Köp Sorilidighan Soallargha Jawablar

Soal:  Iltimas Puli. Men Amérikidiki 4-5 mektepke iltimas qilip baqay dégenidim. U mekteplerning hemmisi "Iltimas Puli (Application Fee)" telep qilidiken. Eger telep qilsam ular méning Iltimas Pulumni kötürüwétermu?

Jawab: Amérikidiki mektep sizning Iltimas Pulingizni kötürüwetmeydu. Emma, eger siz birer proféssor bilen biwasite alaqe qilghan bolsingiz, shu proféssor sizning iltimas pulingizni tölep bérishi mumkin.  Siz özingizning oqushqa kirish iltimas jedwili (Application Form) ni mangdurghanda, sizning jedwilingizni Oqughuchi Qobul Qilish Ishxanisi (Admissions Office) tapshurup alidu.  Iltimas puli telep qilidighanlarmu ashu ishxanidin ibaret.  Eger siz Magistérliq yaki Doktorluq oqushigha iltimas qilghan bolsingiz, sizni qobul qilish-qilmasliqni siz tallighan fakultéttiki bir proféssor qarar qilidu. Shunga, eng yaxshisi siz ashundaq proféssordin birni tépip, uning bilenmu biwasite alaqiliship béqing.  Hemde shu alaqe jeryanida u kishining sizning iltimas pulingizni tölep bérish imkaniyiti barmu-yoq, sorap béqing.  Eger undaq imkaniyiti bolmisa, iltimas pulini özingiz töleshke toghra kélidu.  Proféssor bilen biwasite alaqileshsingiz, sizning qobul qilinishingiz üchünmu köp paydisi bolidu.  Amérikidiki hemme mekteplerning Intérnét bétide hemme proféssorlarning tepsiliy uchurliri bar.  Proféssorni shu arqiliq tapsingiz bolidu.  Emma, proféssor bilen biwasite alaqilishish choqum qilmisa bolmaydighan shert emes.  Shunga, eger melum sewebler tüpeylidin undaq qilish imkaniyiti bolmisa, hergiz ümidsizlenmeng.

Amérikida "Uyghur Maarip Fondi" din biri bar bolup, eger sizning shertingiz toshsa, ular siz üchün 2 mektepning iltimas pulini tölep béridu. Tepsiliy ehwalni töwendiki soal-jawabtin körüwéling.

Soal: Amérikidiki Uyghur Maarip Fondi. Amérikida Uyghur oqughuchilar üchün tesis qilin’ghan bir maarip fondi bar iken. Ular biz üchün qandaq yardem qilalaydu?

Jawab: Yurtimizdiki chet elge chiqip oqush yolida tirishiwatqan Uyghur yashlirigha yardem qilish üchün, Amérikida bir "Uyghur Maarip Fondi" qurulghan. Bu fondning puli bek köp bolmighachqa, u hazirgha qeder her bir oqughuchi üchün 2 mektepning "Iltimas Puli (Application Fee)" ni tölep bériwatidu. Bu fond qurulghandin tartip 2005-yili kirgiche 100 dek Uyghur oqughuchi bu pulgha iltimas qilghan bolup, ularning ichidiki 50 etrapidiki kishi bu yardemge érishti. Bu pulgha érishishning bir qanche shertliri bar. Ularni we iltimas jedwilini töwendiki tor bétidin körüwéling:

Uyghur Maarip Fondi tor beti: http://www.meripet.com/UEF/UEFInfo.htm

Iltimas Jedwili: http://www.meripet.com/UEF/ApplyForm.htm

Soal: Iqtisad. Manga yardem qilidighan héchkim yoq. Ata-anamgha yene éghirimni sélishni xalimaymen. Shunga Amérikidiki bir aliy mekteptin Oqughuchi  Qerz Puli (Student Loan) élip, shu arqiliq Amérikigha bérish imkaniyiti barmu?

Jawab: Amérikidiki oqughuchilar ichidiki Amérika girajdanliri özi oquwatqan aliy mekteptin Oqughuchi Qerz Puli (Student Loan) élip oquyalaydu.  Bu pulning ösümi intayin töwen bolup, oqughuchilar oqush püttürüp, xizmetke chiqqandin kéyinki bir qanche yilning ichide qayturuwetse bolidu. Biraq, Amérikida oquydighan chet ellik oqughuchilargha bu qerz puli bérilmeydu. Shunga bu yol biz Uyghurlar üchünmu ochuq emes (I am sorry).  Qisqisi, sizgimu chetke chiqip oqush yoli bar, emma uni qolgha keltürüsh anche asan emes. Eger birer GRE we TOEFL kursida oqup, uningda yuqiri nomur élip, andin Amérikidiki birer mekteptin Oqush mukapat puli alalisingiz, siz iqtisadiy mesilini hel qilalaysiz.

