Erkin Sidiq: Netijilik Uyghurlar (18): Nuraniye Raxman (Türkiye)

Netijilik Uyghurlar (18)

Gérmaniyilik sha’ir we roman yazghuchisi Yohan Wolfgang (Johann Wolfgang von Goethe) bir qétim mundaq dégen: «Oylash asan, ish qilish tes, we adem oylighan ishni emeliyette qilish bu dunyadiki eng tes ish.» Nishan tikligen kishiler ichide öz nishanini emelge ashurush yolida emeliy ish qilghanlarning shunche az bolushidiki seweb ene shu bolushi mumkin. Grég Harris (Gregg Harris) bu heqte bir qétim 100 adem üstidin tekshürüsh élip barghan bolup, ularning ichidiki 67 kishi özliri üchün nishan tikligen. Emma, ashu 67 ademning ichidiki aran 10 kishi özlirining nishanlirini emelge ashurush yolida ré’alliqqa uyghun kélidighan pilanlarni tüzüp chiqqan, hemde ashu 10 ademning ichidiki aran 2 kishi özlirining pilanlirini ijra qilip, eslidiki nishanlirini emelge ashurghan.

Öz nishaningizni ishqa ashurushtiki eng muhim usul (trick) ish bashlashtin ibaret. Amérikining 32-nöwetlik prézidénti Franklin Rozwélt (1882-1945) mundaq dégen: «Bir usulni biliwélip, uni sinap béqish bir eqelliy sawat. Eger u usul meghlup bolidiken, uni étirap qilip, yene bir usulni sinang. Bu yerdiki hemmidin muhim nerse bir ishni sinap béqishtin ibaret.» Bu bir nahayiti yaxshi meslihet. Bundaq ishlarda siz bir mukemmel adem bolmisingizmu boluwéridu. Siz peqet qilmaqchi bolghan ishingizda ilgirilesh hasil qilsingizla boldi. Bu jehette Junggoluqlarning mundaq bir maqal-temsili bar: «Asta méngip qélishtin qorqmang, emma orningizda jim turup qélishtin qorqung.»

Yuqiridiki mezmun men «Netijilik Uyghurlar (9)» dégen maqalemde tonushturghan Jon Maksiwél (John C. Maxwell) ning «Maksiwél künlük oqushluqi» dégen kitabining 135-béti (1-May küni) ning mezmuni bolup, uning témisi «Emeliy Heriketke Ötüsh» din ibaret.

Yuqiridiki mezmunda men özümning burunqi maqaliliride otturigha qoyup we tekitlep kelgen bir qisim uqumlar nahayiti obdan xulasiliniptu.

Özümning burunqi bir qanche yazmilirida tilgha alghinimdek, men 1970-yilliri Aqsu 1-Ottura Mektepte oquwatqan waqtimda mundaq 3 ishni özümge nishan qilip tallighan idim:

Men u chaghda oqushning eng yuqiri pellisining néme ikenlikini bilmeyttim. Kéyin uni bilip, oqushning «doktor-ashti» basquchini tamamlighuche oqudum. Qalghan ikki jehettiki ehwalimni méningche köpinche tordashlargha bilidu.

Bir qisim ademler yash waqtida pul üchün salametlikini qurban qilidu. Yashan’ghanda bolsa salametliki üchün pulini qurban qilidu.

Men yéshimning chongiyishigha egiship, yuqiriqidiki nishanlarnimu özgertip mangdim. Hazirqi nishanlirim:

--(1) Kesipte dawamliq öz iqtidarlirimni eng yuqiri derijide toluq jari qildurup méngish. Men burun özümge «Dem élishqa chiqquche 100 parche ilmiy maqale élan qilish» dégen bir kichik nishanmu turghuzghan idim. U nishan emelge éship, maqale sani hazir 115 boldi.

--(2) A’ilini bextlik saqlash, we perzentlerning turmush we kesipte muweppeqiyetlik bolushigha yardem qilish.

