Erkin Sidiq

2015-yili 3-ayning 27-küni

Kona yéziq nusxisi:

http://bbs.izdinix.com/thread-62985-1-1.html
http://bbs.bagdax.cn/thread-29048-1-1.html
http://bbs.bozqir.top/forum.php?mod=viewthread&tid=6742&extra=&page=1

http://bbs.alkuyi.com/thread-49903-1-1.html
http://www.ejdad.com/bbs/forum.php?mod=viewthread&tid=3155

PDF Nusxisi: http://www.meripet.com/2015/20150327_chetel_uyghur5.pdf

Mezkur yazmida men chet elde oqup, alahide netijilerni qolgha keltürgen qérindashlarni tonushturushni dawamlashturimen. Hazir chet elde Amérika, gherb elliri we dunyada nahayiti zor tesirge ige shirketlerde ishlewatqan bir qisim Uyghur qérindashlirimiz bar. Ularning bezilirini men burun tonushturup bolghan bolup, bu qétim ashundaq qérindishimizdin yene bir qanchisini tonushturimen. Méning bu qétim tonushturidighinim sabiq Shinjang Uniwérsitéti Til fakultétining oqutquchisi doktor Ablehet Ibrahim, shundaqla uning ikki qizi, singlimiz Dilreba bilen Bernadin ibaret 3 qérindishimiz. Barliq ata-anilar öz perzentlirini yaxshi terbiyilep, ularni yaramliq kishilerdin qilip qatargha qoshushni ümid qilidu. Men bu qétim tonushturidighan qérindashlar ene shundaq a’ililerning bir wekili, shundaqla barliq Uyghur a’ililirining öginish ülgisi bolalaydighan bolup, men bu bir a’ile kishiliridin nahayitimu pexirlinimen.

Men oqurmenlerdin mezkur yazmini oqush arqiliq töwendiki 4 jehettiki chüshenchisini yenimu chongqurlashturuwélishini ümid qilimen:

(1) Balilarning qandaq adem bolup chong bolushida ata-anilarning rolining hemmidin muhimliqi heqqide burun nurghun Uyghur ziyaliyliri qelem tewretti. Menmu özümning bala terbiyisi heqqidiki maqaliliride bu nuqtini alahide tekitlidim. Mezkur yazmida ene shundaq bir emeliyetning bir janliq pakiti bar.

(2) Uyghur yashlirining ichide, dunyadiki eng tereqqiy qilghan dölette, hemde asasen erler üstünlükni igilep kelgen kespiy sahe we lidérliq orunlirida ishlewatqanlarning Uyghurlarningmu barliqini, bolghandimu ularning bir qismi Uyghur qizliri ikenlikini bilmeydighan ukilar az bolmasliqi mumkin. Mezkur yazma arqiliq Uyghur yashliri ene shundaq Uyghur qizliri bilen tonushalaydu.

(3) Pütün dunyadiki kishiler söyidighan, dunyaning hazirqi zaman tereqqiyatigha zor derijide tesir körsetken bir qisim shirketler bar. Ashundaq shirketlerde ishleshni arzu qilidighan Uyghur yashlirimu az emes. Ashundaq shirketning biri Féyisbuk (Facebook) bolup, yene biri Gugul (Google) din ibaret. Men bu qétim tonushturidighan 2 neper singlimiz ene shu shirketlerde téxnikiliq xadim we téxnikiliq yétekchi bolup ishlewatidu.

(4) Dunyada eng tereqqiy qilghan ellerning balilar maaripidiki eng yéqinqi yéngiliqlar.  Amérikida «Amérikining Amérikisi», dep atilidighan bir jay bar.  U bolsimu shimaliy Kaliforniyidiki Krimniy Jilghisidin ibaret.  Hazir Krimniy Jilghisida balilargha 6 yashqa kirgen waqittin bashlap kompyutér programmisi yézishni ögitiwatidu.

Emdi men yéngi qérindashlirimizni tonushturushni bashlaymen. Men bu qétim yene 3 neper qérindishimizni tonushturidighan bolup, ular men tonushturghan 20-, 21- we 22-qérindishimiz bolup hésablinidu.  Oqurmenlerge qolayliq bolsun üchün, men burunqi 19 neper qérindimizni tonushturghan maqalilerning tor adrésini mushu yazmining astigha kirgüzüp qoydum. 

