Ghayini Ré'alliqqa Aylandurushning Sirliq Qanuniyiti (5)
 
Erkin Sidiq

2010-yili 11-ayning 25-küni

[1-Bölüm[2-Bölüm[3-Bölüm]   [4-Bölüm]   [5-Bölüm]   [6-Bölüm]   [7-Bölüm]   [8-Bölüm]   [9-Bölüm]

Kona Yéziq: [meripet.com [PDF]  [uyghuracademy.org]   [meripet.org]


7. Qizghinliq, Öz-Özini Bashqurush, we Qet’iy Dawamlashturush
 
 (1) Qizghinliq
 
Qizghinliq bir xil kem bolsa bolmaydighan küch bolup, uning qudritini bashqa héch qandaq nersiningki bilen sélishturush mumkin emes.  Eger sizning bir intayin éniq asasiy nishaningiz bar bolidiken, sizning hazir uni wujutqa chiqirishqa teyyarlinip bolghan-bolmighanliqingizdin qet’iy nezer, siz ashu asasiy nishaningizgha nisbeten chongqur qizghinliq yétildüreleysiz.  Siz öz nishaningizni emelge ashurushtin nahayiti yiraq bolishingiz mumkin, emma siz qelbingizde qizghinliq otini tutashtursingiz, hemde uni toxtitip qoymay köydürüp tursingiz, hazir sizning yolingizni tosup turghan barliq tosalghular xuddi bir séhri küchning tesiridin bolghandekla ghayip bolup, özingiz burun hés qilmighan küch-qudretke ige ikenlikingizni hés qilisiz.
 
Qizghinliqning qozghutishi bilen qelbingiz bir yoqiri tekrarliqta titrigende, bu titreshni sizning chöringizdiki belgilik bir radi’os ichide turghan kishiler, bolupmu sizge yéqin turghan kishilerning köngli qobul qilidu.  Siz bir adem topigha sözlisingiz, sizning qizghinliqingiz tingshighuchilarning qelbige tesir körsitip, ularning qelbimu sözligüchining qelbige maslashqan halda titreydu.  Bir adem yene bir adem bilen sodilashqanda, bezide bir sodida kélishishning «pisxologiyilik peyti» yétip keldi, dégenni hés qilidu.  Emeliyette bolsa bu chaghda satquchining qizghinliqi alghuchining qelbige tesir körsitip, alghuchining qelbini satquchiningkige mayil keltürgen.
 
Aptomatik teklip prinsipidin paydilinip, hemde intayin éniq asasiy nishanning yardimi bilen, könglingizge choqum muweppeqiyet qazinish arzusini ornitip baqidighan bolsingiz, sizning burunqi kechürmish-tesiratliringizgha derhalla jan kirip, siz üchün xizmet qilishqa bashlaydu.  Eger siz qelbingizge bir arzuni intayin chongqur ornatmaqchi bolsingiz, uni choqum mertlerche qizghinliq bilen birleshtürüng.  Chünki, qizghinliq arzuning téz sür’ette ösüshige we uning menggü saqlinip qélishigha kapaletlik qilidighan oghuttur. 
 
(2) Rohiy Sézim Télépatiye Qanuniyiti
 
Télépatiye prinsipi déginimiz belge, simwol yaki awazning yardimige tayanmay turupla tepekkürni bir qelbdin bashqa bir qelbge yetküzüsh herikitini körsitidu.  Rohiy sézim télépatiyisi tüpeylidin, siz peqet öz-özingizge ishen’gen waqittila, bashqilarmu sizge ishinidu.  Bashqilar özini sizning tepekküringizgha «tengshep», siz özingizge nisbeten qandaq tuyghuda bolsingiz ularmu sizge nisbeten sizningki bilen oxshash tuyghuda bolidu.  Siz özingiz toghrisidiki oyliringizni toxtimay sirtqa tarqitidighan bolup, eger sizde özingizge nisbeten bir étiqad bolmaydiken, sizning bu xiyalingizni bashqilar qobul qilip, ularmu sizge ishenmes bolup qalidu.
 
(3) Bir Oyni Bashqilarning Qelbide Eks Ettürüsh
 
Teklip bérish sizning sözliringiz, sizning ish-heriketliringiz hemde sizning köngül halitingiz arqiliq bashqilargha tesir körsitish prinsipi bolup, u pisxologiyining eng ötkür we eng küchlük prinsiplirining biri.  Siz ish qilghanda, sözligende we oylighanda ashu prinsiptin paydilinisiz.  Emma, eger siz selbiy teklip bilen ijabiy teklipning perqini chüshenmeydikensiz, siz bu prinsiptin özingizge ghelibe élip kélish üchün emes, belki, meghlubiyet élip kélish üchün paydilinishingiz mumkin.
 
