshingizde bir mashina weqesige uchrap, etisi ras shundaq bolarmikin, dep ishqa barmisingiz, siz del sheytanning damigha chüshken bolisiz.  Bundaq ehwalda siz sheytan’gha ishen’gen bolghachqa, u sizni zangliq qilidu.  Biz bundaq chüshlerge hergizmu pisent qilmasliqimiz kérek.  Buning sewebi sizni qara bésip, chüshingizde körgen ishlarning hemmisi yalghan.  Undaq chüshlerning emeliyetke uyghun kélish éhtimalliqi nölge teng.  Eger siz ashundaq chüshlerge ishensingiz, sheytan ghelibe qilghan bolidu. 

 

Peyghember eleyhissalam mundaq deydu:  Eger sizni qara bésip, shuning bilen oyghunup kétidikensiz, Allahdin pana tilishingiz kérek.  Siz béshingizni solgha burap, «tüf» qilip birni tüküriwetsingiz bolidu.  Bu xil tükürüshte sizning aghzingizdin tükürük chiqmaydu.  Siz peqet rast tükürgendiki qiliqnila qilisiz.  Yeni aghzingizdin awaz chiqidu, emma tükürük chiqmaydu.  Bundaq qilishtin meqset, sheytanni qoghliwétishtin ibarettur.  Shundaqla, eger siz sol teripingizni körpige qoyup uxlighan bolsingiz, qara basqanliqtin oyghunup kétip, qayta uxlighan waqitta siz bir qétim örülüp, ong teripingizni körpige qoyup uxlang.  Buning sewebi, sheytan sizni qara basturghanda, u sizning üstingizge chiqip olturuwalghan bolushi mumkin.  Siz «Eyzubinla» dep örülsingiz, sheytan qéchip kétidu.  Eger ehwal bek éghir bolidiken, siz orningizdin turup, ikki reket namaz oquwéting.  Shundaqla, körgen chüshingizni héch kimge démeng.  Ayalingiz, éringiz, yéqin dostingiz yaki tughqanliringizning héch qaysisigha démeng.  Bundaq chüshlerni bashqilargha déyishke zadila bolmaydu.

 

Birsi bilen jinsi munasiwet qilip chüsh körgen bolsingiz, bundaq chüshnimu sheytan keltürüp chiqarghan bolidu.  Bundaq chüshlerni körüsh gunah emes.  Emma, Islam qanunining telipi shuki, eger siz ashundaq chüshtin birni körgen bolsingiz, oyghan’ghanda siz choqum bir qétim teret éliwétishingiz kérek.  Qandaq chüshlerni körüshni siz özingiz kontrol qilalmaysiz. Shunga mushundaq chüshlerni körüsh gunah emes.  Shundaqla, bundaq chüshlerni sheytan keltürüp chiqiridighan bolghachqa, peyghemberler bundaq chüshlerni körmeydu.  Adettiki kishilerning bundaq chüshlerni körüshi bir xil tebiiy hadise bolup, uning üchün özini gunahkar hésablashning hajiti yoq.  Bundaq chüshlernimu sheytan keltürüp chiqarghan bolghachqa, biz ularni bashqilargha dep yürsek bolmaydu. 

 

 

  1. Chüshni Örüsh Mesilisi

 

Yuqirida déyilginidek, Allahdin kélidighan 2-xildiki chüshte simwolizm bar bolidu.  Chüshte körgen bir nerse bashqa bir nersige wekillik qilidu.  Bundaq chüshlerni örüsh hemme ademning qolidin kelmeydu.  Bundaq chüshlerni hemme adem chüshendürüp bérelmeydu.  Mana bu chüshni toghra örüp bérish mesilisidur. 

 

Nurghun kishiler chüsh örüshni birer kitabqa qarap öginiwalghili bolidu, dep oylaydu.  Emeliyet bolsa hergizmu undaq emes.  Siz hergiz chüsh örüsh heqqidiki birer kitabni oqup qoyupla, chüshni toghra örüp bérelmeysiz.  Nurghun Islamgha ait kitablar qoyulghan kitabxanilarda «Chüsh Örüsh Lughiti» yaki «Chüsh Örüsh Qamusi» dégen’ge oxshash Islam dini kitabliri bar.  Mesilen, Ibin Sirinning namida neshir qilin’ghan mushundaq kitabtin birsi bar.  Emma, Ibin Sirin undaq kitabtin birerni yézip baqqan emes.  Ibin Sirin wapat bolup, 700 yil ötkendin kéyin, bashqa kishiler uning namida ashundaq kitabtin birni teyyarlap basturghan.  Siz herqandaq bir Islam kitabxanilirigha barsingiz, chüsh örüsh heqqidiki kitablardin birerni choqum tapalaysiz. 