Doktor Ablehet Ibrahim we Uning A’ilisi

Shinjang Uniwérsitétining sabiq oqutquchisi doktor Ablehet Ibrahim (In’glizche «Ablahat Ibrahim» dep yézilidu) Amérikigha eng baldur kelgen Uyghur ziyaliylirining biri bolup hésablinidu. Yeni u 1986-yili Amérikigha kélip, Washin’gton Shtatidiki Washin’gton Uniwérsitéti (University of Washington) da tilshunasliq kespining doktorluq unwanigha érishti.

1-resim: Merhaba Xanbaba xanim we uning 3 qizining Ürümchidiki waqtidiki bir resimi.

Ablehet Ibrahim Amérikida doktorluqta oquwatqan mezgilde uning xanimi Merhaba Xanbaba bir tereptin Shinjang Uniwérsitétining bir oqutquchisi bolush xizmitini dawamlashturup, yene bir tereptin 3 qizini béqip chong qildi. Ziyaliyliq salahiyitige ige bu bir jüp er-xotun ikkiylen pütün zéhni we énérgiyisini ashu 3 qizini oqush we kishilik pezilettin ibaret her ikki jehettin obdan terbiyileshke qaratti. Qizlirining normal oqushini ching tutushtin bashqa, ular qizlirini baliliq dewridin bashlapla Pi’anino we Iskiripka derslirini élishqa orunlashturdi. Shundaqla ularni her xil tenterbiye pa’aliyetlirigimu aktip qatnashturdi. Doktor Ablehet Ibrahim qizlirigha da’im mundaq deytti: «Uyghurlar dunyadiki bashqa insanlar bilen oxshash derijide eqilliq. Dunyadiki bashqa kishiler qilalighan ishlarni Uyghurlarmu qilalaydu. Eger siler Uyghur diyaridiki mekteplerde sinipning aldida mangsanglar, dunyaning bashqa jayliridiki dangliq mekteplerdimu sinipning aldi bolup oquyalaysiler.» Her qandaq bir ishni qilghanda, uni eng yuqiri derijide yaxshi qilish, we özi qilghan her bir ishqa nisbeten choqum ijabiy pozitsiye tutush Ablehetning a’iliside izchil türde tekitlinip kelgen ishlarning biridur.

2-resim: Doktor Ablehet Ibrahim, Merhaba Xanbaba xanim, we Dilrebaning ikki omaq perzenti.

Doktor Ablehet Ibrahim bilen Merhabaning 3 qizi yuqiriqidek terbiyilinish netijiside «Niyet qilghan her qandaq ishni choqum qilghili bolidu» deydighan öz-özige bolghan chongqur ishench bilen chong boldi. Shuning bilen ular asasen erler üstünlükni igilep kelgen inzhénérliq kespiy saheside ish bashlidi. Ablehetning chong qizi Dilreba Kompyutér Ilmi (Computer Science) ning magistirliq unwanigha ériship, hazir oqurmenlerge nahayitimu tonushluq bolghan Féyisbuk shirkitide bir «Yumshaq Détal Inzhénéri» bolup ishlewatidu. Ablehetning ikkinchi qizi Berna «Éléktir Inzhénérliqi» kespining magistirliqi bilen «Igilik Bashqurush» kespining magistirliqigha ériship, hazir oqurmenlerge tonushluq bolghan Gugul shirkitining In’glizche «Android Partnerships» dep atilidighan bölümining bashliqi bolup ishlewatidu. Ablehetning eng kichik qizi Rena «Sana’et Inzhénérliqi» kespining baklawurluq unwanigha ériship, hazir Féyisbukning boghaltirliq bölümide bir Analizchi bolup ishlewatidu.

Doktor Ablehet Ibrahim hazir Kaliforniyediki bir aliy mektepning proféssori bolup, u yerde Özbék tili derslirini ötüwatidu.

3-resim: Doktor Ablehet Ibrahimning pütün a’ilisi.

Töwende men Dilreba bilen Bernani yene bir az tepsiliyrek tonushturup ötimen.