Insanlarning qelbi bir kishini hang-tang qalduridighan mashinigha oxshaydu.  Uning gewdilik xaraktérlirining biri shuki, u tashqi teklip yaki aptomatik teklip arqiliq özige yétip kelgen tesiratlarni tebi’etke maslashturghan halda guruppigha ayrip, selbiy tesiratlarni méngining bir yéride, ijabiy tesiratlarni bolsa méngining bashqa bir yéride saqlaydu.  Bu tesiratlar yaki burunqi kechürmishlerning biri eslime prinsipi arqiliq asasiy ang’gha chaqirip kélin’gende, ashu tesirat bilen oxshash mahiyetlik bashqa barliq tesiratlarmu uning bilen bille kélidu.  Bu xuddi zenjirning bir uchini kötürse yene bir uchimu uning bilen teng kötürülgen’ge oxshash.  Mesilen, ademning könglidiki guman tuyghusi peyda qilidighan bir ish ashu ademge özide  burun guman tughdurghan bashqa barliq kechürmishlerni eslitidu.  Eger birsi sizdin pul sorisa, shu zamatla yadingizgha siz burun bashqilargha pul bérip turup yoluqqan nachar kechürmishler kélidu.  Birlishish qanuniyiti (In’glizche «law of association») ge asasen, köngülge yétip kelgen barliq oxshash héssiyatlar, kechürmishler, we sézim tesiratliri méngining bir jayida saqlan’ghan bolup, ularning birini eslisingiz, kallingizda ularning qalghanlirimu peyda bolidu. 
 
Bu prinsip insan qelbidiki barliq sézim tesiratigha mas kélidu we ularni kontrol qilidu.  Mesilen, qorqush tuyghusigha qarap baqayli.  Biz qorqush bilen munasiwetlik bir héssiyatning asasiy éngimizgha yétip kélishige yol qoyidighan bolsaq, bu héssiyat özi bilen munasiwetlik bashqa barliq yirginchlik héssiyatlarni chaqirip kélidu.  Köngülde mushundaq bir qorqush héssiyati mewjut bolup turghanda, uningda bir jür’et tuyghusini hasil qilish mumkin emes.  Choqum bu ikkisining ichidiki biri hökümranliq orunda turushi shert.  Ular mahiyet jehettin perqliq bolghachqa, bir-biri bilen bille turalmaydu.  Her bir nerse özige özi bilen oxshash nersini tartidu.  Asasiy angda tutup turghan her bir tepekkür özige bashqa özi bilen oxshash mahiyetlik tepekkürlarni tartidu.
 
(4) Öz-Özini Bashqurush
 
Bu sözni Napoliyon In’glizche «self-control» dep alghan bolup, uning uttur menisi «öz-özini kontrol qilish» din ibaret.  Lékin, men Napoliyonning kitabidiki mezmun’gha asaslinip, bu sözni «öz-özini bashqurush», dep élishni bekraq muwapiq kördüm.
 
Insanlargha öz-özini bashqurush iqtidari ata qilin’ghan bolup, bu iqtidar bashqa héch qandaq janliqlargha ata qilinmighan.  Yeni, insanlargha hazirghiche bayqalghan, eng yoqiri derijide retlen’gen énérgiye—tepekkür énérgiyisini ishlitish iqtidari ata qilin’ghan.  Shundaq éytishqimu boliduki, tepekkür mushu matériyal we fizikiliq nersiler dunyasi bilen Ilahiy («Divinity») dunyani öz-ara tutashturup turidighan eng yéqin baghlinishtur.
 
Siz oylash qabiliyitige ige bolupla qalmastin, uningdin nechche ming hesse muhim bolghan özingizning xiyal-tepekkürini özingiz kontrol qilish, we ularni özingiz üchün xizmet qildurush qabiliyitigimu ige.  Bu uqum intayin muhim bolup, bu uqumni muwapiq sewiyide turup chüshendüreleydighan kishiler anche köp emes.  Sizning méngingiz bir dinam yaki génératorgha oxshash bolup, u «tepekkür» dep atilidighan bir sirliq énérgiyini barliqqa keltüridu, hemde uni ishqa salidu.  Sizning méngingizni ishqa salidighan qozghatquchidin mundaq ikkisi bar. Uning biri aptomatik teklip, yene biri bolsa teklip.  Siz bir tepekkurni berpa qilish üchün ishlitidighan matériyalni özingiz tallisingiz boluwéridighan bolup, bu «aptomatik teklip» yaki «öz-özige bérilgen teklip» dep atilidu. Siz özingiz bir tepekkürni wujutqa keltürüsh üchün kétidighan matériyalni bashqilarning tallap bérishige tapshursingizmu boluwéridighan bolup, bu «teklip», dep atilidu.
 
