Erkin Sidiqning Qisqiche Terjimali

[1-Bölum], [2-Bölum], [3-Bölum], [4-Bölum], [5-Bölum]
[6-Bölum], [7-Bölum], [8-Bölum], [9-Bölum], [10-Bölum]
[11-Bölum], [12-Bölum], [13-Bölum], [14-Bölum], [15-Bölum]

5-Bölum: Yézidiki Qayta Terbiye

Erkin Sidiq 1976-yili 7-ayda Aqsu 1-ottura mektepni püttürüp, bir aydek yazliq tetil qilghandin kéyin, mektep 8-ayning 7-küni shu yili oqush püttürgen oqughuchilarning hemmisini mektepke yighdi. Shu küni bir meydan daghdughiliq seperwerlik yighinidin kéyin, oqughuchilar qara mashina we traktor kozuplirida olturup, Aqsu shehirige yéqin rayonlardiki aldin teqsim qilinip qoyulghan yézilargha qayta terbiye élishqa mangdi. Uning sawaqdashlirining ichide, ailiside alahide ehwal bolup, yézigha barmasliqqa yol qoyulghan we arqa ishik qilalaydighan bir qanche sawaqdashliridin bashqa hemme yashlar terep-terepke qarap yol aldi. Erkin Sidiqning dadisi nurghun yol méngip, "öyge yéqin" dep, uninggha konisheher shal uruqchiliq meydani dep atilidighan bir yézini hel qilip qoyghan idi. Shuning bilen Erkin Sidiq özining yutqan-körpilirini, we abdushükür taghisi sogha qilghan bir kichik omaq ketmenni élip, bir 28-nomurluq traktorning kozupida olturup, öz yézisigha qarap mangdi. Bu chaghda Erkin Sidiqning aldidikisi bir cheksiz ketken uzun yol idi. Uning istiqbali bir qara öngkürge oxshash pütünley nursiz idi. U özining eng axiri nege bérip, nede turidighanliqini, ömrini néme ish bilen ötküzidighanliqini bilmeytti. Uning özi bilen bille élip mangghan nersilirining ichide, yene yézida obdan ishlep, shu arqiliq 20 nechche som ayliq béridighan birer ishchiliq xizmitige érishishtin ibaret bir arzu, pilan we iradila bar idi. U chaghda aliy mektepke imtihan bérip, imtihandin ötkenler baridighan ish yoq bolup, birer ishchiliq xizmitige érishish üchünmu, yézida kam dégende 2 yil qayta terbiye almisa bolmaytti. Shunga u chaghdiki yashlar yuquriqidin bashqa hich nersini ümid yaki tesewwur qilalmaytti.

Erkin Sidiq barghan bu yéza Aqsu shehirige 10 kilométir, Konasheher nahiye bazirigha 4 kilométir kélidighan bir yerde bolup, u yerge Aqsu shehiridin özidin bashqa peride isimlik yene bir qizla bardi. U yéza shu yili yéngidin tesis qilin'ghan ziyaliylar qayta terbiye élish ponkiti bolup, shu yili Konasheher nahiyiside toluqsiz we toluq otturini püttürgen uyghur oqughuchilarning bir qismimu ashu yerge ewetilgen idi. Aqsu 1-otturini püttürüp Konasheherge barghan bashqa oqughuchilarmu bar bolsimu, ular bashqa yézigha barghan idi.