Dilreba Ibrahim

Singlimiz Dilreba bashlan’ghuch, toluqsiz ottura we toluq ottura mekteplirining hemmisini Junggoda oqudi. Ashu mekteplerde oquwatqan mezgillerde u oqush netijisi jehette izchil türde sinip we mektep boyiche aldinqi qatardin orun aldi. Dilreba toluq otturini püttürgendin kéyin Wén’giriye Ma’arip Ministirliqining bir oqush mukapat puligha ériship, Kompyutér Ilmi boyiche aliy mektep oqushini bashlidi. Uning ghayisi oqush püttürgendin kéyin Mikrosoft shirkitige kirip ishlesh idi. Aliy mektep oqushini bashlap uzun ötmey, Dilreba inzhénérliq kespiy sahelirini asasen erler igiligenlikini, ular kichik waqtidin bashlapla kompyutér bilen hepiliship, chong bolghuche nahayiti köp tejribilik bolup kétidighanliqini bayqidi. Dilreba Ürümchidin kelgen, burun kompyutér bilen héch qandaq hepiliship baqmighan bolghachqa, ashundaq bir arqa körünüsh bilen aliy mektepni kompyutér ilmi kespide oqushning özi üchün bir xil jeng élan qilish ikenlikini hés qildi. Shuning bilen u özige nahayiti yuqiri telep qoyup qattiq tirishti. Netijide Wén’giriyediki dangliq mekteplerning biri bolghan Étwos Lorand Uniwérsitéti (Eotvos Lorand University) ni ela netije bilen püttürüp, kompyutér ilmi kespining baklawurluq unwanigha érishti.

4-resim: Singlimiz Dilreba Ibrahim

Dilreba Wén’giriyede oquwatqan mezgilde, uning apisimu Amérikigha kélip, dadisi bilen jem boldi. Dilreba baklawurluq oqushini Wén’giriyede tamamlighandin kéyin, umu Amérikigha kélip, ata-anisi bilen jem boldi. Amérikigha kelgendin kéyin, Dilreba kespiy jehette özini yenimu tereqqiy qildurushning eng ünümlük usuli Amérika aliy mekteplirining biride bir Magistirliq unwani élish ikenlikini hés qildi. Amérikidiki aliy mekteplerde bir aspirantliq unwani üchün oqumaqchi bolghan chet ellik oqughuchilar «TOFIL» (TOEFL) dep atilidighan bir In’gliz tili imtihani bilen toluq ottura mektep kespiy dersliridin élinidighan «GMAT» dégen yene bir imtihanida layaqetlik bolmisa bolmaytti. Shunglashqa Dilreba Amérikigha kélipla ashu ikki imtihan’gha öz küchige tayinip teyyarliq qilishqa jiddiy halda kiriship ketti, hemde u imtihanlarda layaqetlik bolup, Kaliforniye Shtatliq Uniwérsitétigha qobul qilindi. Dilreba bu mekteptimu sinipning aldi bolup oqudi. Shundaqla özining yétekchi oqutquchisi bilen bille Amérikida chiqidighan bir ilmiy tetqiqat zhurnilida bir parche ilmiy maqalimu élan qildi. Magistirliq oqushi jeryanida özining yétekchi oqutquchisining tewsiye qilip bérishi bilen ashu proféssor qoshumche xizmet qilidighan bir shirkette «oqughuchi xizmetchi» (internship employee) bolup ishlidi.

Magistirliq oqushini tamamlighandin kéyin, Dilreba bir Qatar murekkep söhbetliship bahalash (interview) jeryanini öz béshidin kechürüp, Kaliforniyediki Kirimniy Jilghisi (Silicon Valley) diki In’glizche «ArcSight» dep atilidighan bir yuqiri téxnologiye shirkitide özining tunji xizmet ornigha érishti. Bu shirketning pay chéki 2008-yili bazargha sélinip, 2010-yiligha kelgende uni Amérikidiki dangliq kompyutér we éléktironika eswabliri shirkitining biri bolghan «Xewlet-Pakard» (Hewlett-Packard, HP) shirkiti sétiwaldi. Dilreba qattiq tirishish, mesililer üstide tenqidiy tepekkur yürgüzüsh, we yéngi idiyilerni otturigha qoyush arqiliq, nahayiti tézla özining shirket üchün qimmet yaritishta eng aldida turidighan xadimlarning biri ikenlikini ispatlidi. U shirketning eqliy mehsulatlirini qoghdaydighan yéngi paténtlarni wujudqa keltürüp, «oqughuchi xizmetchi» dégen salahiyettin resmiy inzhénérliq ornigha kötürüldi, hemde u yerdin ishlepchiqirish we bir guruppa téxnikiliq xadimlarni bashquridighan rehberlik ornigha ösüp, nechche milyon dollarliq kirim yaritidighan ishlepchiqirish meshghulatigha mes’ul boldi. U tedrijiy halda yene shirketning téxnikiliq layihiligüchisi (technical architect) ornigha ösüp, shirketning téxnologiyige mes’ul lidéri (Chief Technology Officer, CTO) ning ishenchlik meslihetchisi boldi. Dilreba shirketning 1-derijilik lidéri (Chief Executive Office, CEO) bilen birlikte yéngi keshpiyat asasida bir yéngi mehsulat ishlep chiqqan bolup, Dilreba bu mehsulatni shirketning bir qétimliq 3000 kishilik yighinida barliq shirket xadimlirigha tonushturdi.