--(3) Bar imkaniyetlerdin toluq paydilinip, yurtimiz we xelqimiz üchün xizmet qilish. Méning mushundaq maqalilerni teyyarlishim ashu nishanning ichidiki bir ish. Eger yolum ochuq bolghan bolsa, men Uyghur diyarida Uyghur tili bilen In’gliz tilida ders ötidighan mektep qurush, we Uyghur putbol komandisi qurush dégen’ge oxshash ishlargha meblegh salghan, hemde yiligha bir-ikki ay Uyghur diyaridiki aliy mekteplerde heqsiz ders ötüp bergen bolattim.

Men yéqinqi bir qanche yil ichide tenni saghlam tutush jehettimu bir az oylandim we izdendim: Qandaq qilghanda yéshi 55 tin ashqan ademler saghlam öteleydu? Men hazir bu jehette kündilik adet süpitide mundaq üch ishni qiliwatimen:

Adem yashqa chongayghanda, bedini telep qilidighan quwwet yaki énérgiyening miqdarimu jiq aziyip kétidighan bolghachqa, istémal qilidighan tamaqning miqdarinimu tedrijiy halda azaytip méngish kérek iken. Tamaqni jiq yewélip rahet öteleydighan ademler intayin az. Yashqa chong kishiler asasen öz nepsini kontrol qilalmasliq sewebidin tamaqni köp yewalidu. Shunglashqa her bir ademning aldida «nepsini qandurush kérekmu, yaki salametlikning éhtiyajinimu?» dégen tallash bar. Aqilane ish qilidighan ademler choqum kéyinkini tallaydu.

Nechche ayning aldida men bir yerdin bir En’gliyelik doxtur élip barghan ilmiy tetqiqatning netijisini anglidim. Uningda déyilishiche, adem her heptide ikki kün, ariliqta oxshash waqit qaldurup «Roza tutsa», ashqazanning yükini yénikleshtürüp, nurghun késellerning aldini élishqa paydiliq iken. Bu yerdiki «Roza tutush» Islam dinidiki ish bilen oxshash bolsimu, yaki oxshash bolmisimu bolidighan bolup, peqet heptide 2 kün chüshlük tamaq yémisingizla bolidiken. Bizning aditimiz boyiche, biz asasen her hepte Shenbe-Yekshenbe künliri méhmandarchiliq qilimiz. Öyimizge méhmanlar kelmigen, yaki bashqa bireylenning öyige méhmandarchiliqqa barmighan ehwal astidimu, dem élish künliri öz öyimizde hepte ariliqida yétishelmigen yaxshi tamaqlarni hazirlap yewalimiz. Qisqisi, Shenbe-Yekshenbe künliri aldimizgha adettiki künliri érishelmeydighan yaxshi ta’amlar kélidighan bolghachqa, tamaqni adettikidin köprek istémal qiliwalimiz. Shunglashqa men oylap, eger Düshenbe küni bilen Peyshenbe küni chüshte tamaq yémise, eng yaxshi bolidighanliqini hés qildim. Yeni, Peyshenbe küni Shenbe-Yekshenbe küni köp tamaq yewélishning teyyarliqini qilip, Düshenbe küni yewalghan köp tamaqning tesirini azaytsa, eng muwapiq bolidighanliqini hés qildim. Hemde ashu 2 kün chüshte bir tal alma bilen 2-3 tal yangaq yéyishni adet qiliwaldim. Men u ikki kün chüshte peqet tamaq yémey désem, özümning kündilik wezipisi bek éghir bolghachqa, axirqi bir-ikki sa’et qorsiqim échip kétip, ish ünümi anche yaxshi bolmaydiken. Men baliliq, bashlan’ghuch mektep we ottura mektep dewrlirimde yeydighan nersilerning qisliqidin ach qosaq yürgen waqitlirim köp bolghan. Hazir bolsa bedenni saghlam tutush üchün bezide ach qosaq yüriwatimen.