 

Mundaq bir ishni  nahayiti ochuq jakarlashqa bolidu: Chüsh örüsh bir bashqilargha ögetkili bolidighan ilim emes.  Uni bir adem yene bir ademge ögitelmeydu.  Peqet Allah tallighan kishilerla ögineleydighan bir qanche ilim bar bolup, chüsh örüsh bolsa shularning biridur.  Men Medinide 10 yildin artuq oqudum.  Aliy mektepte ötülgen dersler ichide fiq (Islam qanunliri), hedis we eqide qatarliq penler heqqidiki dersler bar.  Emma chüsh örüshni ögitidighan derslerdin birersimu yoq.  Chüsh örüsh heqqide kishiler öz aldigha élip baridighan, özining öyide ötidighan derslermu yoq.   Bundaq bolushtiki seweb, chüsh örüsh kitab qilip yazghili bolidighan ilim emes.  Peqet Allah tallighan az sandiki kishilerla bu ishni qilalaydu.  Bu heqte Allah bir ayette éniq qilip mundaq deydu: «Chüsh örüshni sanga men ögitimen.»  Shunglashqa, bezi kishiler chüshlerni öriyeleydu, bezi kishiler bolsa undaq qilalmaydu.  Siz Allahgha du’a qilip, ashundaq bir qabiliyetni Allahdin tilisingiz bolidu.  Emma siz uni birer kitabni oqush arqiliq öginelmeysiz.  Chüsh örüsh fiq, hedis we dorigerlik qatarliq penlerge oxshimaydu. 

 

Chüsh örüsh bir xil ré’al nerse bolup, peyghemberler, bolupmu Yüsüp eleyhissalam bu xil qabiliyetke toluq ige bolghan.  Muhemmed peyghembirimizmu bu ilimge toluq ige bolghan. 

 

Bir adem chüshlerni toghra örüp bérelemdu-yoq, buni qandaq bileleymiz?  Buni biz burunqi emeliyetke asasen bileleymiz. 

 

Muhemmed eleyhissalam bizdin Allahdin kelgen yaxshi chüshlerni körgende, uni peqet özimiz ishinidighan yéqin kishilirimizgila éytishni telep qilghan.  Buning sewebi, yaxshi chüshni bashqilar anglisa, ularning hesetxorluqi yaki körelmesliki qözghulup qélishi mumkin.  Yüsüp eleyhissalamning riwayetliride ene shundaq ehwallar bar. 

 

Siz yaxshi chüshliringizni yéqinliringizgha dégende, eger siz ularni qandaq örüshni bilmisingiz, hergizmu yéqinliringizgha özingizning chüshini örüp bermeng.  Sewebi, bundaq ehwalda chüshni xata örüp qoyush xewpi bar.  Bir hediste riwayet qilinishiche, Muhemmed eleyhissalam mundaq dégen:  Örüp bermigen chüsh bir dane uchup yürgen qushqa oxshaydu,  örüp bergen chüsh bolsa, yerge chüshüp ketken qushqa oxshaydu.  Chüshlerni choqum chüsh örüshke salahiyiti toshidighan kishilerla örüp bérishi kérek.  Siz chüshingizni yéqinliringizgha désingiz bolidu.   Emma sizning yéqinliringizning chüsh örüshke salahiyiti toshmaydiken, ular chüshingizni anglapla qoyushi, hergizmu uni örüp bermesliki kérek. 

 