Xewlet-Pakard shirkiti Arcsight ni sétiwalghandin kéyin, yéngiliq yaritish ishliri suslishishqa bashlidi. Shuning bilen Dilreba yéngi maharet we yéngi téxnologiyilerni öginish istiki bilen Alma shirkitining yanfon epliri (iPhone Apps) ni yasashni öginishke kirishti. Shu jeryanda u bir qanche yéngi Eplerni yézip chiqip, ularni Alma shirkitining «iTunes» dukinigha qoydi. Shu jeryanda u Alma shirkiti mehsulatlirining yumshaq détalliri (iOS) we Ep baziri heqqide nurghun izdinish we tetqiqatlarni élip bardi. Axirida özi mes’ul sahening Mehsulat bashliqi, Grafik Layihiligüchi we Yumshaq Détal Inzhénéri boldi.

Dilreba yalghuz uning bilenla qana’etlinip qalmay, kündüzi özining normal xizmitini qilip, axshimi balilirini uxlitip bolghandin kéyinki barliq waqitlirini yéngi ep yézishqa qaratti. Ashundaq qattiq tirishish netijiside, Dilreba bir qanche yuqiri süpetlik we bir qisim alahide bosh orunlarni tolduridighan eplerni ishlep chiqqan bolup, u epler eng köp sétilghan epler qataridin orun aldi.

Alma shirkiti «iPad» ni yéngidin élan qilip, tetqiqatchilarni uning üchün yéngi eplerni yézishqa chaqirghanda, Dilreba pursetni ching tutup, iPad ning Féyisbuk programmisigha yéngi ep yézishqa atlandi. iPad bazargha sélin’ghan birinchi küni Dilreba yazghan Féyisbuk Epi Alma shirkiti dukinida eng köp sétilghan 10 Epning biri bolush sheripige érishti. U chaghda Féyisbuk shirkitining özimu zörür bolghan Eplerge meblegh sélishqa ülgürelmey qalghanidi.

Uningdin kéyin Dilreba Xewlet-Pakarddiki xizmitidin istépa bérip, buzghunchi xaraktérlik yéngi téxnologiyilerni tereqqiy qilduridighan yéngi qurulghan shirkettin birsige bérishni qarar qildi. Hemde ma’arip saheside ishlitilidighan mehsulatlarni ishlep chiqiridighan bir yéngi shirketke kirip, uning inzhénérliq ishlirigha mes’ul boldi. Shundaqla pütün mehsulat bazisini yéngiwashtin qurup chiqti. Bu shirket meblegh salghuchilardin yene bir qétim pul hel qilishni qarar qilghanda, Dilreba yéngi nersilerni öginish we yéngi ötkellerge hujum qilish meqsitide, hazirqi zaman yéngiliqlirigha wekillik qilidighan Alma shirkiti, Gugul shirkiti yaki Féyisbuk shirkitige kirip ishleshni qarar qildi. Nahayiti murekkep söhbetliship bahalash jeryanini beshidin kechürüp, Dilreba Netfiliks (Netflix) shirkiti, Alma shirkiti we Féyisbuk shirkitidin tengla xizmetke élish teklipi tapshurup aldi. Dilreba bir qanche kün estayidil oylan’ghandin kéyin, Féyisbuk shirkitidiki xizmetni qobul qilish qararigha kélip, öz hayatining yene bir yéngi dewrini bashlidi. Féyisbukqa kirgendin buyan Dilreba öz zéhnini mehsulat miqdarini köpeytish (scalability) we chong kölemlik sanliq melumatlarni bir terep qilish (big data domains) sahesidiki bilimi ashurushqa merkezleshtürüp keldi. U hazir Féyisbukta «Asasliq Inzhénér» (Principal Engineer) bolup, shirketning ölchesh ilmi sahesidiki meshghulatlirigha yétekchilik qiliwatidu.