Men öyimizning 1-qewitidiki garazhda mashinamgha olturup ishqa méngip, idaremdiki ishxanamning aldida mashinidin chüshüp, bu ariliqta asasen yol mangalmaymen. Shunglashqa her küni chüshlük we kechlik tamaqtin kéyin peqet chéniqish üchünla bir az yol méngip, her küni ottura hésab bilen 5 kilométir yol mangimen. U waqitlarni bikar ötküzüwetmey, yaki radi’o xewerlirini, yaki bolmisa Yasir Qazi léksiyisige oxshash nersilerni anglap mangimen. Men bu yil etiyazda 4 qétim a’ilemdikiler bilen taghqa chiqip, her qétim 5 kilométirdin 11 kilométirghiche yol mangdim. Men idarimizde her küni dégidek her xil téxnikiliq yighinlargha qatnishish üchün bir binadin yene bir binagha bérip, 4-qewetkiche chiqip chüshüp turimen. Shundaq waqitlarda men buni bir tebi’iy chéniqish pursiti hésablab, hergizmu liftke chüshmey, binalargha pelempeyde méngip chiqip chüshimen.

Men qilidighan yene bir ish hoylamgha ishlesh. Men bu ishni yil boyi dawamlashturimen. Yéqinqi birer aydek waqittin buyan biz turuwatqan yermu intayin issip kétip, témpératura 35 – 40 gradus ariliqidila turdi. Shundaq bolsimu, xizmettin kéyinki kechlik waqitlar we Shenbe-Yekshenbe künliri qoshnilirimiz hawa tengshigüchte öyini nahayiti soghuq qilip, öydin talagha chiqalmay yürgen waqitlarda, men hoylamda her küni birer sa’et, dem élish künliri bolsa ikki sa’et ishlep, arqa hoylimizdiki étizliqning yérim métir chongqurluqtin töwen qatlimidiki eski topilarni xaltilargha qachilap tashliwétip, tupraqning eng üstige yaxshi topilarni töküp, gül we köktat östüridighan yerlirimni retlep chiqtim. Terlep pütün kiyimlirim höl bolup ketkende, mushundaq tomuz issiqta étizliqta bir-ikki sa’et emes, 8-10 sa’et ishleydighan Uyghur déhqanlirini oylidim. Shundaq qilip, qolumning küchi qalmighuche ishleshni dawamlashturdum.

Menmu aliy mektep hayatimni bashlashtin burun ashu déhqanlarning biri bolup, yéza emgeklirining hemme türlirini qilghan idim. 2007-yili yurtqa barghanda, 5-ayning axirliri Aqsu Onsu Nahiye Aral yézisigha bardim. Méning bir tughqinimning yéshi 90 yashtin éshiptu. Yenila étizliqta ishleydiken. Uning bir chong üjme derixi bar iken. Biz sheherdin kelgen uruq-tughqan, qérindashlar uni bir chong dastixan’gha irghitip, yuyuwétip yéduq. Héliqi tagham bolsa dastixanning ichige chüshelmey, yerge chüshüp ketken üjmilerni tirip, püwliwétip yédi. Bu ehwalni körüp közlirim nemliship ketti. Men oylaymen, pütün ömrini shunche topa, shunche nachar shara’itta ötküzsimu, ularni yene 90 yashtin ashqiche yashitidighan muhim nersilerning biri quyash nuridin ibaret.

Men bu qétim resmiy mezmunni bashlimay turup, bashqa mezmunlarni bir az yézip kettim. Undaq qilishtiki meqsitim, «nishan tiklesh» ning qandaq bolidighanliqini téxiche yaxshi chüshinelmey yürüwatqan ukilar we balilirimizgha azraq misal körsitip bérishtin ibaret.

