Kona Yéziq: [meripet.com]  [PDF]  [uyghuracademy.org]   [meripet.org]


Qurban Héytingizgha Mubarek Bolsun!

 
6. Özige Bolghan Étiqad, we Adet Qanuniyiti
 
Aldinqi bölümlerde men mundaq uqumlarni tonushturdum: Siz qayta-qayta mu’eyyenleshtürüsh arqiliq özingizning yoshurun éngigha qattiq ornatqan her qandaq bir idiye aptomatik halda bir pilan yaki lahiyige aylinidu. Uningdin kéyin bir xil körünmes küch mushu lahiyidin paydilinip, sizning herikitingizni ashu pilandiki meqsetni emelge ashurushqa toghrilaydu.  Siz özingiz tallighan her qandaq bir idiyini özingizning yoshurun éngigha ornitishqa paydilinidighan prinsip «aptomatik teklib», dep atilidighan bolup, u siz özingiz öz könglingizge béridighan tekliptin ibaret.
 
Xuddi éléktir énérgiyisi zawut-karxanilardiki chaqlarni chögilitip, insaniyet üchün minglighan-milyonlighan shekilde xizmet qilidighinigha, yaki bolmisa toghra paydilanmighanda hayatni astin-üstün qiliwétidighinigha oxshash, eger toghra paydilansingiz aptomatik teklib prinsipimu sizni tinchliq we güllinishning égiz choqqilirigha chiqiralaydu.  Shundaqla, eger toghra paydilinalmisingiz, u sizni azab-oqubet we kembeghelchilikning chongqur oyminigha chüshüriwételeydu.  Aptomatik teklib prinsipining bundaq roli bir idiyini sizning yoshurun éngingizgha ornitish arqiliq emelge ashidu.  Men mezkur bölümde bir idiyini yoshurun anggha ornitishta kam bolsa bolmaydighan bir qanche éléméntlarni tonushturup ötimen.
 
(1) Étiqad bilen Mu’eyyenleshtürüsh
 
Hazirqi zamanda köpünche kishiler «étiqad» dégen sözni «diniy étiqad, diniy eqide» dégen sözler bilen oxshash menide ishlitidu.  Lékin, Napoliyonning kitabida bu söz «Sizning melum bir ishni qilalaydighanliqingiz toghrisidiki öz-özingizge bolghan ishench, qarash, mutleq we qet’iy tewrenmes eqide» dégen menide ishlitilgen.
 
Aptomatik teklib prinsipining bir istekni ré’alliqqa aylandurushtiki muhim rolini chüshinishte, aldi bilen töwendiki bayanatni toghra we toluq chüshiniwélish intayin muhim: Étiqad köngülning bir xil haliti bolup, uni aptomatik teklib prinsipidin paydilinip, yoshurun anggha tekrar ögitish arqiliq wujutqa keltürgili bolidu.  Tekrar mu’eyyenleshtürüsh herikiti sizning yoshurun éngingizgha buyruq bergen bilen oxshash bolup, özingizde étiqad héssiyatini özligidin yétildürüshning hazirghiche bayqalghan birdin-bir ünümlük usulidur.
 
Sizning eqidingiz, yaki étiqadingiz, sizning yoshurun éngingizning herikitini belgileydighan élémént bolup hésablinidu.  Siz her qandaq bir istekni özingizning yoshurun éngigha «u choqum emelge ashidu» dégen eqide bilen turghuzghanda, sizning yoshurun éngingiz paydilinishqa bolidighan eng biwaste we eng emeliy yollardin paydilinip uni özining maddiy ékwéwaléntigha aylanduridu.  Yeni, buni bashqichirek bayan qilsaq, siz bir istekni yoshurun éngingizgha ornatqan waqitta, uni choqum «bu istikim choqum emelge ashidu», dégen eqide yaki étiqad bilen birleshtürüp, yaki u istekni yoshurun éngingizgha ashundaq bir eqide yaki étiqad derijisige kötürüp turup ornitishingiz kérek.  Undaq qilmaydikensiz, u istek özingizning yoshurun éngining herikitini kontrol qilish rolini ötiyelmeydu.
 