Soal: Iqtisad.  Men chet elge chiqip, aldi bilen 1-2 yil chet el tili öginip, andin bir kespte oquy dégenidim.  Siz bilidighan, til mektipining oqush puli töwen yaki til mektipige oqush puli almaydighan birer chet el döliti barmu?  U nahayiti kichik bir dölet bolsimu meyli idi.  Eger til oqush puli töwen bolsa, birer yilliq oqush pulini özüm töleyttim?

Jawab: Hazir dunyada peqet tereqqiy tapqan döletlerla bashka dölettin oqughuqi qobul qilidu. Bu döletler Amérika, Yaponiye we Yawropadiki döletler bolup, méning bilishimche ularning hemmisi til öginishke kelgen oqughuchilardin oqush puli alidu. Hemde bundaq oqush puli intayin yuqiri. Shunga, eger chet el tilini chetke chiqip öginimen désingiz, choqum bir tereptin oqup, bir tereptin ishlishingiz kérek. Men bilidighan döletlerning ichide, yuqiriqidek qilish mumkinchiliki bar dölettin peqet birila bar. U bolsimu Yaponiyedin ibaret. Peqet Yaponiyedila bir tereptin ishlep, oqush chiqimi bilen turmush chiqimigha chushluq pul tépip, yene bir tereptin Yapon tili öginish imkaniyiti bar. Shunga ashu yol toghrisida izdinip béqing.  Yaponiyege chiqish üchünmu, kem dégende töwendiki 2 shertni hazirlishingiz kérek:  1) Deslepki oqush puli we bashqa xirajet üchün, 3000 dollardin 5000 dollarghiche pulingiz bolushi kérek.  2) Yaponiyede sizge mektep alaqiliship béridighan, we deslepte sizni orunlashturup qoyidighan birer tonushingiz bolushi kérek.

Soal:  GRE we TOEFL imtihani.  Men özümge nishanlighan mektepler asasen Amérika we En’gliyede. Undaqta qaysi imtihan’gha teyyarliq qilishim kérek?  Beziler GRE berse Oqush Mukapat Puli (scholarship) bilen oqughili bolidiken, déyishiwatidu.  Emma, u imtihanning qiyinliq derijisi intayin yuqiri iken.  Hemde imtihan sheklimu tolimu alahide iken.  Ürümqide uningha ait héchbir uchur tapqili bolmaydu.  Yaki TOEFL imtihanigha teyyarliq qilishim kérekmu? Chünki bu imtihanni nurghun mektepler telep qilidiken?

Jawab: Amérika, En’gliye qatarliq döletlerde Magistérliq we Doktorluq oqushigha kirishte TOEFL bilen GRE netijisi choqum telep qilinidu. özlükidin öginip, bu imtihanlarda layaqetlik netijige érishish asan emes, emma u mumkin. Ashundaq qilip chetke chiqqan Uyghur yashlar xéli bar.  Buning yene bir amali, Béyjing qatarliq sheherlerde mehsus TOEFL bilen GRE gha teyyarliq qilduridighan mektepler we kechlik kurslar bar iken. Eger iqtisadiy ehwalingiz yar berse, shu yolni tallisingizmu bolidu.

Soal:  Kesp tallash.  Méning hazirqi kespim fizika.  Emma, men kéyinki kespte kompyutér kespige qiziqivatimen. Undaqta méning bu yerde oqughanlirimni étirap qilamdu? Chünki bu kesp atlap oqushqa kirip qélishi mumkin?

Jawab: Amérikida kesp atlap oqushqa pütünley ruxset qilinidu. Amérikidiki birer mektepke asanraq qobul qilinish we oqush mukapat puligha érishish üchün, siz deslepte eng yaxshisi öz kespingizge iltimas qiling. Amérikigha kélip, bir mewsum oqughandin kéyin, bashqa özingiz yaxshi köridighan kespke almishiwalsingizmu bolidu. Bu pütünley mumkin.  Burun ijtimaiy pende oqughanlar Amérikigha kelgendin kéyin öz kespini tebbiiy pen’ge özgertsimu bolidu. Bundaq ehwalda Amérikining aliy mektipi bir oqughuchidin yéngi kespke ait 3 tin 5 kiche dersni toluqlap oqushni (make up) telep qilidu. Shu derslerni toluqlap oqup bolghandin kéyin, qalghan oqushni adettiki oqughuchilar bilen oxshashla dawamlashturghili bolidu.