Bu yézigha u chaghda téxi tok ulanmighan bolup, hemme kishiler öy-yataqlirini kirsin chirighi bilen yorutatti. U yerning ishchiliri ichide peqet bir aile kishila uyghur bolup, qalghanliri ichkirining oxshimighan yerliridiki ölkilerdin kelgen xenzular idi. Bu meydanning asasliq ishlep chiqiridighini shal uruqi bolup, Konasheher nahiyisi aliy süpetlik shal uruqi bilen teminleytti. U yerning hawasi nem we süyi intayin köp bolghachqa, pasha intayin köp idi. Yaz künliri adem daka rexttin yasalghan kichik pashiliqlarning ichige kiriwalmisa, axshimi uxlash mümkin emes idi. Yaz künliri nechche ayda bir qétim nahiyidin bu meydan'gha kino ekilip qoyup bergende, adem pütün bedinini bir nerse bilen orap olturmisa, pashining derdidin sirtta olturup kino körüsh mümkin emes idi. Peqet közinila ochuq qoyup oltursimu, pashilar ademning közige olushup kétetti. Shunga kino körüsh emeliyette közige olishiwalghan pashilarni qorup olturush jeryani bolatti. Uyghur ziyaliylarning turidighan öyi qurma tam bilen yasalghan intayin addiy öyler idi. Gürüch köp chiqidighan bundaq yerning bir alahidiligi, u yerlerde chashqan intayin köp bolidu. Erkin Sidiq qalghan ziyaliylar bilen shal orughanda, pat-pat étizliqning 10 santimétir chongqurluqtiki bir yerliridin éghirliqi birer kilo kélidighan, intayin pakiz we intayin pütün aqlan'ghan gürüchlerni tépiwalatti. Bu shal étizliqida jan baqidighan chashqanlar özlirining qishliq yémekliki üchün teyyarlighan "iskilattiki ashliqi" idi. Bu chashqanlar uyghur ziyaliylar yataqlirining torusi we qurma tam ariliqlirighimu intayin köp uwa tutiwalghan bolup, axshimi adem uxlighili yatqan haman, pütün chashqanlar kéchilik paaliyitini bashliwétetti. Beziliri torustin chalma tashlaytti. Beziliri tamaq qachilirini taranglitatti. Beziliri üstide adem yatqan körpining astining bir teripidin yene bir teripige ötmekchi bolatti. Chashqanning tajawuzchiliqi mushundaq éghir bolghachqa, kishilerning kechlik tamaqtin kéyin tamaq qachisini yuyushning hajiti yoq idi--yuyulmighan qachini shu péti qoyup, etisi etigini qarisa, u chashqanlarning "tazilishi" bilen pak-pakiz bolup kétetti. Shunga ziyaliylar qachisini tamaq yep bolghanda emes, tamaq yéyishtin burun yuyatti. Erkin Sidiq bir qanche qétim etigenliki ornidin turghanda, körpisining astidin ölük chashqan tépiwalghan idi. Bular kéchisi körpe astining bir teripidin yene bir teripige "seper" qilip kétiwatqanda, körpe üstide uxlawatqan kishi uyqa ichide örülgende uqmay bésiwélip, öltürüp qoyghan chashqanlar idi. Bezi oghullar shal omisi waqtida shal étizidiki chashqanlardin 20-30 ni öltürüp, ularni xuddi tizilip bir yerge méngiwatqandek körsütüp qatari tizip qoyghan ishlarmu bolghan idi.

U chaghda saet bolmighachqa, ziyaliylar tang atqanda ornidin turup ishqa bérip, kün olturghanda ishtin chüshetti. Tamaqning süpiti intayin nachar bolup, kishiler aylap-aylap gösh körmeytti. Lékin tamaq asasen normisiz bolup, qanchilik yése shunchilik bar idi. Etigini yeydighini hor nan bolup, ashxanida ot qalap issitidighan mesh bolmighachqa, qish küni hor nanliri pütünley tonglap qalatti. Bezide ashpezlik qilidighan ziyaliy sheherge kétip, ettgini nanni issitip qoyidighan adem yoq bolup qalghanda, Erkin Sidiq ashundaq tonglap qalghan hor nénidin birni kötürüp, su chashkisidin birni élip, yatiqining qéshidiki östeng boyigha bérip olturup, bir tereptin östengdin su élip ichkech, yene bir tereptin héliqi tonglap qalghan hor nénini azraq-azraqtin ghajighan ehwallar uning éside hazirmu eynen saqlaqliq turmaqta. Östengdin su élip ichkende, uning bash teripide at-kalilarning östengge kiriwélip su ichiwatqini körünüp turatti. Chashkigha alghan suning ichide aylinip yürgen her xil nersiler körünüp turidighan bolup, suni alghandin kéyin sel saqlap, aylinip yürgen nersilerning bir qismi chashkining astigha olturup, qalghan qismi yenila leylep tursimu, suni ichiweretti.

