Erkin Sidiqning Qisqiche Terjimali

[1-Bölum], [2-Bölum], [3-Bölum], [4-Bölum], [5-Bölum]
[6-Bölum]
[7-Bölum], [8-Bölum], [9-Bölum], [10-Bölum]
[11-Bölum], [12-Bölum]
, [13-Bölum], [14-Bölum], [15-Bölum]

10-Bölum: Jenubiy Kaliforniyediki Magistirliq Oqushi

Erkin Sidiq Yaponiyidin qaytip kelgendin kéyin, fizika fakultétidiki Xalidem appay aghrip qalghanliqi üchün, u yéteklewatqan oqush püttürüsh aldidiki 3 Uyghur we bir qazaq éléktir kespi oqughuchilirining oqush püttürüsh maqalisigha yétekchi boldi. U chaghda Amérikidiki oqush toghrisida téxi resmiy chaqiriq kelmigen idi. Erkin Sidiq bu oqughuchilarni her küni etigen saet 8 din kech saet 5 kiche öz ishxanisigha yighiwélip, ularning ilmiy maqale teyyarlash ishini resmiy Yaponiyedikidek élip bardi. Shunga bu oqughuchilarning qizghinliqimu intayin yuqiri bolup, Erkin Sidiqqa yéqindin masliship qattiq tirishti. Ular bir qanche éléktromagnitliq dolqun mesilisi toghrisida aldi bilen matématikiliq formulalarni keltürüp chiqirip, andin ularni kompyutér arqiliq hésablap, buningdin netije chiqip bolghanda, ularni grafik qilip sizip chiqip, ularni öz maqalilirigha kirgüzdi. Bu ish fakultétta intayin chongqur tesir qozghidi. Ular maqalilirini oqup bolup, oqush püttüridighanda, bu 4 oqughuchidin 3 kishining maqalisi "ela", yene birsining bolsa "yaxshi" bolup bahalandi. Bu oqughuchilarni qoldin chiqirip bolushighila, Erkin Sidiqqa Amérikidin oqushqa qobul qilin'ghanliq xewiri keldi. Gerche ular chaqiriq qeghizini 6-ayning béshidila mangduriwetken bolsimu, u chaqiriq Erkin Sidiqqa zadila tegmidi. Shuning bilen 7-ay kirgende ular chaqiriqning köpeytilgen nusxisidin yene birni mangdurdi. Bu ariliqtiki bir ay waqitni Erkin Sidiq intayin tit-titliq ichide ötküzdi.