Yuqiriqi ishlarni qilish jeryanida, Dilreba yene ikki chirayliq perzentning anisi boldi. U qarishiche, yéqin kelgüside kompyutér programmisi yézishni bilish xuddi In’gliz tilini bilish bilen oxshash derijide muhim bolup qalidu. U yéngi téxnologiyilerning muhimliqini tonup yétip, balilirigha 6 yashtin bashlapla programma yézishni ögitishke bashlidi. Shuning bilen bir waqitta, Dilreba «Coder Dojo» dep atilidighan teshkilatlargha oxshash orunlarda pida’iy bolup ishlep, balilargha programma yézishni ögitiwatidu. Dilrebaning ghayisi Uyghur balilirighimu programma yézishni ögitip, Amérikining Kirimniy Jilghisida bar bolghan yéngi téxnologiye bayliqliri bilen Uyghur balilirinimu teminleshtur.

Singlimiz Dilreba toghrisida töwendiki tor betliride téximu köp uchurlar bar:

https://www.linkedin.com/in/dilraba

http://www.google.com/patents/US20140075564

http://www.mcs.csueastbay.edu/~lertaul/MANETSecCamReadyV6.pdf

http://www.businessinsider.com/10-things-we-love-and-hate-about-the-ipad-2010-4?op=1

http://techcrunch.com/2010/04/05/facebooks-ipad-impostor-facebook-ultimate-removed-from-the-app-store/

Berna Ibrahim

Singlimiz Berna doktor Ablehet Ibrahim bilen Merhaba Xanbaba xanimning ikkinchi qizi bolidu. Bashlan’ghuchta oquwatqan waqtidin bashlapla Berna jismaniy we oqush jehetning her ikkiside sinipning aldida méngishni özi üchün bir adet qildi. Bashlan’ghuchni ela netije püttürgendin kéyin, u Ürümchi Sheherlik 17-ottura mektep (Tejribe Ottura Mektep) te oqudi. Berna kitab oqush we bir nerse yézishqa nahayitimu amraq bolup, toluqsiz we toluq ottura mekteplerde oquwatqan mezgillerde sinipning öginish bashliqi bolup ishlidi. Shu mezgillerde uning bir parche qisqa hékayisi bilen yene bir parche shé’iri «Tarim Ghunchiliri Zhurnili» da élan qilindi. Berna tebi’iy-pen oqushidimu nahayiti yaxshi bolup, mektepning Matématika we Ximiye Olimpik etritining ezasi bolup, her penniy musabiqilerge qatnashti. Shundaqla mektepning yilliq tenterbiye musabiqiside izchil türde 100 métir, 400 métir we 800 métirgha yügürüsh türining birinchilik ornini saqlidi.

5-resim: Singlimiz Berna Ibrahim.

Toluq otturini püttürgendin kéyin, Berna apisi bilen bille Amérika Washin’gton shtati Siyatul (Seattle) shehirige kélip, dadisi bilen jem boldi. U chaghda Berna téxi In’gliz tilini anche yaxshi bilmeydighan bolup, ashundaq bolushigha qarimay aliy mektep derslirini tallap oqushni bashlidi.

Amérikida ottura téxnikomlardin yuqiriraq, we aliy mekteplerdin töwenrek turidighan, «Jama’et Instituti» (Community College) dep atilidighan mektepler köp bolup, bu mektepler 2 yilliq ottura téxnikom unwanimu béreleydu, shundaqla aliy mekteplerning deslepki 2 yilliq derslirini ötüpmu béreleydu. Yeni siz mushundaq mektepte ikki yil oqup, andin kéyin bir resmiy aliy mektepke yötkilip, yene 2 yil oqup, baklawur unwani alalaysiz. Bundaq mekteplerning sani köp, we oqush puli resmiy aliy mekteplerningkidin köp erzan bolghachqa, aliy mektepning deslepki 2 yilliq oqushini ashundaq mekteplerde tamamlaydighan oqughuchilar nahayiti köp.