Men mezkur yazmida bir nishan tiklep, ashu nishanni emelge ashurush yolida emeliy ish élip barghan, bir oqutquchisining ishenchige we qollishigha érishelmigen bolsimu, balisi ikki ayliq bolghanda doktorluq oqushini bashlap, axiri ghelibe qazan’ghan bir singlimizni tonushturimen. Bu qétimqisi men hazirghiche tonushturghan 45-qérindishimiz bolup, töwendiki mezmunni hazir Türkiyede oquwatqan inimiz Hesenjan teyyarlap berdi (Hesenjan ukam, sizge köptin-köp rehmet!).

1-resim: Singlimiz Nuraniye özining yétekchi oqutquchisi bilen bir ilmiy doklat yighinida.

Singlimiz Nuraniye Raxman 1982-yili Ezizane qeshqerde meripetperwer ziyaliy Raxman aka a’iliside tughulghan. Raxman aka ilim söyer adem bolghachqa 6 balisining hemmisini oqutqan. Nuraniye bashlan'ghuch we ottura mekteplerni qeshqer shehiride izchil yaxshi netijiler bilen tamamlighan. U toluq ottura mektep mezgilide bi’ologiye we ximiye derslirini alahide ishtiyaq bilen oqughan. 2000-yili aliy mektep imtihanida yuqiri nomur bilen Shinjang Tébbiy uniwérsitétining dorigerlik kespige qobul qilinip, toluq kursqa oqushqa kirgen. toluq kursta 5 yil oqush dawamida uda 4 yil ayrim-ayrim halda birinchi we ikkinchi derijilik mektep ichi we memliket derijilik oqush mukapatlirigha ériship oqughan. oqush püttürgende oqush püttürüsh netijisi pütün sinip boyiche 1-bolghan. u bu mezgilde aliy mektep In'gliz tili sewiye sinash imtihanida 4-derije (CET-4) din ötken.

Nuraniye toluq kursni ela netije bilen püttürgendin kéyin, 2005-yili aspirantliqqa imtihan bérip, yuqiri netije bilen Shinjang Tébbiy Uniwérsitéti dorigerlik fakultétining dora ösümlük ximiyesi (天然生物化学) kespige magistir aspirantliqqa qobul qilin'ghan. Magistir aspirantliq oqushida diyarimizdiki dorigerlik saheside közge körün'gen shexslerning biri bolghan Rena Qasim xanimni yétekchi oqutquchi qilip tallighan. Magistirliqta oqush dawamida aliy mektep In’gliz tili sewiye sinash imtihanida 6-derije (CET-6) din ötken. shundaqla 2008-yili xenzu oqughuchilar bilen birge qatnashqan dissértatsiye yaqlashta Nuraniyening »Uyghur tébabitide qolliniliwatqan kichik efi kumilichining rak késilige qarshi turush roli« namliq ilmiy maqalisi 1-bolup bahalan'ghan. Nuraniyening tirishchanliq rohi, oqush netijisining alahide yuqiri bolghanliqi, shundaqla maqalisining ilmiy qimmiti yétekchi oqutquchisi we fakultéttiki bashqa oqutquchilarning birdek étirap qilishigha érishkenliktin, Shinjang Tébbiy Uniwérsitétining dorigerlik fakultétigha oqutquchi bolup qélishqa teklip qilin'ghan. Emma dawamliq oqush istiki, shundaqla chet'elde téximu ilghar ma’arip terbiyeside tereqqiy qilish arzusi sewebidin Shinjang Tébbiy Uniwérsitétida qélishtin waz kéchip, Türkiyede oqush yolini tallighan.