Ademni uyatlanduridighan bir emeliyet shuki, mutleq köp sandiki tepekkürler bashqilar teripidin wujutqa keltürülgen.  Étirap qilmisaq bolmaydighan téximu bekraq nomusluq ish shuki, köpünchilirimiz ashundaq bashqilar teripidin wujutqa keltürülgen tepekkürlerni héch qandaq tekshürüshtin ötküzmey, yaki ularning toghra-xataliqi heqqide héch qandaq gumanlanmayla eynen qobul qilimiz.  Biz künlük gézitni uningda sözlen’gen nersilerning hemmisi heqiqettekla oquymiz.  Bashqilarning gheywetlirige we quruq geptanliqigha xuddi heqiqetke ishen’gendek ishinimiz.  Tepekkür biz mutleq halda kontrol qilalaydighan birdin-bir nerse turuqluqmu, biz bashqilarning öz köngül sariyimizgha kirip, «teklip bérish» usuli arqiliq u yerge özlirining chataqlirini, qiyin ehwallirini, kélishmesliklirini, we yalghan sözlirini ekirip qoyushigha yol qoyup, xuddi bizning ishikni taqap ularni kirgüzmeslik qabiliyitimiz yoqtek bir ishni qilimiz.
 
Siz özingizning könglide hökümranliq ornida turidighan tepekkurni teshkil qilidighan matériyalni özingiz tallash iqtidarigha ige bolup, eger hökümran orundiki ashu tepekkür ijabiy tepekkür bolidiken, u sizni muweppeqiyetke élip baridu. Eger u selbiy tepekkür bolidiken, u sizni meghlubiyetke élip baridu.
 
Öz-özini bashqurush déginimiz özining tepekkürini bashqurush, dégenliktin ibaret.  Bu jümlini ünlük awazda qayta-qayta oqung.  Chünki, bu bir jümle söz maqalining mezkur bölümidiki eng muhim jümle.
 
Aptomatik teklip prinsipidin paydilinip, qelbingizde özingizning intayin éniq asasiy nishanigha mas kélidighan ijabiy, aktip we paydiliq tepekkürlerni turghuzung.  Shundaq qilsingiz sizning könglingiz ashu tepekkürlerni emeliyetke aylandurup, uni sizge bir pütken mehsulat teriqiside ekilip béridu.  Mana bu tepekkurni bashqurushtur.  Siz könglingizdiki hökümran orunda turidighan tepekkurni meqsetlik halda tallap, tashqi tekliplerni qet’iy ret qilsingiz, öz-özini kontrol qilish usulidin eng yoqiri derijide we eng ünümlük halda paydilan’ghan bolisiz.  Insanlar mana mushundaq qilalaydighan birdin-bir janliqlardur.
 
(5) Tenqitke Uchrashtin Qorqush Yéngi Idiyilerni Öltürüp Tashlaydu
 
Siz melum bir chong ishni qilish heqqide yéngi idiyige kelgende, könglingizde «bashqilar bu ishqa qandaq qaraydighandu?» dégen endishe peyda bolidu.  Shuning bilen bezide siz u ishni qilmasliqqa bahane izdeysiz.  Obdan tehlil qilip baqsingiz, sizde peyda bolghini tenqittin qorqush héssiyati bolup, u könglingizdiki mundaq soallar arqiliq eks étidu:
Könglingizde mushu we uningdin bashqa nurghun soallar peyda bolup, birdinla pütün dunya öz diqqitini sizge burap, sizni mazak qilip, sizni öz istikingizdin waz kéchishke dewet qiliwatqandek tuyulushi mumkin. Mushundaq waqitta, kallingizdiki yéngi idiye téxi toluq tughulup bolalmighan bolup, shu waqitning özidila qilidighan ishlar toghrisida bir intayin éniq pilan tüzüsh arqiliq, bu idiyige hayatliq ata qilishqa toghra kélidu.  Bir idiyini ozuqlanduridighan waqit del ashu idiye yéngidin tughulghan waqittur.  U bir minut hayat turalaydiken, uning saqlinip qélish éhtimalliqimu shunche yoqiri bolidu.  Köp sandiki idiyilerni öltürüp tashlaydighan nerse tenqidke bolghan endishidin ibaret bolup, adem tenqidke uchrashtin qorqidiken, bir idiyini pilan tüzüsh we ish élip bérish basquchigha élip baralmaydu.
 