 (2) «Biteleylik» ni Kishiler Özliri Keltürüp Chiqiridu
 
Dunyada milyonlighan ademler barki, ular özlirining bir kembeghel haletke chüshüp qélishini, yaki meghlup bolishini «biteleylik» yaki «teleysizlik» dep atilidighan bir xil ghelite küchning tesiridin bolghan, dep qaraydu. Hemde «Uni biz özimiz kontrol qilalmaymiz», dep oylaydu. Emeliyette bolsa, ularning külpiti bilen nes besishini ular özliri keltürüp chiqarghan.  Yeni, ularning yoshurun éngigha «Men bir biteley adem», dégen selbiy qarash ornap ketken bolup, yoshurun ang bir selbiy mahiyetlik qarashqa xuddi bir ijabiy mahiyetlik qarashqa oxshashla mu’amile qilidighan bolghachqa, ularning yoshurun éngi ashu selbiy tonushni ré’alliqqa aylandurghan.  Eger siz bir selbiy idiyini kallingizda nurghun qétim tekrarlap oylawéridikensiz, yoshurun éngingiz uni özige axiri qobul qilidu, hemde uni eng emeliy qedem-basquchlar bilen ré’alliqqa aylandurush üchün heriket qollinidu.
 
Biteleylik éngidin saqlinishtin bashqa, siz özingizge nisbeten bir ishench turghuzghanda, uni choqum yoshurun ang derijiside turghuzishingiz kérek. Eger siz özingizning melum bir ishni wujutqa chiqiralaydighan qabiliyitige nisbeten kallingizning arqa teripide bolsimu azraqla gumanda bolidikensiz, yaki siz yalghandin öz-özingizge ishen’gen bir qiyapetke kiriwalidikensiz, qilmaqchi bolghan ishingiz hergizmu ünüm bermeydu.
 
(3) Héssiyat bilen Birleshken Tepekkür
 
Peqet héssiyatlar bilen zich birleshtürülgen oy-xiyallarla yushurun ang’gha heqiqiy türde tesir körsiteleydu.  Köp sandiki kishiler keypiyat we héssiyat teripidin kontrol qilinidu.  Shundaq bolghachqa héssiyatlar ichidiki eng muhimlirini obdan biliwélish nahayiti zörür. Asasliq héssiyatlardin 7 ijabiy we 7 selbiy héssiyatlar bar bolup, selbiy héssiyatlar sizning xiyalingizgha tebi’iy halda kirip, sizning yardimingizge tayanmayla top-toghra sizning yoshurun éngingizgha yétip baridu. Ijabiy héssiyatlarni bolsa, siz aptomatik teklib prinsipidin paydilinip, xuddi okul urghandek öz könglingizge kirgüzmisingiz bolmaydu.  Shundaq qilghandin kéyinla, u ijabiy héssiyatlar sizning yushurun éngingizgha yétip baralaydu.
 
Bu héssiyatlar, yaki tuyghu impulisliri, xuddi xémirgha salidighan xémirturuchqa oxshash bolup, xiyal impulislirini bir passip halettin bir aktip haletke özgertidighan heriket éléménti bolup hésablinidu. Shunglashqa héssiyat bilen nahayiti yaxshi birleshtürülgen xiyal impulisliri «soghaq sewebler» tüpeylidin bashlan’ghan xiyal impulislirigha qarighanda köp asan ünüm béridu.  
 
Yette asasliq ijabiy héssiyatlar munulardin ibaret:

1. Istek héssiyati
2. étiqad héssiyati
3. Muhebbet héssiyati
4. Jinsiy munasiwet héssiyati
5. Qizghinliq héssiyati
6. Romantik ishlar héssiyati
7. Ümid héssiyati

Ijabiy héssiyatlardin bulardin bashqisimu bar bolup, bu yettisi ularning ichidiki ijadiy tirishchanliqta kishiler eng köp qollinidighan we eng küchlük héssiyatlardur.
 
Yette asasliq selbiy héssiyatlar munulardin ibaret:

1. Qorqush héssiyati
2. Qizghinish héssiyati
3. Öchmenlik héssiyati
4. Intiqam élish héssiyati
5. Ach közlük (béxilliq) héssiyati
6. Xurapatliq héssiyati
7. Aghrinish héssiyati

Insan könglide ijabiy we selbiy héssiyatlar birla waqitta teng mewjut bolup turalmaydu—choqum ularning birsi hökümranliq orunda turidu. Ijabiy héssiyatni könglingizdiki hökümran orun’gha olturghuzush sizning mes’uliyitingiz bolup, bu ishta adet qanuniyiti sizge zor derijide yardem qilalaydu. Imkaniyetning bériche özingizde ijabiy héssiyatlarni qollinish we ulardin paydilinish aditini yétildürüng.  Shundaq qilish arqiliq siz qelbingizni ijabiy héssiyatlar bilen teltüküs toldurup, selbiy héssiyatlarni könglingizge zadila kirelmes qiliwételeysiz. Siz mushu usuldin eynen we dawamliq paydilinish arqiliq özingizning yoshurun éngini pütünley tizginliyeleysiz.  Yoshurun éngingizda birla selbiy héssiyatning mewjut bolup turushi sizning yoshurun éngingizdin kélidighan barliq ijabiy yardemlerni pütünley üzüp tashliwételeydu.
 