Berna Amérikigha kelgendin kéyinki deslepki mezgillerde Siyatuldiki bir Jama’et Instituti (Shoreline Community College) da bir tereptin «matématika ders chüshendürgüchisi» (math tutor) bolup ishlep, yene bir tereptin til ögendi. Yeni u özining matématika bilimini ishqa sélip, shu arqiliq emeliy In’gliz tilini ögendi.

2001-yili Berna Washin’gton Uniwérsitéti (University of Washington) gha iltimas qilip, éléktir inzhénérliqi kespining baklawurluq programmisigha qobul qilindi. Berna u mekteptimu nahayiti aktip bolup, shu yerdiki «Ayal Inzhénérlar Jem’iyiti» ge eza bolup kirdi. Bu jem’iyetning meqsiti qizlarni inzhénérliq kespide oqushqa righbetlendürüp, shu arqiliq inzhénérliq kespiy saheside ishleydighan ayallarning sanini köpeytish idi. 2003-yili Berna mezkur jem’iyetning «Shirketler bilen alaqileshküchisi» (Corporate Liaison) wezipisige teyinlinip, u mushu jem’iyet bilen hemkarlishiwatqan 45 shirket bilen alaqilishish ishlirigha mes’ul bolup ishlidi. 2005-yili Berna Ayal Inzhénérlar Jem’iyiti Washin’gton Uniwérsitéti shöbisige re’is bolup saylinip, 2006-yili ashu wezipige yene qayta saylandi. Ashu mezgilde Berna küchini yéngidin aliy mektepke kirgen we mezkur aliy mektepke bashqa yerlerdin almiship kelgen oqughuchilargha mezkur jem’iyetni teshwiq qilish xizmitige merkezleshtürüp, nahayiti yaxshi netijilerni yaratti.

Ashu mezgilde Berna yene bir tereptin éléktir inzhénérliqi kespining aspirantliq oqughuchisi bolup ishlep, yene bir tereptin mezkur uniwérsitétning «Emgek Küchlirini Rawajlandurush Tetqiqat Merkizi» de «yardemchi tetqiqatchi» bolup ishlidi. Ashu mezgilde, yeni 2004-yili Berna Shangxeyde échilghan «Dunya Inzhénérliq Yighini» ning «Ayallar Tarmaq Yighini» gha teklip qilinip, u yighinda özining tetqiqat netijiliridin ilmiy doklat berdi.

Uningdin kéyin Berna Washin’gton Uniwérsitétining Éléktir Inzhénérliqi kespi boyiche bir baklawur unwanigha érishti. Toluq kursta oquwatqan mezgilde, Berna hawa qatqan qorallirining her xil sistémilirini ishlep chiqiridighan, dunyadiki eng chong shirketlerning biri bolghan «Xonéywél» (Honeywell International) shirkitide «yazliq oqughuchi xizmetchi» (summer intern) bolup ishlidi. Bu xizmet uning kéyinche téxnologiye saheside xizmetni tallishida türtkilik rol oynidi. Shu qétim Berna radar zapchaslirini layihileydighan bir qattiq détal guruppisigha eza bolup ishligen bolup, ashu radar zapchasliri hazir dunyaning hemme yerlirige qatnawatqan Boying 737 we Boying 747 ayropilanlirida omumyüzlük ishlitiliwatidu.

Singlimiz Berna Washin’gton Uniwérsitétida örlep oqup, éléktir inzhénérliqi kespide bir magistirliq unwanigha érishkendin kéyin, u Kaliforniye Shtatining Kirimniy Jilghisigha köchüp keldi. Hemde özining tunji qétimliq resmiy xizmiti süpitide dunyagha dangliq kompyutér shirkiti Intél (Intel) ge kirip, u shirketning riqabet nahayitimu küchlük bolghan «lidérliqni rawajlandurush programmisi» da ishlidi. Bu dewrdiki eng yuqiri pelle Bernaning Gérmaniyining Myunxén shehiride ötküzgen bir yili boldi. Bu mezgilde u Intél shirkitining Yawropa shöbiside bir guruppa xadimlargha yétekchilik qilip, Intél mehsulatlirining Yawropa, Ottura Sherq we Afriqa bazarliridiki sétilish miqdarini östürüsh istratégiyisini tüzüp chiqti.