Erkin Sidiq Shinjang Uniwérsitétida oquwatqan waqtidila uni eng échindurghan bir ehwal Uyghurlarning aliy mektepte oqughuchi qobul qilishidiki arqa ishik mesilisi idi. Arqa ishikning éghirliqidin, her yili aliy mektepke oqughuchi qobul qilish imtihan qeghizini tekshüridighan we oqughuchi qobul qilinidighan waqitta, pütün Uyghur diyaridiki aliy mektepke kirish yéshidiki balisi bar ata-anilar jiddiy heriketke kélip, balisining ishigha yol mangidu. Nurghun iqtisadtin ayrilip, balilirini aliy mektepke yenila qobul qilduralmaydighan ishlar dawamliq bolup turidu. Ishning eng éghir yéri, pütün Uyghur xelqi oqughuchi qobul qilish sistémisigha ishenmes bolup ketken bolup, her yili oqughuchi qobul qilish bashlan'ghanda, nurghun ata-anilar wehimige chüshidu. Arqa ishik bilen aliy mektepke kélip qalghan oqughuchilar derske yétishelmeydu. Uyghurlar rehimdil bolghachqa, köpinche oqutquchilar ashu ajiz oqughuchilarnimu bir amal qilip oqush püttüriwalsun, dep, pütün sinipning oqutush sewiyisini töwenlitidu. Mushundaq bir zenjirsiman jeryan tüpeylidin, Uyghur aliy maaripi yéterlik derijide tereqqiy qilalmay, barghanséri arqigha chékinidu. Erkin Sidiqning neziride, bu ehwalgha heqiqiy köngül bölidighan bashqa millet kishilirining bolushi mümkin emes. Uni choqum Uyghurlar özi ongshishi kérek idi. Shunga Yaponda oqush jeryanida, Erkin Sidiq bu ish üstide nurghun bash qaturup, bu ehwalni Uyghurlarning hazirqi éngigha tayinip turup ongshashning mümkin emeslikini, uning eksiche, uni tüzüm we ünümlük oqughuchi qobul qilish sistémisi arqiliq tüzlesh kéreklikini hés qildi. Hemde Uyghurlarning aliy mektepke oqughuchi qobul qilishidiki arqa ishikni pütünley yoq qiliwétish tedbirini oylap chiqti. Erkin Sidiq öz oylirini maarip nazaritining muawin bashliqliri Sultan muellim bilen Tilwiqan muellim (merhumning yatqan yéri jennette bolghay) lerge aghzaki éytqanda, ular intayin xushal bolup, Erkin Sidiqtin özi oylighanlirini tepsili yézip chiqip, ulargha yollashni telep qildi. Lékin, Yaponiyedin qaytip kélip, Amérikigha mangghiche bolghan 3 ay waqit ichidiki yuquriqidek bir qatar ishlarning aldirashchiliqi bilen, Erkin Sidiqning öz oylirini yézip chiqishigha purset bolmidi. Erkin Sidiq bu ish üchün hazirghiche pushayman qilidu. Hemde öz-özidin dawamliq "eger men chet elde turup qalmay, Uyghur diyarigha qaytip kétip ishligen bolsam, yuquriqidek ishlarda oylighanlirimni emelge ashuralighan bolattimmu? Méning ashundaq qilishimgha yol qoyilattimu? Eger yol qoyulghan bolsa, undaq qilishni qanchilik waqit dawamlashturalighan bolattim?" dep soraydu.

1988-yili 7-ayning béshida Amérikining oqush chaqiriqini tapshurup alghandin kéyin, Amérikidiki mektepning ehwalini zadila chüshenmeydighan Erkin Sidiq xette éytilghan mektepke tizimgha aldurush waqtigha emel qilish üchün (kéyin uqsa, u eslide Amérikiliq oqughuchilardin telep qilghan tizimlitish waqti iken), 8-ayning béshida bolidighan qurban héytqimu qarimay, 7-ayning axiri Béyjinggha qarap yol aldi. Hemde 1988-yili 7-ayning 29-küni Amérikining Kaliforniye shtatidiki Los Anjélis shehirige yétip bardi. Lékin, bu mekteptiki ders 9-ayning béshida bashlinidighan bolup, Erkin Sidiq bir ay bikar bolup qélip, TOEFL imtihanigha teyyarliq qildi. Hemde shu ariliqta mashina heydeshni öginip, shopurluq kénishkisi éliwaldi.

Kaliforniyede aliy mektepler shtat igilikidiki we xususiy igilikidiki mektepler, dep ikkige bölinidu. Xususiylar igilikidiki dangliq mekteplerdin Stanford Uniwérsitéti, Kaliforniye Téxnologiye Instituti we jenubiy Kaliforniye Uniwérsitéti dégenler bar bolup, uningdin bashqa yene chong-kichik aliy derijilik mekteplerdin 100 din artuqi bar. Shtat igilikidiki mekteplerdin Kaliforniye Uniwérsitétidin 10 mektep, Kaliforniye Shtat Uniwérsitétidin 22 mektep, we Jem'iyet Instituti (In'glizche "Community College") dep atilidighan 2 yilliq aliy mekteptin 105 mektep bar. Bularning ichide Kaliforniye Uniwérsitéti tetqiqatni asas qilidighan mektep bolup, ularda doktorluq ünwanighiche bérilidu. Kaliforniye Shtat Uniwérsitétida bolsa magistirliq ünwanighiche bérilidu. Jem'iyet Instituti bolsa bir qisim oqughuchilarni ottura téxnikom unwani bérip jem'iyetke chiqirip, yene bir qisim oqughuchilarning ortaq derslirini ötüp tügitip, ularni qalghan 2 yilliq oqushni yuquriqi qalghan 2 xil aliy mektepte oqushqa teyyarlaydu. Her bir mektepte 20-30 ming etrapida oqughuchi bolidu.