2008-yili 9-ayda Nuraniye Türkiyege kélip til oqushqa bashlighan, hemde til ötkilidin muweppeqiyetlik ötken. u Türkiyening akadémik we aspirantliq ma’aripi kirish imtihani bolghan ALES (mezkur imtihan Türkiyede magistir aspirantliq we doktor aspirantliq oqumaqchi bolghan pütün oqughuchilardin élinidighan bir tutash imtihan bolup, matématika we Türkche teng nisbette teshkil qilin'ghan, qiyinliq derijisi bir qeder yuqiri) imtihanidinmu yuqiri nomur bilen ötüp, 2009-yili Türkiyening Gazi Uniwérsitéti saghlamliq bilimliri instituti dorigerlik fakultétining dora ösümlük ximiyesi kespige doktorluqqa qobul qilinidu. Nuraniye doktorluq oqushqa yéngila tizimgha aldurup, fakultéttiki oqutquchilar bilen tonushush üchün ularning ishxanisini ziyaret qilidu. Oqutquchilar bilen bir qur ehwalliship bolghandin kéyin, ichidin bir oqutquchi uninggha mundaq deydu: «Qizim, séning a’ileng bar iken, uning üstige balang emdila ikki ayliq boptu, özge yurtta oqush tolimu tes, mushundaq ehwalda séning oqush püttürelishing natayin.» Emdila körüshken bu oqutquchining emeliy we ré’al gepliri Nuraniyening könglini yérim qilip qoyidu. Nuraniye shundaqtimu özini tutuwalghan halda: «ustaz, gépingiz tolimu orunluq, biraq men özümning yaxshi oqup kételeydighanliqimgha toluq ishinimen» dégen gepni aranla qilalaydu.

Nuraniye özining tirishchanliqi bilen bir yérim yil ichide doktorluqta oqushqa tégishlik derslirini tügitip bolidu. neq mushu waqitta Türkiye aliy ma’arip bashqarmisi uninggha toluq kursta (yeni Shinjang tébbiy Uniwérsitétida) alghan dorigerlik dersining ikki döletning oqu-oqutush tüzümining oxshimasliqi sewebidin yéterlik emeslikini, töt yil oqughan derslirining Türkiye dorigerlik kespi telipige toshmaydighanliqi üchün, toluq kurs oqughuchiliri bilen birge bir yil ders élishni buyruydu. doktorluqta oquwatqan Nuraniye üchün özidin nechche yash kichik toluq kurs oqughuchiliri bilen birge ders oqush nahayiti elem qilsimu, heqiqiy bilim igilesh üchün shekildin bekrek mezmun'gha ehmiyet bérish lazimliqini tonup yétip, chishini chishlep dawam qilidu.

2-resim: Nuraniye özining doktorluq dissértatsiyisini bahalashqa qatnashqan proféssor we ustazliri bilen bille.

Buningdin bashqa, Türkiyening ma’arip sistémisining chet'ellik oqughuchilargha bolghan telipi tüpeylidin, tébabet kesipliride toluq kurs we magistir aspirantliqni Türkiyede oqumighan oqughuchilar Türkiyede tébabet kesipliride doktor aspirantliq oqush we Türkiyede tébabet orunlirida xizmet qilish üchün, kespi dersler oxshash bolmighan nisbette teshkil tapqan «Denklik» imtihan'gha qatnishish telep qilinidu (mezkur imtihan diyarimizdiki «同等学力» ge oxshiship kétidu, bu imtihan'gha qatniship baqqan Türkiyediki Uyghur oqughuchilar birdek mezkur imtihanni Uyghur oqughuchilarning Türkiyede doxtur bolushining we tébbiy kesipliride xizmet qilish salahiyitige érishishning eng qiyin teripi dep qaraydu. chünki bu imtihan pütün kespiy derslerdin bérilidighan bolup, kespi derslerning eng qiyin nuqtiliridin teshkil tapidu. nöwette Türkiyede bu imtihandin ötken Uyghurlarning sani 10 gha barmaydu). «Denklik» imtihan'gha chet'ellerde toluq kursni tébabet kesipliride oqughan, doktorluqni Türkiyede oqumaqchi bolghan Türk oqughuchilarmu qatnishidighan bolup, 2-3 yil arqimu-arqa bu imtihan'gha qatniship ötelmigen Türk oqughuchilarmu xéli köp bolghachqa, bu xil ehwal Nuraniyeni xélila temtiritip qoyidu. shundaqtimu kespiy asasining puxtiliqi we özining tirishchanliqigha toluq ishench qilghan Nuraniye top-toghra bir yil teyyarliq qilidu. axiri 2012-yili dölet boyiche bir tutash élin'ghan bu imtihanda yuqiri netijige ériship, oqutquchi we oqughuchilarni heyran qalduridu.