Yuqirida tilgha élin’ghinidek, burunqi emeliyetke asasen, kimning chüsh örüshke sherti toshidighanliqini bileleymiz.  Siz Allahgha qanche yéqin bolsingiz, sizning chüshni toghra örüp bérish qabiliyitingizmu shunche yaxshi bolidu.  Emma, peyghemberlerdin bashqa kishiler chüshlerni yüzde-yüz toghra örüp bérelmeydu.  Peqet peyghemberlerla chüshlerni yüzde-yüz toghra örüp béreleydu.  Ser’i Buharidiki bir hediste mushuninggha ait bir mezmun bar.  Yeni, bir hediste riwayet qilinishiche, bir qétim Muhemmed eleyhissalam sahabelerge özining bir chüshini sözlep béridu.  Peyghember eleyhissalamning sözi axirlashqan haman, hezriti Abu Bekr héliqi chüshni özining örüp béqishini telep qilidu.  Peyghember eleyhissalam maqul bolghandin kéyin, hezriti Abu Bekr «Mawu nerse mawu nersige wekillik qilidu.  Awu nerse awu nersige wekillik qilidu» dep héliqi chüshni örüp chiqidu.  Axirida u peyghember eleyhissalamdin «Méning öriginim toghra boldimu?» dep soraydu.  Muhemmed eleyhissalam bolsa «bezi jayliri toghra boldi, yene bezi jayliri bolsa toghra bolmidi», dep jawab béridu.  Démek, hezriti Abu Bekrdek ulugh kishilermu bir chüshni toghra örüp bérelmigen tursa, biz bashqa insanlardin bir chüshni yüzde-yüz toghra örüp bérishni telep qilalmaymiz.

 

Chüsh örüshni kitabtin ögen’gili bolmasliqning bir sewebi, oxshash bir simwol oxshimighan jem’iyet, oxshimighan millet, we oxshimighan medeniyetlerde öz-ara oxshashmaydighan nersilerge wekillik qilidu.  Shunglashqa siz bir kitabni échip, melum bir simwolning némige wekillik qilidighanliqi heqqide toghra höküm chiqiralmaysiz.  Mesilen, bir janggalda turiwatqan ademning chüshidiki bir dane tawuz su we hayatliq  qatarliqlargha wekillik qilishi mumkin.  Emma sheherde yashawatqan bir adem chüshide körgen bir tawuz bolsa undaq nersilerge wekillik qilmasliqi mumkin. Qisqisi, simwol medeniyet bilen munasiwetlik.  Shunglashqa birer uniwérsal «chüsh örüsh qamusi» ning mewjut bolushi mumkin emes.  Chüsh özingizge tewe nerse bolup, uni özingiz yashawatqan jaydiki chüsh örüshke salahiyiti toshidighan bir kishige dep, uningdin chüshingizni örüp bérishni iltimas qilsingiz bolidu.  Emma bashqa bir jay yaki bashqa bir jem’iyettiki kishidin undaq qilishni telep qilsingiz, siz toghra jawabqa érishelmeysiz.

 

Bir hediste riwayet qilinishiche, Muhemmed eleyhissalam mundaq deydu:  «Allahdin kélidighan chüshtin bashqa ishlar peyghemberlikning sirtigha tewe emes bolup, undaq chüshler peyghemberlikning 46 den bir qismini teshkil qilidu. »  Bu sözning menisi, bir peyghember bolush üchün, siz jem’i 46 ishni qilisiz.  Ularning biri heqiqiy chüshlerni körüshtin ibaret.  Qalghan 45 ish peyghember emes kishiler yaki insanlar qilidighan ishlar emes bolup, peyghemberlerla qilidighan ishtur.  Ularning biri Jibrélning chüshishi, yene biri bolsa perishtiler bilen körüshüsh qatarliqlar bolushi mumkin.  U ishlarni biz bilmeymiz.  Emma peyghemberlerning hemmisi ashu 46 ishni qilidu.  Qalghan 45 ishning ishiki insanlar üchün qiyamet künigiche pütünley taqiwétilgen bolup, peqet bir ishning ishikila insanlar üchün ochuq.  U ish bolsa yaxshi chüshlerni körüshtin ibarettur.   

 

Bundaq nisbet nedin kelgen?  Ölimalarning déyishiche, bu ishni chüshinish üchün Muhemmed eleyhissalamning hayatigha qarap baqsaq bolidu.   Allah Muhemmed eleyhissalamgha Qur’anni jem’i 23 yil ichide wehiy qilip chüshürüp bolghan.  Yeni, Medinide 10 yil, Mekkide 13 yil shundaq qilghan.  Hemde wehiyning chüshüshige del 6 ay waqit qalghan kündin bashlap, Muhemmed eleyhissalam her küni axshimi rast chüshlerni körgen.  Alte ay déginimiz yérim yilgha yaki 0.5 yilgha teng bolup, 23 yilni 0.5 yilgha bölsek, del 46 ge teng bolidu.  Yeni, 0.5/23 = 1/46.  Bu yerdiki «/» bölüsh belgisidin ibaret. 

 

Yasir Qazi léksiyisining mezkur sin höjjiti mushu yerde axirlashti.  Yasir Qazi bu mezmunni Yüsüp eleyhissalamning chüshi heqqidiki bir léksiyining bash qismida sözligen iken.