Erkin Sidiqni qobul qilghini Los Anjélis shehirige 30 kilométir kélidighan "Northridge" dégen sheherge jaylashqan Kaliforniye shtat Uniwérsitétining fizika fakultéti idi (tor bet adrési: http://www.csun.edu). U In'glizche "Cafilornia State University, Northridge (CSUN)" dep atilidu. Eslide mushu fakultétta "Paul Chow" isimlik bir xenzu proféssor bar bolup, eyni waqitta Shinjang Uniwérsitétidiki Ayshem appay bilen Sultan muellimler bir qétim Amérikigha ékskursiyige kelgende mushu proféssorning yardimi bilen ikki mektep arisida dostluq munasiwiti ornatqan idi. Yene mushu Paul Chow dégen proféssorning yardimi bilen bu qétimqi oqush pursitini hel qilghanidi. Mektep oqush pulini kötürüwetken bolup, Erkin Sidiqqa yene "yardemchi oqutquchi" liq xizmiti bérilgen idi. Shunga Shinjang Uniwérsitéti uning Amérikigha kélish yol kirasini chiqirip bergen bolup, Amérikigha kelgendin kéyinki turmushini iqtisadiy jehette özi qamdaytti. Kaliforniyediki mektepler chet ellik oqughuchilardin alidighan oqush puli 2 türge bölinidighan bolup, uning birsi "oqush puli" (In'glizche "Tuition") dep atilip, yene birsi "tizimlitish puli" (In'glizche "Registration Fee") dep atilidu. Kaliforniye nopusidiki kishiler peqet "tizimlitish puli" nila töleydighan bolup, chet ellikler bolsa her ikkilisini töleydu. Erkin Sidiq bolsa peqet "tizimlitish puli" nila özi töleytti. Proféssor Paul Chow eslide junggodiki bir kembeghelning balisi bolup, u kichik waqtida Amérikigha baridighan bir yük toshush paraxotigha yushuriniwélip qanunsiz kélip, kéyin doktorluqqiche oqup, hazirqi mektepke proféssor bolghan iken. U Uyghurlargha alahide köngül bolidighan kishi bolup, ashu kishining yardimide Uyghur diyaridin bu mektepke jemi 5 Uyghur we bir qirghiz oqughuchi kélip oqughan.

Erkin Sidiqning burunqi tetqiqat netijilirige asasen, u kélishtin burun CSUN ning fizika fakultéti tetqiqatta fakultét boyiche eng aldida mangidighan, mushu mektep bilen Kaliforniye Téxnologiye Instituti da tengla proféssor bolup ishleydighan "Ryoichi Seki" isimlik proféssorni uninggha yétekchi oqutquchi qilip békitip qoydi. Bu proféssorning esli milliti Yaponluq bolup, Amérikida oqup, doktorluqni püttürgendin kéyin, Amérikida proféssor bolup qalghan iken. Shundaq qilip, Erkin Sidiq Yaponiyide koréye millitidin bolghan proféssorning qolida, emdi Amérikida bolsa Yaponluq proféssorning qolida ishlidi