Erkin Sidiq her shenbe küni ishtin chüshkendin kéyin Aqsudiki öyige qaytip kélip, yekshenbe küni kechte yézisigha yene qaytip kétip turdi. Uning ailiside peqet birla wélisipit bolghachqa, her qétim u öy bilen yézining ariliqidiki 10 kilométir yolni piyade basti. Yolni qisqartish üchün u chong yolda mangmay, janggalmu-janggal, étizliqmu-étizliq, özi yalghuz yol yüretti. Gheyret qilip ittik mangsa, 10 kilométir yolni 2 saette bésip bolatti. Öyige mangghanda xushal we kötürenggü-rohluq mangsa, etisi qaytip kélidighanda emgektin bashqa hich nerse yoq, rohiy turmushtin esermu yoq bu jaygha birsi boynini baghlap tartip kétiwatqandek, putini sörep, intayin teslikte mangatti. Yolmu nahayiti yiraq tuyulup kétetti. Bezi dem élish künliri öyige qaytmay, 4 kilométir yolni piyade yürüp Konasheher nahiye bazirigha bérip, bezi sepdashlirining öyide méhman bolatti. Nahiye kulubida kino qoyghanda, dostliri bilen kino köretti. Yézida birge qayta terbiye éliwatqan iskender isimlik bir sepdishi burun shu nahiyilik kinoxanida ishligen bolup, Erkin Sidiq kino körgili barghanda, uningdin bélet almay kirgüziwétetti. Qayta terbiye mezgilide Erkin Sidiq turghan yézidiki ziyalilargha hich qandaq ish heqqi bermigen bolup, qorsaqqa yégen tamiqi ashu ziyaliylarning ish heqqi idi. Shunga ziyaliylar intayin kembeghel bolup, ularning nurghunliri tamaka pulisighimu chiqinalmaytti. Shunglashqa oghullardin birsi moxorkidin birni yögep chekse, bir demdila bashqilar uning yénigha kélip, nöwetliship u bir moxurkini chékish üchün öchiret bolup kétetti. Konasheherning döng töpisige yéqin jayida bir süyi intayin tatliq bulaq bar bolup, Erkin Sidiq bezide dostliri bilen shu bulaq etrapida chöridep olturup, dutar chélip, naxsha éytip, hékaye éytiship olturghan waqitlirimu boldi. Mana bu Erkin Sidiqning yézida qayta terbiye éliwatqan mezgildiki eng güzel eslimiliridur.

1977-yili, Erkin Sidiq etiyaz peslidiki 4-aydin bashlapla rézinke ötük kiyiwélip sugha kirip, shal térish meshghulatini bashlidi. Deslepte sugha kirgende yer téxi érip bolalmighan bolup, tong yerning ustige dessep ishleshke toghra keldi. U yéngi nersini téz öginidighanlighi, we hemme ishni inchikilik bilen estayidil qilidighanliqi üchün, bu waqitqiche u shal térishta meydandiki 1-derijilik emgek küchi qatarida orun alghan idi. U shal térish, maysa östürüsh, maysa köchürüsh, ot otash, we eng axiri shal orushqiche hemme ishni bashtin-axir qilip chiqti. Shu yili eng axiri 10-aylargha az qalghiche su ichide ishlidi. Shal oruwatqan künlerning birside, u uyghurlarning ay sheklidiki orghiqini téz sür'ette bilewétip, uni soldin onggha biligende, oghaqning uchi bileydin sérilip chiqip kétip, arqigha yandurup bilesh herikitini qilghanda oghaq biley tutqan qolning astigha chüshüp qélip, shuning bilen Erkin Sidiqning bélikining 3 sant-métir uzunluqtiki yérini achimaq sheklide késip, bélikining söngikini körsitip qoydi. Erkin Sidiq bu ishtin kéyin bilikini téngip saqaytti. Lékin, oghaq kesken jay sol qolining saet taqaydighan yéridin sella üstün bolup, u yer bir achimaq shekilde chong tartuq bolup qaldi. Bu tartuq Erkin Sidiqning bilikide hazirmu bar bolup, u her qétim bilikidiki saetke qarighanda, bu tartuq uninggha u eyni waqitta yézida qayta terbiye élish jeryanida béshidin kechürgen yuquriqidek japaliq turmushni eslitip turidu. Amérikidiki yuqiri téxnikiliq shirketlerde we hazirqi JPL da ishlewatqan waqitlarda Erkin Sidiqning bezi xizmetdashliri uningdin béliki nimishqa tartuq bolup qalghanliqini soridi. Bu tartuq sözleydighan tarixiy hékaye intayin uzun we échinishliq bolghachqa, Erkin Sidiq ularni sözlep olturmay, "bir qétim diqqetsizlikimdin pichaq késiwetken", depla qoydi.