Qisqisi, sizning xiyalliringizning héssiyat yaki tuyghu qismi sizning xiyalliringizgha jushqunluq, hayatiy küch we heriket ata qilidighan nerse bolup, hés-tuyghu bérilgen we étiqad bilen birleshtürülgen xiyallar shu waqitning özidila özlirining maddiy ékwéwaléntigha özgirishke bashlaydu.
 
Ilawe: Eger sizni onlighan-yüzligen kishiler qollap we alqishlap, peqet birla adem sizge töhmet chaplap, adaletsizlik bilen hujum qilghan we zerbe bergen bolsa, sizge qalghan onlighan-yüzligen ademlerning qilghinigha qarighanda ashu bir ademning qilghini bekraq tesir qilidu.  Bu tesirni könglingizdin chiqiriwétish üchünmu xéle uzun waqit kétidu.  Buning sewebi, yuqirida éytilghinidek, bir selbiy héssiyat bilen birleshken xiyal sizning yoshurun éngingizgha héch qandaq tosalghu yoqla udul yétip baridighanliqidur.  Hazirqi misalda, sizning yoshurun éngingizge kirgen xiyalgha öchmenlik we intiqam élish héssiyatliri qoshulghan bolidu.
 
(4) Her Qandaq Bir Tepekkür Özige Özi bilen Oxshash Tepekkürlerni Tartidu
 
Bir bayanatning ras yaki yalghan bolishidin qet’iy nezer, uni siz öz-özingizge qayta-qayta tekrarlap dewéridikensiz, siz axiri uninggha «bu ras», dep ishinidighan bolup qalisiz.  Bir yalghan gepni özingizge qayta-qaytilap dewersingiz, eng axirida uning yalghanliqini untup, uni ras, dep qobul qilisiz.  Hetta «u ras», dep resmiy ishinisiz.  Sizning hazirqi rohiy halitingizni siz könglingizde mewjut bolup turushqa yol qoyghan hökümran orundiki xiyallar belgiligen.  Siz öz könglingizge meqsetlik halda ornatqan, alqishlash tuyghusi bilen medet bergen, hemde bir yaki bir qanche héssiyatlar bilen birleshtürgen her qandaq bir xiyal sizning her bir herikitingiz, her bir pa’aliyitingiz, we her bir qiliqingizni yétekleydighan we tizginleydighan qozghatquch küchke aylinidu. 
 
Ilawe: Hökümran orundiki milletler mexsus lahiyilen’gen radi’o, télévizor, we gézit-yornal teshwiqatliri, mexsus pilanlan’ghan mektep terbiyisi we siyasiy öginishler, we pütünley burmilan’ghan tarixiy matériyallar asasidiki teshwiqatlardin paydilinip, kishilerge peqet meqsetlik halda aldin tallan’ghan uchurlarnila yetküzüp, yuqiridiki qanuniyettin paydilinip, béqinda millet xelqlirining könglini bashqiche programmilaydu, hemde ularning könglini mustemlike qilidu.  Shu arqiliq béqinda millet xelqlirining shu waqittiki ehwallargha bolghan puzutsiyesige tesir körsitip, ularni eqilge tayinip emes, héssiyatqa tayinip ish qilidighan qilip, ularni angliq we angsiz halda hökümran orundiki milletlerning iradisi boyiche ish qilidighan ademlerge özgertiwétidu.
 
Töwendiki jümle bir heqiqetning intayin muhim teswiridur: Héssiyatlarning birsi bilen birleshtürülgen bir xiyal bir magnitliq küchke aylinip, özige bashqa özi bilen oxshash yaki özi bilen munasiwetlik xiyallarni tartidu.
 
Héssiyatlarning biri bilen magnitlashturulghan bir xiyalni bir dane uruqqa oxshitishqa bolidu.  Bu uruqni bir munbet yerge térisingiz, u bixlinidu, chongiyidu, andin qayta-qayta köpiyidu.  Eslidiki bir dane kichik uruq oxshash xildiki san-sanaqsiz, minglighan-milyonlighan danchilargha aylinidu. 
 