Erkin Sidiqning burunqi oqughini éléktir énjénérliki bolsimu, bu mektepning fizika fakultétigha qobul qilin'ghanliqi üchün, kesip özgertishke toghra keldi. Shinjang Uniwérsitétidiki omumiy dersler qatarida oqughan bir qisim töwen derijilik fizika dersidin bashqa, uning fizikidin xewiri yoq idi. Hemde fizikiliq atalghularning In'glizchisi uyaqta tursun, xenzuchisi we Uyghurchisinimu anglap baqmighan idi. Uning üstige u her heptisi 20 saet (yeni 2 yérim kün) tejribe dersi ötmise bolmaytti. Shunga waqit uning üchün intayin qimmetlik bolup ketti. Amérikidiki aliy mektepler chet ellik aspirant oqughuchiliridin her mewsumde 9 oqush nomuri (yeni 3 oqush nomurluq derstin 3 ni) tallashni telep qilidu. Erkin Sidiqmu deslepte 3 ders tallidi. Emma bu yerde oqutquchilar ders ötkende kitab boyiche ötmey, hemde kitabning qaysi qismini ötidighanliqinimu doskigha yézipmu qoymay ders sözleydighan bolghachqa, Erkin Sidiq ishning bash-axirini angqirip bolghiche bir dersning mewsum ariliqidiki imtihan waqti bolup qaldi. Erkin Sidiq ilajisiz nurghun yol méngip yürüp, özining bir dersini qisqartti. Shuning bilen mewsum axirida qalghan 2 derste "A" (yeni "ela") nomur aldi. Ikkinchi mewsumdin bashlap siniptiki bashqa oqughuchilar Erkin Sidiqtin ders soraydighan boldi.

1989-yili 5-ayning axiri Erkin Sidiq tughqan yoqlash we ayali Aman’gülni Amérikigha ekilish üchün Béyijingge bardi. U yurtqa méngishtin burun aldi bilen Amérika konsulxanisigha bérip, özining Amérikigha qaytip kétish wizisi bilen Aman’gülning Amérikigha bérish wizisini béjirmekchi boldi. 3-iyul küni axshimi Béyjingda chong weqe boldi. Erkin Sidiq shinjang ish béjirish idarisi méhmanxanisida bolghachqa, oq-bombilarning partlash awazlirini anglap turdi. Bu ishlardin héch qandaq xewiri yoq Aman’gül 4-iyul küni etigende emdi 5 ayliq bolghan oghli Dilshatni quchiqida kötürüp, ayropilan'gha olturup Béyijingge keldi. U küni Béyjingning yolliri pütünley tosulup ketken bolup, qatnash pütünley palech haletke chüshüp qalghan idi. Erkin Sidiq Béyjing ayrudurimigha baridighan qatnash qorali tapalmay, tit-tit bolup turghanda, özi turghan méhmanxanidin bir minibusning Uyghur aptonom rayonluq xelq hökümitidin kélidighan bir qisim kishilerni ekilish üchün ayrudurumgha baridighanliq xewirini anglidi. Shuning bilen u ashu mashinida olturup, yolda téxiche köyüwatqan herbiy mashinilarning arisidin ötüp, ayrudurumghaa bérip, Aman’gül bilen Dilshatni méhmanxanigha qayturup keldi. 4-iyul weqesi tüpeylidin Amérika konsulxanisi waqitliq ishtin toxtighan bolghachqa, ular 10 kün'giche wiza béjirelmey Béyjingda turup, andin wiza béjirip ürümchige qaytti.