 

 

Qoshumche 1: Musulman Ayallarning Kiyim Körgezmisi

 

Birleshme xewer agéntliqi (Associate Press) ning 2014-yili 10-ayning 9-küni xewer qilishiche, yéqinda Ereb Birleshme Xeliplikining Dubey shehiride bir Musulman ayalliri üchün lahiylen’gen kiyimlerning körgezmisi ötküzülgen [3].  Bu körgezmige Amérikidin Malaysiyaghiche bolghan nurghun döletlerdin kelgen méhmanlar qatnashqan.  Bu qétimqi paaliyet Musulman ayallirining zamaniwiliqqa maslishish yolida alghan bir yéngi qedimi bolup, mezkur xewerde déyilishiche hazir pütün dunyadiki Musulman ayallirining bundaq kiyimlerge bolghan qiziqishi zor derijide küchiyiwétiptu.  Amérika Kaliforniye shtatining Los En’gélés shehirining özidila aldinqi 3 ay ichide mushundaq kiyimdin 4000 qur kiyim sétiliptu.  Men maqalining axirigha ashu körgezmining bir qisim körünüshliri körsitilgen resimlerdin bir qanche parche qoshup qoydum.

 

 

Qoshumche 2: Yasir Qazining Soali

 

Yasir Qazi 10-ayning 13-küni özining Feyisbuk uchur sehiypisige bir uchur yollap, dunyaning her qaysi jayliridiki Musulmanlardin yardem soraptu.  Yeni u hazir Musulmanlar duch kéliwatqan zamaniwi eqideshunasliq mesililiri heqqide bir qatar léksiyilerni sözlimekchi boluptu.  Mesilen, en’eniwi eqideshunasliq eserliride, kishiler Allah, teqdirshunasliq we shuninggha oxshash mesililer üstide toxtalghan.  Bügün Musulmanlar duch kéliwatqan mesililer bolsa «Islamning heq ikenlikini biz qandaq bilimiz?», «Adem eleyhissalam we Hawa animizning riwayetlirige ishen’gili bolamdu?» , «Allah shunche méhriban bolsa, yene néme üchün déngiz quyunliri, sunamilar we yuqumluq késeller yüz béridu?» dégendek soallarni öz ichige alidu.  Shunga Yasir Qazi töwendiki soalning jawabini bilip baqmaqchi iken:  «Hazir Musulmanlar eng köp soraydighan zamaniwi eqideshunasliqqa ait soallar qaysila?»  Men eslide bu ishni tordashlargha mushu yazma arqiliq xewer qilip, andin chüshken jawablarni xulasilap, Yasir Qazining Feyisbuk sehiypisige yézip qoyay, dep oylighan idim.  Emma, dunyadiki Musulmanlar bu chaqiriqqa nahayiti küchlük inkas qayturghan bolup, Yasir Qazi jawab yighishni 10-ayning 15-küni axirlashturuptu.  Gerche bu ishning waqti ötüp ketken bolsimu, men tordashlarni mushundaq bir ishning bolghanliqidin xewerlendürüp qoyush meqsitide bu mezmunni qoshup qoydum.

 

 

Muraji’et:

 

Dindin yaxshi xewiri bar, hemde imkaniyiti yar béridighan tordashlardin mezkur maqalida tilgha élin’ghan ayet we hedislerni maqalining axirigha inkas sheklide yézip qoyushini ötünimen.  Yene bir ish, men bu qétim mezkur maqalini dindin yaxshi xewiri bar birer yéqinimgha körsitishke ülgürelmey qaldim.  Shunglashqa tordashlarning maqalida körülgen xataliqlar üchün méni epu qilishini ümid qilimen. Rehmet!

 

Bu maqalini héchkimdin sorimay, menbesini bergen asasta bashqa her qandaq torgha chiqarsingiz, yaki élkitabqa oxshash bashqa her qandaq shekilde ishletsingiz boluwéridu. Bu maqale barliq uyghurlargha mensup.

 

 

Paydilinish Matériyalliri:

 

[1] what are Dreams and their interpretations by Yasir Qadhi

https://www.youtube.com/watch?v=EADC4rzHPYc

 

[2] Almaghrib Institute

http://almaghrib.org/

                       

[3] Make Way For The Muslim 'Hijabi Hipsters'

http://www.huffingtonpost.com/2014/10/09/hijabi-hipsters_n_5961154.html


a1

a2

a3

a4

a5

a6

a7