Shal térishtin bashqa, Erkin Sidiq bu meydanda her xil sey-köktatlarni térishqa, hemde uni nahiye bazirigha apirip sétishqimu qatnashti. 1977-yili yazda, u téxi bir ay yézisining 30 dek at, kala we qoylirini heydep, özidin bashqa hich qandaq ademning qarisi körünmeydighan bir janggalda pada baqti. Bu ulagh topining ichide bir jughi kichik, emma intayin ittik yügreydighan bir jigerreng at bolup, pada baqqili chiqqanlarning hemmisi shu atni miniwalatti. Lékin atqa artidighan toqum yoq bolup, hemmeylen uni yaydaq pétila minetti. Erkin Sidiq bu atni minishke bashlighan birinchi heptisi uning sönggichini atning dümbisi ghajilap yéghir qilip qoydi. Bundaq yéghir intayin aghriydighan bolup, uning derdide Erkin Sidiq bir qanche hepte tüz olturalmay, bir yerde oltursa sönggichining yérimini qoyup, qiypash olturup yürdi. U chaghda birer radio yaki shuninggha oxshash insan'gha azraq hemra bolup béridighan hich néme yoq idi. Waqitni bir az ehmiyetlik we tézraq ötküzüsh üchün, Erkin Sidiq pada béqish jeryanida maw zédungning yéngidin neshir qilin'ghan 4-tomini we lu shünning filyetonlirini oqudi. Bezide xenzu tili ögendi. U chaghda Erkin Sidiqta birer xenzu tili dersliki yaki xenzuche-uyghurche lughet bolmighachqa, u bir kitabning uyghurchisi bilen xenzuchisini tengla kötüriwélip, ularni bir-birige sélishturup yürüp til ögendi. Bundaq til öginishni pada béqishtin bashqa waqitlardimu, öz imkaniyiti yar bergen hemme waqitlardin toluq paydilinip, izchil türde élip bardi.