2008-yili Berna Intélning Kaliforniye Kirimniy Jilghisidiki bash shtabigha qaytip kélip, San Franshisko rayonidiki xéridarlar üchün xizmet qilidighan téxnikiliq soda guruppisida ishlidi. 2010-yiligha kelgende Berna Intél mehsulatlirini yéngi bazarlargha kéngeytip, shirketning yilliq kirimining aldinqi bir yildikige qarighanda 50 milyon dollardin ösüp méngishigha biwasite töhpe qoshti. Ashu mezgilde Berna yene Intil üchün yene bir qisim alahide töhpilerni yaratti. Mesilen, Intél, «Netgear» we «Dell» shirketlirining istratégiyilik hemkarliq munasiwiti ornitishi, «Logitech» shirkitini Intélning «Gugul Téléwizori» (GoogleTV) projékti (tereqqiyat türi) ge bir halqiliq shérik qilip élip kirish, hemde Intélning sodisining 38 pirsent ösüshige sewebchi bolghan bir bazarlash pa’aliyiti (Private Cloud consumer marketing campaign) ni ijat qilish we emeliyleshtürüsh qatarliqlar.

Berna dawamliq türde özining maharetlirini yaxshilash we kéngeytish pursetlirini izdep turdi. 2009-yili u Kaliforniye Uniwérsitéti Bérkéléy shöbisining igilik bashqurush kespige iltimas qilip, ashu kesipning magistirliq programmisigha qobul qilindi. Bu mektepning «Xas Igilik Bashqurush Instituti» (Haas School of Business) dégen fakultéti dunya boyiche nahayiti dangliq bolup, méning oghlum Dilshatmu 4 yilning aldida ashu fakultétta igilik bashqurush kespining baklawurluq unwanini aldi. Bernaning bu oqushining iqtisadiy chiqimini Intél shirkiti öz üstige aldi. Berna shuningdin kéyinki 3 yil waqit ichide kündüzi öz shirkitide bir pütün künlük xizmetchi bolup ishlep, axshimi we Shenbe-Yekshenbe künliri mezkur magistirliq oqushini oqudi. 2012-yili Berna In’glizche «MBA» dep atilidighan, Uyghurche menisi «Igilik Bashqurush Magistirliq Unwani» bolghan yene bir magistirliq unwanigha érishti. Bernaning muweppeqiyetke bolghan intilishi we burun qolgha keltürgen alahide töhpilirige asasen, Intél shirkiti Bernani bir rehbiriy orun’gha teyinlep, uni Intél yéngidin sétiwalghan «McAfee» shirkitining xéridarlirigha we mehsulatlarni bazarlashqa mes’ul qildi. Bernaning lidérliqi astida bu ikki shirketning «McAfee LiveSafe» dep atilidighan tunji birleshme mehsulati muweppeqiyetlik halda bazargha sélindi.

2013-yili Gugul shirkiti 140 neper kandidatning ichidin Bernani tallap xizmetke aldi, hemde uni shirketning Android etritining Junggodiki Gugul shériklirige mes’ul xadimi qilip teyinlidi (Gugul shirkitide ishlesh üchün her yili 1.2 milyon adem xizmetke iltimas qilidu). Berna hazir kéyinki bir milyard intérnét ishletküchilirini nishanlap turup tereqqiy qilduruwatqan «Android One» mehsulatini tereqqiy qildurup ishlep chiqirish etritining bashliqi bolup ishlewatidu. Bu projékt bir qatar qattiq détal qa’idilirini békitip chiqidighan bolup, bashqa yanfon shirketliri ashu qa’idilerge asasen Android ni ishlitidighan töwen-chiqimliq yanfonlarni ishlep chiqiridu.

Singlimiz Berna dawamliq türde inzhénérliq kespiy saheside ishleydighan ayallarning jem’iyetlirining xizmitige qatnishiwatqan bolup, u yene toluq ottura mektep we aliy mektep qiz oqughuchilirini tebi’iy-pen we inzhénérliq sahesige kirishke dewet qilidighan xizmetlernimu élip bériwatidu.