1989-yili 8-ayning axiri Erkin Sidiq bilen Aman’gül 4 yashliq qizi dilnarini Aman’gülning hedisige, 7 ayliq oghli Dilshatni Aman’gülning apisigha béqip bérishke qaldurup, özliri Amérikigha qaytip keldi. Uningdin kéyin Erkin Sidiq öz oqushini dawamlashturup, Aman’gül özlükidin In'gliz tili öginip, toefl imtihanigha teyyarliq qildi. Bir ana üchün 7 ayliq balini süttin mejburi ayrip, uni ata-anisigha qoyup qoyup, yer sharining yene bir teripige kétish anche asan ish emes idi. Shunga bu bir mezgil Aman’gül üchün ömridiki eng qiyin we azabliq waqitlar boldi. Qoligha kitab alsila, xiyaligha balilar kiriwalatti. Uxlisila chüshide özini izdewatqan balilirini köretti. Erkin Sidiq bolsa öz oqushini oqup, fakultéttiki xizmitini ishleshtin sirt, yene mektepning "akadémiyilik yardem merkizi" dep atilidighan, derste qiyniliwatqan oqughuchilargha ders chüshendürüp qoyidighan orundimu ishlidi. Hemde öz aldigha fizika we matématika dersliri boyiche saitige 12 dollar heq alidighan ders chüshendürgüchi (In'glizche "Tutor") bolupmu ishlidi. Bir mezgil waqit ötkendin kéyin uning oqughuchiliri intayin köpiyip ketip, her shenbe we yekshenbe künliri künige 12 saet ishleshke toghra keldi. Erkin Sidiq mushundaq ishlarni qilip turupmu özining dersi we tetqiqatida nahayiti yaxshi netijilerni qolgha keltürüp, 1990-yili 5-ayda ela netije bilen magistirliq unwanigha érishti. Magistirliq üchün oqughan derslirining ichide peqet birla derstin "B" nomur alghandin bashqa, qalghan derslerning hemmiside "A" aldi. Erkin Sidiq 1989-yili 5-ayda fizika fakultéti her yili peqet birla aspirant oqughuchigha béridighan "C. Y. Liang xatire mukapati" gha ériship, bir mukapatname bilen 1200 dollar pul mukapat aldi. 1990-yili 5-ayda bolsa fizika fakultéti her yili peqet birla aspirant oqughuchigha béridighan "ilghar yardemchi oqutquchi mukapati" gha érishti. Uning magistirliq unwani üchün mikro-dolqun téxnikisigha ait tetqiqat élip bérip yazghan ilmiy maqalisi Amérikida chiqidighan xelq'araliq ilmiy maqale jurnili "qollanma fizika jornili" (In'glizche "Journal of Applied Physics") da élan qilindi.