Oqush, a’ilidin xewer élish, bala béqish, we ash-tamaq étish qatarliq ishlar elwette uning qimmetlik waqtini téximu qis qiliwétidu. u bu jeryanda bir qanche qétim arisaldi bolidu. a’ilining xizmitini qilipla öydila olturush xiyalighimu kélidu. Bu waqitlarda uning éri uni qet'iy qollap quwwetlep, a’ile ishlirigha qolidin kélishiche qarishidu, we ayalining doktorluq oqushini tamamlishigha righbetlendürüp turidu. bu xil meniwi medetlerning türtkiside Nuraniye elwette doktorluq oqushnimu nahayiti yaxshi netijiler bilen dawam qilidu. bu jeryanda TÜBİTAK (diyarimizdiki penler akadémiyisige oxshash organ) ning teshkillishidiki tetqiqat türlirige we yétekchi oqutquchisining tetqiqat türlirige qatnishidu. Shundaq qilip qayta-qayta tejribe ishlesh netijiside, chongqur ilmiy qimmetke ige dissértatsiyisini yézip chiqip, dissértatsiye bahalash hey'etlirining birdek yaxshi bahasigha ériship, Türkiyediki dorigerlik tetqiqati sahesidiki munasiwetlik shexslerning diqqitini qozghaydu. Nuraniyening oqush netijisi we tirishchanliqidin xewer tapqan Türkiyening Siwas wilayitidiki jumhuriyet uniwérsitéti dorigerlik fakultéti mudiri téxi mektepni resmiy shekilde püttürüp bolmastinla Nuraniye bilen körüshüp, uni «jumhuriyet Uniwérsitéti» dorigerlik fakultétigha xizmetke teklip qilidu. Bu yerde shuni tilgha élip ötishimizge erziyduki, eyni waqitta dorigerlik kespige töt oqughuchi bille kirgen bolup, Nuraniye shularning ichidiki chet'ellik oqughuchi idi. Gerche qalghan ücheylen yerlik bolsimu, biz bu qurlarni yéziwatqinimizda ular téxiche oqushini dawam qiliwatqan bolup (yene eng az bir yil dawam qilishi mumkin), teng oqushqa kirgen Nuraniyening arqisida qalidu. uning üstige Nuraniye toluq nomur bilen oqush püttüridu. Nuraniyening bu sawaqdashliri uninggha «Nuraniye biz özimizning tilida, özimizning wetinide séningchilik oquyalmiduq, qérindishim sen heqiqeten Kashigherlik Mehmudning ewladliridin ikensen, biz séningdek qérindashlirimizdin pexirlinimiz», deydu.

«Diyarimizdiki qérindashliringizgha deydighan qandaq sözliringiz bar?» déginimizde, u «Her qandaq ishning özige yarisha qiyinchiliqliri bolidu. elwette oqush, öginishningmu shundaq. Muhim bolghini bu qiyinchiliqlargha berdashliq bérip, sewrchanliq bilen oqushni dawam qilishtur. men bu pursettin paydilinip Türklerdiki ‹ya tamam, ya dawam› dégen hékmetlik sözni qérindashlirimgha sowgha qilimen. yeni bu sözning ya tamam bolup tügishish, ya chidap dawam qilish, dégen menasi bar. méningche bu hékmetlik söz bizning hazirqi halitimizge bekmu mas kélidu. qedimimiz asta bolushidin qet'iynezer, toxtap qalmisaqla, muweppeqiyet haman bir küni bizge mensup bolidu», deydu.

Biz a’ilisining we ikki balisining höddisidin chiqipla qalmay, mushundaq yaxshi netijiler bilen oqush püttürgen qeyser singlimiz Nuraniyege apirin éytimiz. Shundaqla uninggha téximu zor muweppeqiyetler tileymiz.