Insan köngli özidiki hökümran orunda turidighan xiyalgha mas kélidighan bashqa xiyal impulislirini toxtawsiz halda özige tartip turidu.  Siz könglingizde saqlawatqan her qandaq bir xiyal, idiye, pilan we meqset özining bashqa tughqanlirini özige tartidu.  Bu tughqanlirini özining küchige qoshup, özlüksiz chonguyup, u eng axiri eslidiki xiyalni könglide saqlighan kishining asasiy qozghatquchi küchige aylinidu.
 
Undaqta eslidiki idiye, pilan, yaki meqset uruqini könglingizge qandaq ornatqili bolidu?  Uni öz ichingizde qayta-qayta tekrarlash arqiliq öz könglingizge ornatqili bolidu.  Shunglashqa siz özingizning asasiy meqsiti yaki intayin éniq asasiy nishanining bayannamisini éniq yézip chiqip, uni yadliwélip, u sizning yoshurun éngingizgha yétip barghiche her küni ünlük awaz bilen qayta-qayta oqushingiz kérek.
 
Siz könglingizni igilep turushqa yol qoyghan hökümran orundiki xiyal sizning hazirqi rohiy halitingizni belgileydu.  Shundaq bolghachqa, eger siz shundaq tallash qilsingiz, siz burunqi yaman ishlar tüpeylidin könglingizge kirip qalghan nachar tesirlerni chörüp tashliwétip, özingizning buningdin kéyinki hayatini özingiz arzu qilghan boyiche orunlashturalaysiz.  Mesilen, siz özingizning meniwi bayliqlirini bir qétim éniqlap chiqish arqiliq, özingizning eng chong ajizliqi öz-özingizge bolghan ishenchining kemchil ikenlikini bayqishingiz mumkin.  Buni siz aptomatik teklib prinsipi arqiliq yéngeleysiz, hemde uni gheyret-jasaretke aylanduralaysiz.  Buning üchün siz bir qisim ijabiy xiyal impulislirini addiy sözler bilen yézip chiqip, ularni yadliwéling, andin ularni bu xiyallar sizning yoshurun éngingizning ish béjirish qoraligha aylan’ghiche öz ichingizde qayta-qayta tekrarlang.
 
Özige bolghan ishenchisi kemchil bolghan kishiler töwendiki formuladin paydilinip, özige ishench turghuzsa bolidu.
 
(5) Özige Ishench Turghuzush Formulasi
 
1-Men öz hayatimning intayin éniq meqsitige yeteleydighanliqimni bilimen. Shung üchün men öz-özümdin ashu meqsetni emelge ashurush yolida toxtawsiz halda eng axirghiche heriket qollinishni telep qilimen, we uninggha wede bérimen.
 
2-Men özümning könglidiki hökümran orunda turidighan oylarning eng axirida sirtqa qaritilghan fizikiliq ish-heriketlerni barliqqa keltürüp, tedriji halda özlirini maddiy ré’alliqqa aylanduridighanliqini chüshinimen.  Shunglashqa men her küni 30 minut waqit chiqirip xiyalimni bir yerge yighip, «méning mundaq mundaq bir adem bolghum bar» dep arzu qilidighan ashu ademni köz aldimda namayan qilimen.  Mushu arqiliq men könglümde bir intayin éniq köngül menzirisini wujutqa keltürimen.
 
3-Men aptomatik teklib prinsipi arqiliq könglümde dawamliq saqlighan istekning eng axirida méning meqsitimni emelge ashurushtiki emeliy charilerni tapalaydighanliqini bilimen. Shunglashqa men her küni 10 minut waqit chiqirip, özümdin öz-özümge bolghan ishenchni yétildürüshni telep qilimen.
 
4-Men öz hayatimning intayin éniq asasiy nishanini nahayiti éniq yézip chiqtim.  Men u nishanning emelge ashidighanliqi heqqide özümge nisbeten yéterlik ishench turghuzup bolghiche toxtimay tirishimen.
 