Öz nishanigha yétishke ishenchisi bar kishiler «mumkin emes» dégen sözni étirap qilmaydu.  Ular waqitliq meghlubiyetkimu ten bermeydu.  Ular özlirining muweppeqiyetke choqum érishidighanliqini bilidu.  Eger ularning bir pilani ünüm bermeydiken, uning ornigha derhal bashqa bir yéngi pilanni dessitidu.  Her bir melum qimmetke ige netijilerning hemmisi axirqi muweppeqiyetke érishishtin burun melum derijidiki ongushsizliqqa duch kélidu.  Tomas Édison 10 ming qétimdin artuq tejribe ishlep, andin özi ijat qilghan ün’alghu mashinisigha «Meri xanimning bir paxlani barti» dégen awazni muweppeqiyetlik aldurghan.  
 
(5) Qet’iy Dawamlashturush
 
Siz her waqit ésingizde ching saqlashqa tégishlik yene bir söz «qet’iy dawamlashturush» tin ibaret.  Her bir netije bedel telep qilidu. Héchnime bermey, peqetla élish hergizmu mumkin emes.  Birer ishni élip bérip, shu arqiliq bir netijini qolgha keltürüsh xuddi tebi’et bilen eng yoqiri derijide we eng alijanap shekilde sodilashqan bilen oxshash. Tebi’etni gollighili we aldighili bolmaydu.  Siz peqet tebi’etke tégishlik bedel töligendila, u andin sizge özingiz istigen nersini béridu.  Bu yerdiki bedel toxtawsiz, égilmes, we qet’iy rewishte dawamlashturulghan tirishchanliqtin ibaret.
 
Qiliwatqan ishini qet’iy dawamlashturush aditini yétildürüshning 4 addiy qedem-basquchliri bar.  Ular sizdin nahayiti köp eqil we alahide unwan telep qilmaydighan bolup, sizdin peqet azraq waqit bilen azraq tirishchanliqla telep  qilidu. Bu qedem-basquchlar töwendikilerdin ibaret:
  1. Bir intayin éniq meqset bilen uni emelge ashurush toghrisidiki bir köyüp turghan istekke ige bolush.
  2. Toxtawsiz qollinidighan ish-heriketler arqiliq eks ettürülgen bir intayin éniq pilani bar bolush.
  3. Tughqanlarning, dostarning we tonushlarning selbiy tekliplirini, we bashqa barliq selbiy we soghuq su chéchish xaraktéridiki tesirlerni pütünley chekleydighan iradige ige bolush.
  4. Öz pilanini ijra qilish jeryanida özige dawamliq medet bérip turidighan bir yaki bir qanche hemkarlashquchiliri bar bolush.
Bir ishni qet’iy dawamlashturalaydighan kishilerde her xil qiyinchiliqlarni yéngeleydighan birer sirliq qabiliyet bar bolamdu? Bir ishni qet’iy dawamlashturalaydighan kishilik süpet sizning qelbingizde melum shekildiki rohiy, meniwiy, yaki ximiyilik heriketni wujutqa keltürüp, shu arqiliq sizge bezi tebi’ettin tashqiri küchlerni ata qilamdu?  Napoliyonning Xenry Ford bilen Tomas Édison üstide élip barghan uzun muddetlik analizining körsitishiche, ularning ashundaq kishini heyran qalduridighan muweppeqiyetlerni qolgha keltürüshide asasliq rol oynighan nerse, ularning qiliwatqan ishini qet’iy dawamlashturush aditidinla ibaret. Eger siz peyghemberler, peylasoplar we diniy lidérlar üstide adil tetqiqat élip baridighan bolsingiz, ular qolgha keltürgen muweppeqiyetlerning asasiy menbeliri ularning qilghan ishini qet’iy dawamlashturush, tirishchanliqni bir nuqtigha merkezleshtürüsh, we intayin éniq meqsetke ige bolush alahidilikliri iken, dégen muqerrer xulasige kélisiz.

(Dawami bar)

© Copyright 2004 Uyghur Meripet  Torbeti 

Cell Phone Accessories
Cell Phone Accessories