Soal: Kesp tallash.  Méning hazirqi kespim doxturluq. Emma, men Amérikida iqtisad yaki injinérliq kespliride oqughum bar. Ashundaq qilish mumkinmu?

Jawab: Amérikigha kelip oqushta, siz özingizning burunqi kespi bilen héch qandaq munasiwiti yoq bir kespke iltimas qilip, shu kespte oqush pütünley mumkin. Bundaq ehwalda 2 yol bar: 1) 2-bakalawr unwani oqush. Bundaq qilsingiz 2 yil etrapidila yene bir bakalawr unwani alalaysiz. 2) Biwasite magistérliq oqush. Bundaq ehwalda Amérikidiki aliy mektepler sizdin 3 tin 5 kiche yéngi kesptiki derslerni toluqlashni telep qilidu. Buni In'gliz tilida "make up courses" dep ataydu. Bu dersni oqup bolghiche, sizni "shertlik asprant oqughuchi" dep ataydu. U derslerni tügitip bolghandin kéyin, andin resmiy oqughuchi bolisiz. Shunga kesp almashturush jehette Amérikida héch qandaq mesile yoq. Kesp almashturghanda mundaq 2 paydisizraq teripi bar: 1) Bir aliy mektepke qobul qilinish adettikidin sel qiyinraq bolidu, emma, pütünley mumkin. 2) Oqush mukapat puligha érishish intayin qiyin. Eger siz teslepki bir yilliq oqush xirajitini hel qilalasingiz, Amérikigha kélip, özingiz xalighan kespte oquyalaysiz.

Soal:  Men Amérikigha qisqa muddetlik tetqiqat qilish yoli bilen bérishni arzu qilattim. Iqtisadiy chiqimni özem töliyeleymen.  Mektep uqushush üchün qandaq qilish kérek? Bu jehette siz manga yardem qilalamsiz?

Jawab: Siz tetqiq qiliwatqan sahediki Amérikiliq proféssorlar bilen biwasite alaqilishing. Eger Xenzu proféssor tapalisingiz téximu yaxshi (buni her bir mektepning websitidin izdigili bolidu). Bir proféssor bilen qisqa muddetlik tetqiqat toghrisida alaqilishish üchün bir parche In’glizche xet teyyarlang. Men uni tüzitip bérey. Buni In’glizche "Short-term visiting scholar" deydu. www.meripet.comdiki "Personal Statement" dégen xet layihisidin we mexsus mushundaq meqset üchün teyyarlan’ghan töwendiki xettin paydilansingiz bolidu:

Sample Letter:   Contacting a Professor on a Post-Doc or Short-Term  Research Position

Yuqiriqi xette sözlen’gendek, eng yaxshisi siz alaqileshmekchi bolghan proféssorning ilmiy maqalisidin bir qanchini tépip oqup, ularni oqughandin kéyinki tesiratingizni yazghan xétingizde teswirlep qoyung. Buning intayin zor paydisi bar. Mushundaq qilish arqiliq, u proféssor bilen nahayiti tézla yéqinlishalaysiz.

Men Amérikining bir qanche uniwérsitétida özümning kespiy saheside ishleydighan proféssorlar bilen tonushimen. Eger siz ular bilen alaqileshmekchi bolsingiz, men uninggha yardem qilalaymen. Qalghanlar bilen özingiz biwasite alaqe qilsingiz yaxshiraq bolidu. Sewebi, Amérikiliqlar méning alaqiliship bérishimni yaxshi körmeydu.  Bu Amérikining bir örp-aditi bolup, men tonumaydighan bir proféssor bilen siz özingiz biwasite alaqileshsingiz méning alaqiliship berginimdin köp yaxshi bolidu.

Soal: Qirghizistanliq Uyghur Oqughuchilargha Swedende Oqush Toghrisida Xosh Xewer dégen xetni kördüm. Emdi men démekchi : Yéqinda men Qirghizistan’gha bérip oqumaqchi idim. Menmu  shu yerdiki yerliklerdek ashu pursetlerge ige bulalamdim-yoq? Hem siz  dégen Sweden’ge bérip oqush üchün Sweden hökümiti bizdin qandaq nersilerni telep qilidu? Mushu toghrisida bir telim bergen bolsingiz.