5-Men her qandaq bayliq yaki bir xizmet ornining peqet heqiqet we adaletlik üstige qurulghandila andin uzun muddet saqlinip turalaydighanliqini toluq chüshinimen.  Shuning üchün, men peqet qilghan ishim bilen munasiwetlik kishilerning hemmisige payda yetküzidighan ishlarnila qilip, bashqa ishlarni hergizmu qilmaymen. Men özümge özüm paydilinishni arzu qilidighan küchlerni jelb qilish, we bashqa kishiler bilen hemkarlishish arqiliq ghelibe qazinimen.  Men özümning bashqilargha yardem bérish rohi arqiliq bashqilarning özümge bolghan yardimini qolgha keltürimen.  Men özümde pütün insaniyetke qaritilghan muhebbetni yétildürüsh arqiliq, özümdiki öchmenlik, hesetxorluq, ichi tarliq, shexsiyetchilik, we körelmeslikni yoqitimen.  Chünki men bashqilargha qaritilghan selbiy pozitsiyining özümge hergizmu muweppeqiyet élip kelmeydighanliqini obdan bilimen.  Men bashqilarghimu we özümgimu ishinimen, shunglashqa bashqilarnimu özümge ishendüreleymen.  
 
6-Men bu formulagha imza qoyup, hemde uni yadliwélip, uni her küni bir qétim toluq étiqadim bilen ünlük oquymen. Shu arqiliq men uning tedriji halda méning tepekkürimge we ish-herikitimge tesir körsitishini qolgha keltürüp, bir öz-özige tayinidighan, muweppeqiyetlik adem bolup chiqimen.

 (6) Adet Qanuniyiti
 
Siz öz istikingizni yézip chiqip, uni köp qétim tekrarlishingizdiki meqset, özingizning könglingizdiki asasliq oygha ishinishni bir xil adetke aylandurush.  Siz buni aptomatik teklib prinsipidin paydilinip, hökümran orundiki xiyalingizni özingizning yoshurun éngigha kirgüzüwétish arqiliq emelge ashurisiz. 
 
Siz xet yézishni yéngi ögen’gen waqtingizda, desliwide qeghezdiki herpning üstige shu herpni uchuqlash teriqiside yazisiz. Andin u herpni bir nechche qur, hetta bir qanche waraq tekrarlap yazisiz.  Shundaq qilish arqiliq eng axirida her qétim ashu bir heripni yazghanda, uni oxshash shekilde yazidighan, uni barghanseri asan we téz yazidighan bolup kétisiz.  Shuning bilen ashu heripni yézish sizning bir aditingizge aylinidu.
 
Adet prinsipi sizning bediningizdiki fizikiliq muskullargha qandaq tesir körsetken bolsa, sizning könglingizdiki her xil iqtidarlarnimu shundaq tizginleydu.  Buning bir misali yuqirida tonushturulghan, özide öz-özige bolghan ishenchini turghuzush usulini igilesh we uningdin paydilinish jeryanidur.  Öz-özingizge tekrar-tekrar dégen bir bayanat, yaki nurghun qétim öz-özingizge tekrar déyish arqiliq könglingizning chongqur yérige pükken bir istek, eng axirida bediningizning sirtqa qaratqan fizikiliq ish-heriketliri teriqiside namayan bolidu.
 
Ademlerning hemmisi adet boyiche ish köridighan janliqlar.  Adet bolsa bir tal tanigha oxshash bolup, biz her küni u tanini azraq-azraqtin örüp, eng axirida uni üzgili bolmaydighan derijidiki bir pishshiq nersige aylandurimiz.
 
Adet sizni özingizning iradisi, istiki we mayilliqigha qarimu-qarshi kélidighan ishlarni qilishqa mejburlap, shu arqiliq sizning ish-herikitingiz we xaraktéringizni tizginliyeleydu.  Shundaq bolghaniken, siz uni igiliyeleysiz, idare qilalaysiz, hemde özingizge paydiliq terepke bashliyalaysiz.  Minglighan kishiler mushu bilimdin paydilinip, adet küchini yéngi yönilishke bashlighan.
 
Adet bir xil «rohiy yol» bolup, siz qollan’ghan ish-heriketler ashu yolda mangghili xele uzun bolghan, hemde u yolda her qétim mangghanda uni téximu chong we téximu kengri qilghan bolidu.  Siz bir chédirliq yaki ormanliqta mangghanda, nahayiti tebi’iy halda eng ochuq yolni tallap mangisiz.  Ademning rohiy ish-herikitimu del shuninggha oxshash—ademning rohiy ish-herikitimu tosqunluq eng az bolghan siziqni we eng yaxshi échilghan yolni boylap élip bérilidu.
 