1989-yili 10-aydin bashlap Erkin Sidiq mikro-dolqun téxnikisi kespi bar bashqa aliy mekteplerning éléktir énjénirliki kespidiki doktorluq oqushigha iltimas qilishqa bashlidi. U jemi 10 dek mektepke iltimas qilghan bolup, uninggha ularning ichidiki 6 aliy mekteptin chaqiriq keldi. Bu mektepler: Kaliforniye Uniwérsitéti (dawis, Kaliforniye), jenubiy Kaliforniye Uniwérsitéti (Los Anjélis, Kaliforniye), ottura florida Uniwérsitéti, utah Uniwérsitéti (salt lake shehiri), markuéetta uniwersity (milwauke, wiskonsin), we rike Uniwérsitéti (xiyoston, téksas). Emma, Amérikida éléktir énjénérlik kespige qobul qilin'ghan chet ellik oqughuchilargha köpinche hallarda 1-yili oqush mukapat puli bérilmeydighan bolghachqa, Erkin Sidiqning birer mektepke bérip oqushqa iqtisadiy jehettiki madari yetmidi. Shuning bilen Aman’gül bilen meslihetliship, bu oqushni bir yil kéchiktürup, bir yil ishlep pul tépish qararigha keldi. 1990-yili sowét ittipaqi yéngidin parchilinip, Amérikining nurghun dölet mudapiesi bilen munasiwetlik sanaiti weyran bolup, ishsizlar köpiyip ketken bir mezgil bolup, yéngi oqush püttürgen oqughuchilar üchün xizmet tépish intayin qiyinliship ketti. Uning üstige Erkin Sidiq bir chet ellik bolup, u peqet waqitliq ishlep turmaqchi idi (Amérika magistirliq unwanigha érishken chet ellik oqughuchilargha bir yilliq, doktorluqqa érishkenlerge bir yérim yilliq ishlep praktika qilish pursiti béridighan bolup, bundaq ishlesh qanunluq idi.) Erkin Sidiq shirketlerdin xizmet izdep zadila ish tapalmidi. Uningdin kéyin bir qanche chong réstoran'gha kütküchi bolush üchün iltimas qilghili barsa "biz magistirliq unwani barlarni almaymiz", dep turiwaldi. Erkin Sidiq turiwatqan jay holliwod kino bazisigha yéqin idi. U "kino artislirining balisini baqsa, xéli kop maash alghili bolidiken", dep anglap, gézittin bala baqquchi izdewatqan élanlarni tépip, bir qanche yerge téléfon qilsa, ular "biz er kishini almaymiz", dédi. (Erkin Sidiq burun öz ukilirini béqip baqqan bolup, baligha bek estayidil qaraydighan bolghachqa, buninggha intayin ishench qilghan idi.) ashundaq yol tapalmay yürgen künlerning birside u 10 dek adimi bar bir kichik shirkettin xizmet tapti. Bu shirket qilidighan ish bashqa shirketler ishlep chiqarghan, köp qewetlik tok yoli bar, nahayiti murekkep éléktir eswablirigha ishlitidighan taxtaylarni tekshürüsh we sinaq qilish idi. Lékin shirketning igisidin bashqilar asasen aliy mektepte oqup baqmighanlar bolup, köpinchisi méksikiliqlar idi. In'glizchinimu tüzükrek sözliyelmeytti. Erkin Sidiqqa ashularning qatarida saitige 5 dollar ish heqqi berdi. U chaghda Erkin Sidiqning ayliq yataq ijarisi 350 dollar bolup, Aman’gül bilen ikkisining ayliq tamiqi üchünmu 150-200 dollar pul kétetti. Shunga peqet yoqurqi shirkettiki xizmetke tayan'ghanda, héch qandaq pul yighqili bolmaytti. Shunglashqa Erkin Sidiq bir tereptin ishlep turup, yene bir tereptin dawamliq xizmet izdidi. Hemde bir tonushining tonushturushi bilen yene bir shirkette ish tapti. Bu shirket yuqirida teswirlen'gen éléktir eswablirigha ishlitidighan tok yoli taxtiyini ishlep chiqiridighan shirket idi. Bu shirket Erkin Sidiqqa saitige 6.5 dollar ish heqqi berdi. Shuning bilen Erkin Sidiq 1-shirkette her küni 5 saet (etigen saet 7 din 12 giche), 2-shirkette 8 saet (chüshtin kéyin saet 1 din kech saet 9 ghiche) ishleydighan qiliwaldi. Etigini öydin saet 6 de chiqip ketse, kechliki saet 10 larda qaytip kéletti. Bezi künliri artuq ishlep, saet 12 lerde qaytip kélidighan waqtimu boldi. Lékin, bu 2 shirkette ishlepmu, uning her ayda yighalaydighan puli 500 dollargha barmidi. Uning üstige uning qilidighini bir xil töwen derijilik xizmetler bolghachqa, u dawamliq bashqilarning eski muamilisige uchrap, rohiy jehettin intayin azap chekti. Shuning bilen u Kaliforniye Uniwérsitétigha téléfon qilip, héch bolmighanda özige yardemchi oqutquchiliq xizmiti bérishni telep qildi. (bu mektepning In'glizche ismi "Uniwérsiti of California, Davis" bolup, qisqartilip "UCD" dep atilidu.) hemde özining magistirliq oqushi jeryanida oqutquchiliqtin alghan mukapatning ishini fakultét mudirigha éytti. Fakultét mudiri Erkin Sidiqning ehwalini birer qur tepsili tekshürüp chiqqandin kéyin, uninggha her ayda 25 pirsent (yeni heptisige 10 saet) ishleydighan yardemchi oqutquchiliq xizmitini bérishni qarar qildi. UCD ning chet ellik oqughuchilardin telep qilidighan yilliq oqush puli 13 ming dollardin artuq idi. Erkin Sidiq bilen Aman’gül bir-ikki hepte qattiq oylinip, axiri shimaliy Kaliforniyege jaylashqan bu UCD ke kétish qararigha keldi. Hemde 1990-yili 8-ayning axiri ular barliq yük-taqlirini özlirining ikki kichik mashinisigha qachilap (bu mashinilar kona mashinilar bolup, her birsini 700 dollardin sétiwalghan), shimaliy Kaliforniyediki shtat paytexti bolghan sakraménto (In'glizche "Sacramento") shehirige 30 kilométir, san fransisko (In'glizche "San Francisco") shehirige 100 kilométir kélidighan, In'glizche "Davis" dep atilidighan sheherge qarap yol aldi.