Jawab: Yazghan xétingizni oqup, mezmunidin toluq xewerdar boldum. Sizge méning chongqur hésdashliqim bar. Eger Qirghizistan’gha bérip, u yerdin Sweden’ge oqushqa chiqmaqchi bolsingizmu, sizge Sweden hökümiti yenila Junggo girajdani süpitide muamile qilidu. Xétingizni körgendin kéyin, men munu tor bétini tepsiliy tekshürüp baqtim:

 http://www.sweden.se/templates/SISArticle____10273.asp

Uninggha asaslan’ghanda, töwendiki keiplerde Sweden Junggo oqughuchisighimu oqush mukapat puli béridiken (kespning astidikisi oqughuchi qobul qilidighan aliy mektepning ismi):

Environmental Engineering and Sustainable Infrastructure

Royal Institute of Technology
 

Global Journalism

Örebro University

Maritime Affairs

World Maritime University

Electric Power Engineering

Chalmers University of Technology

Management of Logistics and Transportation

Chalmers University of Technology

Sustainable Energy Engineering

Royal Institute of Technology

Quality Technology and Management

Chalmers University of Technology

Yuqiriqi tor bétide bu mukapatqa iltimas qilmaqchi bolghan oqughuchi qandaq shertlerni hazirlishi kérekliki, iltimas qilishning qedem-basquchlirimu bar iken. Eger mumkin bolsa siz shu tor bétini tepsiliy körüp, tetqiq qilip béqing. Sizge utuq tileymen.

Soal: Beziler "Ünümlük öginish usulinimu öginish kérek," deydu. Sizche ünümlük öginish usuli qandaq bolidu?

Jawab: Bir ademning ünümlük öginish usuli yene bir ademningkige oxshimaydu.  Bir nersini (mesilen, matématikini) ünümlük  öginish usuli  yene bir nersini  (mesilen,  chet el  tilini) ünümlük öginish usuligha yene oxshimaydu.  Shunga her bir adem özi üchün bir yaxshi ünüm béridighan usulni öz emeliyitidiki tejribilerni xulasilep, tekshürüp tetqiq qilish arqiliq tedrijiy halda yekünlep chiqishi kérek.

   Men Shinjang Uniwérsitétida radio kespide oquwatqan mezgilde, mundaq bir ünümlük usulni yekünlep chiqqan idim: 1) Derstin burun kitabni bir qétim oqup chiqish.  2) Ders waqtida pütün wujud bilen diqqet qilip anglash, hemde xatire qaldurush.  3) Derstin pishshighlap tekrar qilish. 4) Muhim mezmunni ixcham hulase qilish. Töwendiki her bir mesile üstide qisqiche tohtilip ötey.

       1) Tebbii pende yéngi ders ötülgende, yéngi atalghuning köplükidin dersning mezmunigha egiship méngish bir az qiyin’gha toxtaydu. Eger yéngi ders ötülüshtin burun siz u derslikni bir qétim özingiz körüwalsingiz, ders waqtida oqutquchigha egiship méngishingiz jiq asan’gha toxtaydu. Zéhningizni yéngi atalghulargha emes, dersning mezmunigha merkezleshtüreleysiz.

       2) Ders waqtida oqutquchining sözlewatqanlirigha jümlimu-jümle egiship mangghandila, andin waqitning küchidin toluq paydilinalaysiz. Ashundaq qilishning bir ünümlük usuli, oqutquchining doskigha yazghanliridin xatire qaldurup méngish. Bu xatire imtihan waqtidimu intayin jan’gha esqatidu: Siz oqutquchingizning burun némilerni sozligenligini asanla angqiralaysiz.  Tapshuruq ishligendimu shundaq

       3) Köpinche ehwalda, bir qétim ders anglash bilenla hemme matériyallarni chüshinip bolush anche mumkin emes. Shunga derstin chüshüp, yene bir qétimliq derskiche bolghan waqitta, choqum yéngi dersni özlükingizdin tekrar qilishingiz, siz chüshenmeydighan mesililer bolsa uni sawaqdishingiz yaki ustazingizdin sorap chüshiniwélishingiz kérek.  Dersni tekrarlimisingiz qaysi mesilini chüshinipsiz, qaysisini chüshenmepsiz uni bilelmeysiz. Bu qétimqi derstiki chüshenmigen mesilini aydinglashturiwalmisingiz, yéngi derstiki mezmunlarni téximu chüshinelmeysiz.