Adet tekrarlash arqiliq wujutqa keltürülidu, hemde bir tebi’iy qanuniyet boyiche shekillendürülidu.  Kona adetni buzushning eng yaxshi usuli uninggha qarshi bir yéngi adetni yétildürüp, uni kona adetning ornigha dessitish.  Siz bir yéngi adetni turghuzup, yaki bir yéngi rohiy yolni tallap, uningda her qétim mangghanda, siz uni barghanseri chongqurlashturisiz we kéngeytisiz.  Eng axirida uningda méngish nahayitimu asanliship kétidu.  Mushundaq rohiy yol échish intayin muhim bolup, uni qanchilik tekitlisimu azliq qilidu.
 
 (7) Yéngi Adet Yetildürüsh Qa’idiliri
 
Siz töwendiki qa’idilerdin paydilinip, özingiz isteydighan yéngi adetlerni yétildüreleysiz:
 
1-Yéngi adet yétildürüshning deslepki mezgilliride, özingizge nahayiti küchlük mejburlash küchi we nahayiti yoquri qizghinliq ishliting.  Tepekküringizdin kélip chiqqan hés-tuyghularni bilip turushqa tirishing. Ésingizde bolsunki, siz hazir özingiz üchün bir rohiy yol échishning birinchi qedimini bésiwatqan bolup, bundaq qilish desliwide nahayiti qiyin’gha toxtaydu, emma tedriji halda asanlishidu.  Desliwide her bir yolni imkaniyitingizning bériche ochuq we chongqur yasang, shundaq qilsingiz u yolda kéyinki qétim mangghanda siz uni asanla köreleysiz.
 
2-Pütün zéhningizni mushu yéngi-yol yasashqa merkezleshtürüp, barliq kona yollarni pütünley untup kéting.  Sizning köngül bölüdighiningiz peqet siz hazir yasawatqan yéngi yolla bolsun.
 
3-Yéngi yasighan yolingizda imkanqeder köprek ménging.  Teley we pursetlerning özligidin kélishini saqlap olturmay, shundaq qilishqa özingiz purset yariting.  Yéngi yolda qanche köp mangsingiz, u yol shunche baldur asanlishidu.
 
4-Siz burundin méngip kéliwatqan kona we asanraq yolda méngishqa bolghan qiziqturushqa pütünley qarshi turung.  Siz her qétim ashundaq qilghanda, siz téximu iradilik bolup, sizning kéyinki qétimda kona yolda mangmasliqingiz téximu asanlishidu.  Emma uning eksiche bolidiken, siz kona yolda méngish patqiqigha téximu chongqur pétip, kona yoldin waz kéchishingiz barghanseri qiyin’gha toxtaydu.  Bu bir intayin halqiliq peyt bolup, ishning béshidin bashlapla özingizning yüksek jasariti, bir ishni izchil dawamlashturush rohi we tewrenmes iradisini ispatlang.
 
5-Sizning intayin éniq asasiy nishaningiz bolalaydighan toghra yolni tallap chiqishqa qet’iy kapaletlik qiling.  Uningdin kéyin héch qandaq qorqmay we héch qandaq ikkilenmey tallighan yolingizni boylap algha ilgirileng.  Öz nishaningizni obdan tallap, andin sizni ashu nishan’gha élip baridighan yaxshi, chongqur we kengri rohiy yolni yasap chiqing.
 
Ilawe: Napoliyonning kitabining mushu qismida Waltér Wintil («Walter D. Wintle») 1905-yili yazghan «Oylash» dégen bir shé’ir bérilgen bolup, uni In’glizchidin Uyghurchigha terjime qilishta men özümni sel ajiz kördüm. Shunglashqa uni bir oqup béqishni isteydighan oqurmenlerge ongayliq bolsun üchün, men u shé’irning tor adrésini bu yerge yézip qoydum.  Eger birer qérindishimiz bu shé’irni In’glizchidin Uyghurchigha terjime qilip, manga iwertip berse, men uni mezkur maqalining kéyinki bölümige kirgüzüp qoyimen. Bezi oqurmenler mendin Napoliyonning «Muweppeqiyet qanunityi» bilen «Oylap bay bolush» dégen ikki kitabining intérnéttiki nusxisini sorighan bolup, men ularning tor adréslirinimu mushu yerge yézip qoydum.
 
1905-yili yézilghan In’glizche shé’ir «Oylash»:
http://oldpoetry.com/opoem/119016-Walter-D-Wintle-Thinking
 
In’glizche «Muweppeqiyet Qanuniyiti» dégen kitab:
http://napoleon-hill-laws-of-success.com/

In’glizche «Oylap bay bolush» dégen kitabning élkitabi:
http://www.utopianwebstrategy.com.au/uws/wp-content/uploads/think-and-grow-rich-napoleon-hill.pdf


(Dawami bar)