Erkin10a 

Yoqurqi resim: Erkin Sidiq 1990-yili 5-ayning 20-küni In'glizche "California State University,
Northridge CSUN" dep atilidighan Kaliforniye Shtat Uniwérsitétining fizika kespi boyiche magistirliq
unwanigha érishken waqitta chüshken xatire resimi.

 

Erkin10b 

Yoqurqi resim: Erkin Sidiq Amérikigha barghan kündin tartip ayalining ismi nansi (In'glizche "Nancy"),
érining ismi jon woltér ("John Walter") dep atilidighan bir jüp er-ayal Amérikiliqlar bilen yaxshi ötken.
Bu Amérikiliqlar burun Shinjang Uniwérsitétida bir mezgil In'gliz tili dersi ötüp baqqan bolup
diyaridin kelgen yerlik millet oqughuchilirigha alahide amraq idi. Bu resim 1990-yili yazda ashu
Amérikiliqlarning hoylisida tartilghan. 1-qur ongdin solgha: gülbahar bilen Erkin Sidiq. 2-qur
ongdin solgha: Aman’gül, hekime appay (eyni waqitta en'gliyede oquwatqan bolup,
bu yerge sayahet qilghach Erkin Sidiqlarni yoqlap kelgen idi), merkiziy milletler komitétidin
Tewekkül ependi, Jhon, Nancy, we Polat (qirghiz). Gülbahar bilen polatmu eyni waqitta
CSUN da oquwatqan Shinjang Uniwérsitétining oqutquchiliridur.

 

Erkin10c 

Yoqurqi resim: Erkin Sidiqning yétekchi oqutquchisi proféssor Ryoichi Seki ependi.

 

 Erkin10d

Yoqurqi resim: Erkin Sidiq 1989-yili 6-ayda tughqan yoqlash üchün yurtqa kelgende
özining Shinjang Uniwérsitétidiki öyining ichide chüshken resim. Erkin Sidiqning
quchighidikisi emdi 4 yashqa tolghan qizi Dilnare, Aman’gülning quchighidikisi
emdi 5 ayliq bolghan oghli Dilshat.

 

Erkin10e

Yoqurqi resim: Erkin Sidiq özini Amérikigha ekelgen proféssor Paul Chow bilen birge.
Ongdin solgha: Mahire, Erkin Sidiq, proféssor Paul Chowning xanimi, proféssor
Paul Chow, Aman’gül, we Adil Atawulla. Arqa qurdiki Gheyret Sabit. Bu resim
1996-yili 8-ayning 16-küni Los Anjilis tiki Mawlan bilen Gülbaharning arqa hoylisida tartilghan.


Erkin Sidiq ependining bu terjimhalini Bilik kulubidin Alyar bilen Bostan Uyghur medeniyet kulubidin Yawuz ependi birlikte teyyarlighan. Bashqa tor béketlerde élan qilmaqchi bolsingiz, «Bilik tor békiti yaki Bostan Uyghur mediniyet kulubidin élindi», dep eskertkeysiz.

http://www.bilik.cn      http://www.bostan.cn


Munasiwetlik téma:
Uyghur alimi Erkin Sidiq bilen söhbet (1)
Uyghur alimi Erkin Sidiq bilen söhbet (2)


© Copyright 2004 Uyghur Meripet Homepage

Squash My Bills