Singlimiz doktor Nuraniye Raxman hazir a’ilisi we omaq ikki perzenti bilen Türkiyening Siwas shehiride yashawatidu.

Nuraniyening hazirghiche her xil ilmiy tetqiqat zhurnallirida élan qilghan maqaliliri:

[1]Nuraniye Eruygur, Gülderen Yılmaz, Osman Üstün (2014). Analgesic and antioxidant activity of some Echium species wild growing in Turkey. FABAD Journal of Pharmaceutical Sciences.

[2] Fatma Funda Kaya Demirsoy, Nuraniye Eruygur, Erhan Süleymanoğlu (2015). Supramolecular Langmuir monolayers and multilayered vesicles of self-assembling DNA–lipid surface structures and their further implications in polyelectrolyte-based cell transfections. J Nanopart Res (2015) 17: 50.

[3] U Koca, H Çölgeçen, Reheman Nueraniye; Progress in Biotechnological Applications of Diverse Species in Boraginaceae Juss. Biotechnological Production of Plant Secondary Metabolites. I E Orhan (eds), 2012, 200-215.

[4] Reheman Nueraniye, Research on anticancer effect of compound recipe-Xiaoaifei Migao. Master Thesis, Xinjiang Medical University, 2008, Pharmacognosy department.

[5] Reheman Nueraniye, Rena Kasimu.Analysis of essential oil from Alpinia officinarium Hance by GC-MS. Journal of Xinjiang Medical University, 2008, 31(4):441-442”

Nuraniyening doktorluq oqushi jeryanida memliketlik we xelq’araliq ilmiy doklat yighinlirida léksiye qilip sözligen ilmiy maqaliliri:

[1]Nuraniye., Demirsoy, F.F.K. and Süleymanoğlu, E., “Surface Enhanced Raman Spectroscopy of DNA –Lipid Biomolecular Dynamics in Lipid Monolayers and in Nanoscale Virus-Like Lipoplexes Designed for Therapeutic Gene Delivery”. 10th nanoscience and Nanotechnology Conference, 17-21 June 2014, Yeditepe University-İstanbul, Turkey, pp-368. (poster).

[2] Demirsoy, F.F.K., Atalay A., Nuraniye., and Süleymanoğlu, E., “Supramolecular Langmuir-Blodgett Monolayers of Self-Assembling Nucleic Acid-Lipid Surface Structures: From Origin of Life To Nonviral Gene Delivery Nanomedicines”. 10th nanoscience and Nanotechnology Conference, 17-21 June 2014, Yeditepe University-İstanbul, Turkey, pp-257. (poster).

[3] Nuraniye., Demirsoy, F.F.K. and Süleymanoğlu, E., “Surface Enhanced Raman Spectroscopy of DNA –Lipid Biomolecular Dynamics in Lipid Monolayers and in Nanoscale Virus-Like Lipoplexes Designed for Therapeutic Gene Delivery” 2nd International BAU-Drug Design Symposium, 17-19 April 2014, BAU University-İstanbul, Turkey, pp-86. (poster).

[4] Demirsoy, F.F.K., Nuraniye., and Süleymanoğlu, E., “Biophysical Studies on Supramolecular Structures of Self-Assembling Nucleic Acid-Liposome nanopharmaceuticals: Relevance to Gene Delivery and DNA Chromatography” 2nd International BAU-Drug Design Symposium, 17-19 April 2014, BAU University-İstanbul, Turkey, pp-89. (poster).

[5] Nuraniye., Demirsoy, F.F.K. and Süleymanoğlu, E., “Lipopleks Termodinamiği: DNA-Mg2+-Nötral Lipit Etkileşme Enerjisinin Diferansiyel Taramalı Kalorimetre ve İzotermal Titrasyon Kalorimetresi ile Belirlenmesi”. 2. İlaç Kimyası, Üretimi, Teknolojisi ve Standardizasyonu Kongresi, 21-23 March 2014, Antalya-Beldibi, Turkey. (poster).