Erkin Sidiq yézidiki waqtidimu uyghur ittipaq yachéykisining sékritari, meydan ittipaq bash yachéykisining muawin sékritari, meydan bashqurush komitétining ezasi, meydan xewerlishish guruppisining guruppa bashliqi, meydan teshwiqat etritining bashliqi qatarliq wezipilerni ötidi. U 10 dek uyghur ziyaliylarni yighip, bir sen'et etriti teshkillidi. Uningda özi shéir yézip, yazghan shéirlarni eyni waqitta uyghur jem'iyitide mewjut bolup turghan muzika ahangigha sélip naxsha qildi. Hemde bezide dutar, bezide rawap, we bezide dap chélip, sen'et oyunliri teyyarlidi. Shu waqitta uyghurlarda hazirmu yaxshi körülüp éytilidighan "seni esleymen" dégen naxsha ahangigha eyni zamandiki weziyetke maslashqan, dangliq uyghur shairliridin biri yazghan bir shéir tékistini kirgüzup, sen'et etritining hemme ezaliri opche oquydighan bir kolléktip naxshisi qilip chiqti (u chaghda muhebbet xaraktérige yatidighan hemme naxshilar "sériq naxsha" türige ayrilip, ularni éytish qet'iy men'i qilin'ghan idi). Bu sen'et etriti Konasheher nahiyilik kino kulubida sheher ahalisi üchün bir qétim oyun qoyup berdi. U chaghda yézigha qayta terbiyige barghan ziyaliylarning aldidiki birdin-bir chiqish yoli ikki yil yaxshi ishlep, meydanning bahalishida layaqetlik bolghandin kéyin, nan tépip yigili bolghidek xizmettin birni tépish idi. Shunga Erkin Sidiq özila her jehettin qattiq tiriship yaxishi ishlepla qalmay, bashqa uyghur ziyalilarghimu intayin köngül bölüp, ularni özlirige paydiliq yolgha yéteklep turdi. Erkin Sidiq burunqi rékordliri anche yaxshi bolmighan bezi ziyaliylar bilen yéqin dost bolup, ular bilen birge meydan'gha paydiliq bolghan her xil yaxshi ishlarni qildi. U yerdiki ziyaliylar üchün buningdin bashqa chiqish yoli yoq idi.

1977-yilining axirliri déng shyawping bashchiliqidiki junggo rehberliri aliy mektepke oqughuchi qobul qilish tüzümini islah qilip, aliy mektep oqughuchilirini bir tutash élin'ghan imtihan netijisige qarap tallash siyasitini yolgha qoydi. Bu ish Erkin Sidiqni we uninggha oxshash minglighan, 10 minglighan yashlarni cheksiz xoshal qildi. Ulargha bir xil ümid élip keldi. Shu yili küzdin bashlap, her yer her yerlerde qayta terbiye éliwatqan ziyaliylar arisida aliy mektep imtihanigha teyyarliq qilish dolquni qozghaldi. Ottura mekteplerning hemmisi aliy mektep imtihanigha teyyarliq qilish üchün mexsus ders tekrarlash meshghulatlirini élip bardi. Erkin Sidiq Konasheher nahiye teweside bolghachqa, meydan rehberliki uning Aqsugha qaytip, özining burunqi mektipidiki ders tekrarlash kurslirigha qatnishishigha yol qoymidi. Shunga u öz yézisidiki qalghan ziyalilargha oxshash, chüshtin burun ishlep, chüshtin kéyin nahiye baziridiki 1-ottura mektepke bérip, ders tekrarlash kursigha qatnashti. Axshimi öz yatiqida, özi yasiwalghan bir ghérich igizliktiki jin chiraghning yoroqida özi ders tekrarlidi. Chiraghqa nahayiti yéqin kelmise kitabtiki xetni körgili bolmaytti. Etisi ornidin turghanda adem burnini silisa, qoligha qap-qara chiraq isi chiqatti. Shu yilqi tunji qétimliq aliy mektep imtihani Konasheher nahiyiside 12-ayning 10-künidin 12-künigiche jemi 3 dawam qildi. Erkin Sidiq bu imtihanlarni Konasheher nahiyiside bérip, imtihan axirlashqandin kéyin yene özining emgikini dawamlashturdi. Ariliqtin bir nechche hepte ötkendin kéyin, Erkin Sidiq turghan yézigha "Aqsudin bir bala bu qétimqi imtihanida pewqul'adde yuqiri nomur aptu" dégen xewer keldi. Bir qanche kündin kéyin "bu pewqul'adde yuqiri nomur alghan bala Konasheherde iken", dégen xewer keldi. Ariliqta yene bir qanche kun ötkendin kéyin, hemme yerge "bu bala Konasheher shal uruqchiliq meydanida iken", "bu bala Erkin Sidiq iken", dégen xewerlermu tarqaldi. Erkin Sidiq bu xewerni anglighanda, hem xushallinip, hem hayajanlinip, közliridin taram-taram yash éqip ketti. Hemde ichide: "ah xuda. Sanga minglarche rexmet!" dédi. Erkin Sidiq bashlan'ghuchta oquwatqan waqtidila özi üchün "bu dunyada qanchilik oqush bolsa, uning hemmisini oquymen" dégen bir ghayini tikligen idi. Lékin, ottura mektepke chiqqandin kéyin, bolupmu yézigha qayta terbiyige chüshkendin kéyin, bu ghaye pütünley uchup ketken idi. Bu qétim kelgen xush xewer uning ümidige qaytidin jan kirgüzdi. Kéyin shu qétim Erkin Sidiqning imtihan netijisi pütün uyghur aptonom rayoni boyiche 2-orun'gha érishkenliki éniq boldi.