       4) Oqughan nersilerni ixcham qilip xulasiwelishning bir qanche paydisi bar. Uning biri, u sizning mushu bir derstin némini öginiwalghanliqingizning xatirisidur. Uningdin bashqa, imtihan waqtida, deslepte pütün mezmunlarni tepsiliy körüp chiqqandin kéyin, imtihan’gha az qalghan waqitta peqet özingiz teyyarliwalghan xulasiligila qarisingiz, qisqa waqit ichide nurghun uqumni ésingizde qalduralaysiz. Bu xulasidin kéyinki ömringizdiki xizmet jeryanidimu paydilinalaysiz.  Men Amérikida oqughandimu mushundaq usulni qollan’ghan bolup, her bir derstin teyyarliwalghan xulasidin hazirqi tetqiqatlirimdimu paydiliniwatimen.

       Eger siz bir tebii pen oqughuchisi bolup, yuqiriqi usulni toluq qollansingiz, siz choqum her qandaq qiyin derstimu ela oqughuchi bolup oquyalaysiz.

Soal: In’gliz tilini ünümlük öginishning usuli qaysi?  In’gliz tili grammatikisini öginish usulichu?

Jawab: Yuqirida éytip ötkinimdek, bir ademning ünümlük öginish usuli yene bir ademningkige oxshimaydu.  Uningdin bashqa, til öginish bir uzun muddetlik, müshkül wezipe bolup, nahayiti yuqiri irade bilen mustehkem bel baghlimay turup, bir tilni mukemmel öginish mumkin emes. Til öginish héchkim üchün asan emes. Shunga bashtin tartip bu toghriliq mustehkem idiyiwiy teyyarliq bolushi kérek.  Men Shinjang Uniwérsitéti (XJU) de oqughan waqtimda, 1-yili Xenzu tilini öginip, uningdin kéyinki 2 yilning ichide In’gliz tilini qoshumche öginip, tebii pen Xenzu oqughuchilirining 3 yilliq derslikini öginip bolup, In’glizchini oqup tügetken Xenzu oqughuchilar bilen birge imtihan’gha qatniship, yuqiri netijige érishken idim.  Eng axirqi 2 yil jeryanida Yapon tilinimu özlükimdin öginip boldum.

       Men qollan’ghan usul mundaq:  1) Her küni yéngi sözlüktin 20 dane söz öginish. 2) Bir sözni 5 kün, her küni 3 qétimdin yézish. 3) Tékistni pütunley yadliwélish. 4) Tapshuruqni birnimu qaldurmay ishlesh.  Töwendiki her bir mesile ustide qisqiche toxtilip ötey.

       1) Til öginishte eng qiyin’gha toxtaydighan bir nerse yéterlik sandiki sözlükni yadlap igileshtin ibaret. Söz yadlash qisqa waqit ichide qattiq tutup érishkili bolidighan nerse emes. Uzun muddet izchil tirishish arqiliq érishkili bolidighan nerse. Shunga uni kündilik wezipe qiliwélish kérek. Men her küni etigen saet 6 de ornumdin turup, aldinqi küni axshimi teyyarlap qoyghan 20 sözlükni yadlidim.  Yeni Xenzuche menisige qarap, In’glizchisini dep béreleydighan boldum. Etigenlik tamaqtin kéyin sinipqa 5-10 minut baldur bérip, ders bashlinishtin burun, bügün ögen’gen 20 söz we aldinqi 4 künde ögen’gen 80 söz bolup jem’iy 100 sözni Xenzuchisigha qarap turup In’glizchisini yazdim.  Buni chüshtin kéyinki derstin burun we kechliq tekrardin burun yene 2 qétim tekrarlidim. Yeni her küni 5 künlük 100 sözni 3 qétim yézip chiqtim. Her bir sözni mushundaq 5 kün tekrarlisam, u menggü ésimdin chiqmaydighan bir nersige aylandi.  Buni özümge intayin qattiq tüzüm qiliwalghan bolup, sözlükni yézip bolmay turup kinogha barmidim. Sözlükni yazmay turup olturushqa barmidim. Oyun-tamashidin waz kechsemmu bu tüzümni qet'iy buzmidim.

       2) Yuqirida éytqandek, her qétim 5 künlük sözni (yeni 100 sözni) yazdim. Her küni 3 qétim yazdim: Etigenlik derstin burun, chüshtin kéyinki derstin burun we kechlik tamaqtin kéyin.