Singlimiz Berna hazir kéyinki bir milyard ademni intérnét ishlitidighan qilish yolida zor ishtiyaq bilen tirishchanliq körsitiwatidu. U qattiq tirishchanliq we ésil pozitsiyining choqum ünüm béridighanliqigha qattiq ishinip, adimiylik bilen kesiptin ibaret her ikki jehette özining talant-iqtidarlirini eng yuqiri derijide jari qildurush yolida dawamliq tirishchanliq körsitiwatidu.

Men singlimiz Dilreba bilen Bernani hazirqi zaman Uyghur ayal qehrimanlirining bir tipik wekili, dep tonuymen, hemde ulardin nahayitimu pexirlinimen.

Singlimiz Dilreba Ibrahim Hazirghiche Élan Qilghan Ilmiy Eserlerning Tizimliki (In’glizche):

[1]Network asset information management. Patent No. US 20140075564 A1.

[2] Evaluation of Secure Routing Protocols in Mobile Ad Hoc Networks (MANETs). Presented at Security and Management Conference 2009: Las Vegas, Nevada, USA.

[3] Business Insider article about Dilraba’s Facebook App: http://read.bi/19mAcXc

[4] Techcrunch article about Dilraba’s Facebook App: http://tcrn.ch/1M1LZMN

«Chet Elde Oqughan Netijilik Uyghurlar» Heqqidiki Burunqi Maqalilerning Tor Adrésliri:

Men oqurmenlerge qolayliq bolsun üchün, mezkur katégoriye ichide burun élan qilghan maqalilerning tor adréslirini bu yerge yézip qoydum. Men hazir özümning maqalilirini jem’iy 5 Uyghurche torgha chiqiriwatqan bolup (özümning www.meripet.com dégen tor bétini hésablimighanda), eslide maqalilerning bashqa torlardiki adréslirinimu yézip qoyghan bolsam adil ish qilghan bolattim. Emma undaq qilishqa bek köp waqit kétidighan bolup, men uninggha yétiship bolalmidim. Shunglashqa «izdinish» tin bashqa torlarning bashqurghuchi ukilirimizning toghra chüshinishini, méning bu adaletsizlikimni epu qilishini soraymen.

[1] Tömür Paltash, Aynur Abdurazaq we Muhemmetjan Abdulla (2014-12-12, 1-3)

«Yéngiliq Yaritish Qabiliyitini Östürüshning 9 Xil Usuli»

http://bbs.izdinix.com/thread-61200-1-1.html

[2] Mexmut Abla we Nurnisa Qurban (2014-12-19, 4-5)

«Amérikidiki Ottura Mekteplerning «Yéngi Keshpiyat Musabiqisi» Pa’aliyetliri»

http://bbs.izdinix.com/thread-61336-1-1.html

[3] Ekber Shérip we Mirshad Abduréhim (2014-12-26, 6-7)

«Yalghanchiliqqa Ait 12 Heqiqet»

http://bbs.izdinix.com/thread-61490-1-1.html

[4] Waqtinche éliwétilgen ikki qérindishimiz (2015-1-2, 8-9, kéyin qayta chiqirilidu)

Balingizgha Toghra Köyüng (1)

http://bbs.izdinix.com/thread-61626-1-1.html

[5] Shakir Shemshi we Erkin Abduwayit (2015-2-13, 10-11)

Chet Elde Oqughan Netijilik Uyghurlar (1)

http://bbs.izdinix.com/thread-62355-1-1.html

[6] Ebeydulla Abduweli, Ghappar Pettar we Muqeddes Qurban (2015-2-27, 12-14)

Chet Elde Oqughan Netijilik Uyghurlar (2)

http://bbs.izdinix.com/thread-62589-1-1.html

[7] Ilyas Qasim, Dilshat Abla we Abdureshid Jelil Qarluq (2015-3-13, 15-17)

Chet Elde Oqughan Netijilik Uyghurlar (3)

http://bbs.izdinix.com/thread-62798-1-1.html

[8] Abliz Abduqadir we Erkin’ay Abliz (2015-3-20, 18-19)

Chet Elde Oqughan Netijilik Uyghurlar (4)

http://bbs.izdinix.com/thread-62901-1-1.html

Bu maqalini héchkimdin sorimay, menbesini bergen asasta bashqa her qandaq torgha chiqarsingiz, yaki élkitabqa oxshash bashqa her qandaq shekilde ishletsingiz boluwéridu. Bu maqale barliq uyghurlargha mensup.

© Copyright 2014 Uyghur Meripet  Torbéti 

Visits Number