Uningdin kéyin jem'iyette Erkin Sidiqni qobul qilghan mektep toghrisida her xil gepler tarqilishqa bashlidi. Deslepte shinjang uniwérsitéti, kéyinchiraq béyijing uniwérsitéti, uningdin kéyin ching xua uniwérsitéti, eng axirida chet elning gépi chiqti. Lékin, Erkin Sidiq ürümchidin bashqa orunlarning gépige zadila ishenmidi. Sewebi eyni waqitta u xenzuchidimu téxi chala sawatliq bolup, chet el tilini qilchimu bilmeytti. Mekteptin téxi chaqiriq kélip bolalmighan bir peytte, Konasheher nahiyilik xelq hökümiti Erkin Sidiqqa ayliq maashi 26 somluq bir terjimanliq xizmiti bérilgenliki toghrisida uqturush qildi. Bu xewerni anglighandin kéyin, Erkin Sidiqning dadisi uni ali mektepke ewetish-ewetmeslik toghrisida sel ikkilinip qaldi. Sewebi ularning ailisi bu waqitqiche iqtisad qiyinchiliqini intayin köp tartip ketken idi. Shu seweptin, gerche Erkin Sidiqning akisimu eyni waqitta ottura mektepte nahayiti yaxshi oqughan bolsimu, uni ailisidikiler shu yilqi ali mektep imtihanigha qatnashturmighan idi. Bu pursettin waz kéchish Erkin Sidiq üchün bir tesewwur qilalighusiz chong zerbe idi. Shunga u ali mektepke bérishta qilchimu tewrenmey, intayin ching turdi. Eger ailisining iqtisadiy ehwali yar bermise, u ailisidikilerge tayanmaydighanlighini éytti. Erkin Sidiqning dadisining dostlirimu bu xewerni bilgendin kéyin uning dadisini eyiblep, Erkin Sidiqni qet'iy oqutmisa bolmaydighanliqi toghrisida teklip berdi. Shuning bilen Erkin Sidiqning dadisi teslikte maqul boldi. Eng axirida, Erkin Sidiqqa özi arzu qilghan shinjang uniwérsitéti fizika fakultéti radio éléktronikisi kespidin oqush chaqiriqi keldi. Shu yili Aqsu wilayetlik 1-ottura mektepning toluq ottura sinipini Erkin Sidiq bilen oxshash waqitta püttürgen 3 sinip oqughuchiliri ichide, peqet 3 oqughuchila aliy mektep imtihanidin ötüp, aliy mektep oqushigha baralidi. Ular yéza igilik mashiniliri sinipidin Erkin Sidiq, doxturluq sinipidin reyhan imin, we yéza igiliki sinipidin gülzeper bolup, reyhan shinjang méditsina uniwérsitétige, gülzeper bolsa shinjang uniwérsitétining tarix kespige qobul qilindi.