       3) Méning ögen’ginim tebiiy pen Xenzu oqughuchilirining derslik kitabi bolup, her bir dersning birdin resmi tékist we birdin "Ixtiyariy oqush tékisti" (Reading Text) bar idi. Men her heptide birdin yéngi ders ögen’gen bolup, heptining axirighiche her küni etigende tékistni yadlap, axirida tékstni pütünley yadliwaldim. Buning paydisi, siz xam sözni puxta ésingizge éliwélipla qalmay, grammatika qaidisinimu pütünley yadliwalidighan bolghachqa, kéyinche grammatikini janliq ishlitishingiz üchünmu intayin paydisi bolidiken.  Men Reading Text nimu her küni oqup, asasen ésimge éliwaldim.

       4) Tapshuruqni toluq ishlesh her qandaq pende yéngi uqumni pishshiq igileshte kem bolsa bolmaydighan nerse. Shunga bu yerde tepsiliy toxtalmaymen.

       Bir dangliq adem mundaq dégen: "Waqitni minut boyiche hésablaydighan ademning waqti, waqitni saet boyiche hésablaydighan ademningkige qarighanda 60 hesse köp bolidu."  Bu söz til öginishte heqiqetenmu shundaq. Men XJU de oquwatqan mezgilde, tamaqqa öchret turghan waqtimda, aptobusta mangghan waqtimda, yighinlarning aldi-keynide dégenlerning hemmiside In’glizche sözlük yadlayttim.

Soal: Men bashqilargha oxshash jem’iyettiki bir addiy adem qatarida ömrümni israp qiliwétishni xalimaymen. Qandaq qilghanda  Uyghurlar ichidiki yaramliq kishidin biri bolghili bolidu?

Jawab: Bir adem bashqilar qolgha keltürelmigen netijini qolgha keltürmekchi bolidiken, choqum bashqilargha oxshimighan derijide qattiq tirishchanliq körsitishi kérek. Özining teqdirini özgertmekchi bolidiken, choqum her xil cheklimiler üstidin ghelibe qilip, yéngi pursetni izdishi kérek. Öz teqdirini qoligha élishi, öz teqdirini özgertish yolida harmay-talmay tirishishi kérek.  Nurghun yashlar "Men yashliqimni israp qilmay, taza oyniwalmisam bolmaydu," dep qaraydu.  Bu intayin xata.  Eger bir kishi 70 yil ömür körse, uning kéyinki 52 yilliq ömrining qandaq ötüshini deslepki 18 yilliq ömri belgileydu.  Eger siz deslepki 18 yilda qattiq tiriship, özingizge puxta asas sélip, öz talantingiz we iqtidaringizgha asasen bir yaxshi kesp tallap, shu kesp boyiche aliy mektepke kirishni qolgha keltürsingiz, hemde aliy mekteptimu obdan oqusingiz, sizning kéyinki ömringiz nahayiti rahet we bextlik ötidu.  Kespte yaramliq adem bolush üchün, choqum özingizning yashliq dewridiki bir qisim oyun-tamashisidin waz kéchishingiz kérek.  Hergiz hem kesp bilen bilimnimu, hem yashliqtiki oyun-tamashinimu qoldin bermeymen, dep oylimang. Köpinche yashlar üchün bu mumkin emes.  Eng yaxshisi özingizge mundaq bir nersini adet qiliwéling: Her küni kechte uxlashtin burun siz özingizdin mundaq soallarni sorang: "Men bügün qanchilik yengi nerse ögendim? Qandaq yéngi netijini kolgha keltürdüm?" Bilim bilen yuqiri derijilik iqtidar qisqa muddet waqit qattiq tirishish arqiliq qolgha keltürgili bolidighan nerse emes. Ularni uzun muddet ichide az-azdin yétildürüsh we toplash kérek.  Yuqiriqidek adet sizning keng dairilik bilim bilen yuqiri derijilik qabiliyet yetishtürüshingizdiki kem bolsa bolmaydighan toghra usuldin ibaret.

Töwendiki tor bétidin chet elge bérip oqush toghrisidiki Xenzu tilidiki uchurni tapalaysiz:  http://mitbbs.com/login

Eger sizning yéngi soalingiz bolsa, manga É-xet yézing: ErkinSidiq @ gmail.com.  Men choqum sizge qisqa waqit ichide jawab qayturimen.