[6] Nuraniye., and Süleymanoğlu, E.,“Circular Dichroism Spectroscopy and Isothermal Titration Calorimetry of Conformation Specific Genomic DNA-Anticancer Drug Recognitions”. International Multidisciplinary Symposium on Drug research and Development. Nov.28-30, 2013, Antalya-Turkey, pp-46. (poster).

[7] Nuraniye., and Süleymanoğlu, E., “Probing the Structure of Virus-Resembling Nanoscale Lipoplexes with Transmission Electron Microscopy”. International Multidisciplinary Symposium on Drug research and Development. Nov.28-30, 2013, Antalya-Turkey, pp-47. (poster).

[8] Demirsoy, F.F.K., Atalay A., Nuraniye and Süleymanoğlu, E., “Pharmaceutical Perspectives of Supramolecular DNA-Neutral Phospholipid Self-Assemblies Towards Developing Novel Non-viral Gene Delivery Vehicles: Physicochemical Studies, Transfection Efficiencies and Cytotoxicity Profiles”. International Multidisciplinary Symposium on Drug research and Development. Nov.28-30, 2013, Antalya-Turkey, pp-44. (poster).

[9] Nuraniye and Süleymanoğlu, E., “The Use of Vibrational Spectroscopy in Biophysical Characterizations of Novel Non-Viral Lipoplex Gene Delivery Systems”, International Turkish Congress on Molecular Spectroscopy, Sept.15-20, 2013, Istanbul-Turkey, pp-2 (poster).

[10] Nuraniye and Süleymanoğlu, E., “On the Cellular Fate of Non-Viral Nanomedicines for Therapeutic Nucleic Acid Delivery: Fluorescence Approaches”. 13th Conference on Methods and Applications of Fluorescence, Sept. 8-11, 2013, Genova-Italy, pp. 35. (poster).

[11] Nuraniye ;Üstün,O., “Evaluation of wound healing activity of Echium italicum L. growing in Turkey.” 20th Symposium on Natural products from Medicinal Plants, Oct. 10-13, 2012, Antalya-Turkey, pp. 66 (poster).

[12] Üstün,O, Nuraniye., “Assesment on Wound Healing effects of Lentinula edodes from Turkey”. 20th Symposium on Natural products from Medicinal Plants, Oct. 10-13, 2012, Antalya-Turkey, pp. 67 (poster).

[13] Nuraniye., Üstün,O., and Şener, B., “Appraisal on the Wound Healing Activity of the Leaves of Ficus carica L.”. 10th International Symposium on Pharmaceutical Sciences, June. 26-29, 2012, Ankara-Turkey, pp. 361. (poster).

[14] Nuraniye., and Süleymanoğlu, E., Applying Langmuir-Blodgett Films and Planar Lipid Bilayers (Black Lipid Membranes) for Designing Nucleic Acid Nanobiosensors. Mini-Workshop on Surface Science for Inauguration of the Turkish Surface Science Society (TuSSS), Mays.23, 2011, Bilkent University, pp. 40 (poster).

4-resim: Bu yil 15-Féwral küni ayalim bilen ikkimiz öyimizge yéqin yerdiki bir taghqa chiqip, 11 kilométir yol méngip kelduq. Bu resim shu chaghdiki bir körünüsh.

5-resim: 2015-yili 21-Mart küni, yeni Noruz bayrimi küni, oghlum, ayalim we men üchimiz Los Anzhélis (Los Angeles) shehirining Malibu rayonidiki Tinch Okyan qirghiqigha jaylashqan bir taghqa chiqip, 5 kilométirdek yol méngip kelduq. Bu resimdikisi shu chaghdiki bir körünüsh.

Bu maqalini héchkimdin sorimay, menbesini bergen asasta bashqa her qandaq torgha chiqarsingiz, yaki élkitabqa oxshash bashqa her qandaq shekilde ishletsingiz boluwéridu. Bu maqale barliq uyghurlargha mensup.