Oqush chaqiriqini tapshurup alghandin kéyin, Erkin Sidiq özi chéniqqan yézidiki yotqan-körpilirini yighip baghlap, héliqi uyghur ishchi ailisi we yézida shu chaghda téxiche turiwatqan bashqa uyghur ziyaliylar bilen xoshliship, wélisipit bilen chéniqqili bir yérim yil bolghan bu jaydin ayrildi. Uning üchün birer uzitish paaliyitimu bolmidi. Meydan rehberliri xoshmu dep qoymidi. U jimjit meydandin özi yalghuz sughurulup chiqip, asta Aqsugha qarap yürüp ketti. Gerche Erkin Sidiq bu yézida özining eng japaliq waqitlirining bir qismini ötküzgen bolsimu, uninggha yenila xéli chongqur méhri singip qalghan idi. Shunga u ürümchidin Aqsugha 1978-yili yazda tetil qilip qaytip kelgende, wélisipit bilen özi chéniqqan bu yézigha bir qétim bardi. Burun özi ishligen yerlerning hemmisige bérip, u yerlerni bir qétim közdin kechürdi. Birer tonush uchrap qalarmikin, dep bek umun'ghan bolsimu, hich kimni uchritalmidi. U jay burunqigha qarighanda jiq jimjit körünetti. Shundaq qilip u bu yerdin asta qaytip ketti.

Erkin Sidiq özi qayta terbiyini axirlashturghiche bolghan ariliqta ögen'gen déhqanchiliq téxnikisini hazirghiche ishlitip kelmekte. U shimaliy kaliforniyede 1997-yili özining tunji öyini sétiwalghandin kéyin, öyning arqa hoylisigha her xil derexlerni tikip, sey-köktat térip, buni özining köngül achidighan ishlirining bir qismi qiliwalghan idi. U 2004-yili JPL gha xizmetke kirip, ailisini jenubiy kaliforniyediki yéngidin sétiwalghan öyige köchürüp kelgendin kéyin, bu öyning arqa hoylisining yer qurulushini pütünley özi lahiyilep chiqti. Bu hoyligha 4 tüp anar, 3 tüp üzüm, bir tüp "lémon", bir tüp "aplisin", we bir tüp glas derixi tikti. Etirgül, qoghun'gül we heshqipichek güllirini tikti. Hoylining bir bulungigha azraq üjmimu östürdi. 2005-yili u hoylisida qoghun bilen tawuz östürüp baqti. Bu yil hoylisigha pemidur we achchiq much (laza) térip, bu 2 xil sey-köktatta pütün yaz öz-özini teminlidi. Erkin Sidiq üchün hoylida ashundaq bir qisim nersilerni östürüsh hazirmu uning ishtin qaytip kelgendin kéyin huzurlinidighan rohiy turmushining bir qismi bolmaqta.

Tüwenki Resim: Erkin Sidiq yézida qayta terbiye éliwatqan mezgildiki Konasheherde birge ötken bir qanche ziyaliy yash sepdashliri bilen dostliri.

Tüwenki Resim: Erkin Sidiq bilen Aqsu wilayetlik 1-ottura mektep toluq ottura sinipini 1976-yili birge püttürüp, 1978-yili 2-aydiki tunji qétimliq aliy mektep imtihanidin ötüp, aliy mektepke oqushqa barghan 3 sawaqdashlar. Ong tereptikisi gülzeper bolup, u hazir shinjang uniwérsitéti tarix fakultétining oqutquchisi. Sol tereptikisi reyhan bolup, u hazir ürümchidiki bir herbiy doxturxanining zeherlik chékimlikke öginip qalghanlarni dawalap özgertish ornida doxtur bolup ishleydu. Bu resim 2006-yili 9-ayda tartilghan.

Tüwenki Resim: Erkin Sidiqning jenubiy kaliforniyege jaylashqan hazirqi öyining arqa hoylisining bir körünishi. Hoylidiki chong teshtek, tash supa, yol we otluqlarni Erkin Sidiq özi lahiyilep, adem yallap yasatqan. Bu resim 2005-yili yazda tartilghan bolup, hoylidiki gül-derexlerni Erkin Sidiq shu yili (2005-yili) etiyazda tikken. Resimning sol teripidikisi pemidur kochetliridur.

Tüwenki Resim: Öyning arqa hoylisidiki bir tüp anar. Bu anarni Erkin Sidiq 2005-yili etiyazda tikken bolup, bu resim 2006-yili yazda tartilghan.

---

© Copyright 2004 Uyghur Meripet Homepage